Ang Ipasabot sa mga Balita

“Labing Peligrosong Substansiya”

Ang mga sumbong nga gipasaka sa mga pasyente nga natakdan sa makamatayng sakit pinaagi sa mga pagdugang ug dugo nakahatag ug bag-ong sukod sa kabalaka sa daghang mga bangko sa dugo. Sa tungatunga sa 1989 kapin sa 300 ka sumbong ang gitaho nga gipasaka batok sa mga bangko sa dugo sa Tinipong Bansa. Si Gilbert Clark, ehekutibong direktor sa American Association of Blood Banks, midawat nga “ang publiko gusto ug bug-os luwas nga dugo,” apan siya miadmiter nga kini dili ikagarantiya.

Sa susama, ang Parade Magazine mitaho nga ang espesyalista sa dugo nga si Dr. Charles Huggins miadmiter nga ang dugo “kinahanglang isipon nga bug-os dili-luwas.” Iyang gibatbat ang dugo ingon nga mao “ang labing peligrosong substansiya nga atong gigamit sa medisina.” Sayosayo sa 1989 ang numero sa mga sakit nga mananakod nga ginasulayan sa mga bangko sa dugo misaka ngadto sa lima (HTLV-I, nalangkit sa T-cell leukemia sa edaran, sipilis, hepatitis B, AIDS, ug hepatitis C). Apan, sumala sa awtoridad sa American Red Cross si S. Gerald Sandler, “mopatim-aw nga panahon lay makatug-an hangtod nga kami makakaplag ug laing talagsaong sakit nga gipakaylap pinaagi sa pagdugang ug dugo.” Bisan pa nianang peligrosong posibilidad, mga upat ka milyong mga taga Norte Amerika ang gilaomang makadawat ug mga pagdugang ug dugo sulod sa 1990. Sumala sa kolumnista sa mantalaan nga si W. Gifford-Jones, ang suliran mao “gawas sa mga Saksi ni Jehova, ang kadaghanang mga pasyente dili gayod makighisgot bahin sa posibilidad sa pagdugang ug dugo.”

Sa daghang mga dekada ang mga Saksi ni Jehova matinumanong ‘nagpahilayo gikan sa dugo’ diha sa bisan unsang porma sumala sa gisugo sa Pulong sa Diyos diha sa Buhat 15:28, 29; 21:25. Ang proteksiyon nga nahatag niini kanila gikan sa makalilisang nga mga sakit nga napasa pinaagi sa mga pagdugang ug dugo nagapasundayag lamang sa pagkatukma sa ilang pagsunod sa mga kasugoan ni Jehova.

Pagkawagtang Dili Mamatikdan?

Si Joachim Kardinal Meisner, usa ka kontrobersiyal nga karakter sa dihang gipalingkod siya sa miaging Pebrero isip bag-ong arsobispo sa Cologne, Alemanya, miingon dili pa dugay nga ang iyang labing gikahadlokan mao nga basin moabot ang adlaw nga ang simbahan “mawagtang—ug tingali dili mamatikdan sa katilingban.” Sumala sa Aleman nga mantalaang Rheinische Post, si Meisner miingon: “Ang akong kalag naguol nga ang katilingban nagalantaw sa iglesya nga walay-bili.” Ang posible nga rason, siya miingon, mao nga “hilabihan kitang makahisgot bahin sa yuta ug kulang bahin sa langit, hilabihan bahin sa presente ug kulang bahin sa walay kataposan.”

Pinaagi sa ilang pakig-anib sa politikal ug sa komersiyal nga mga elemento sa kalibotan inay kay sa pagsalig sa langitnong gahom sa pagsulbad sa mga suliran sa kalibotan, ang mga relihiyon sa Kakristiyanohan sa pagkamatuod nagpanghimakak sa ilang pangangkon nga nagahawas sa mga intereses sa Diyos. Kini aduna unyay seryosong mga sangpotanan. Sumala sa Bibliya, ang tanang bakak nga relihiyon sa dili madugay mawagtang—usa ka hitabo nga mamatikdan sa “mga hari sa yuta” ug sa “nagapanawng mga magpapatigayon sa yuta,” si kinsa managbakho ingong resulta niining hitaboa. Busa, ang mga mahigugmaon sa pagkamatarong kinahanglang mamati sa mga pulong: “Gumula kamo sa [bakak nga relihiyon] . . . kon dili kamo buot makaapil sa iyang mga kasal-anan, ug kon dili kamo buot makaambit sa iyang mga hampak.”—Pinadayag 18:4, 9, 11.

Haduol Na ang Kataposan

“Pagpamatay sa Estado” maoy pagbatbat sa ubang mga mantalaan sa mga pagpamatay nga gihimo sa mga gobyerno o sa organisasyon nga gipanalipdan nila. Sa pagkamatuod, sa 1988, miingon ang tigpamaba sa Amnesty International nga si Gerry O’Connel, “midaghan ang mga paglapas sa tawhanong mga katungod, nga nagpadayon sa 1989.” Unya siya midugang: “Ang pagpamatay nga nagalapas sa gidawat sa kalibotan nga mga balaod nakaabot sa labing taas.”

Sumala sa tinuig nga taho sa Amnesty, ang numero makalilisang: Sa 1988 tali sa 50,000 ug 100,000 ka tawo sa 29 ka nasod ang gipamatay ubos sa walay-kabalakang pagtan-aw sa Estado. Apil kanila mao lamang ang mga kabataan, mga tigulang, ug mga babaye, kansang krimen mao ang pagkahimong sakop sa politikal o etnikong mga minoriya o nagkinabuhi diha sa mga dapit nga giawayan sa magkaatbang nga mga partido. Kadtong may tulobagon sa maong mga pagpamatay mao ang mga grupo sa mga tigpamatay, mga rebolusyonaryo, mga tigpahuyot ug mga narkotiko, ug ubang mga grupo nga nagagamit sa kapintasan alang sa politikal nga mga katuyoan. “Kasagaran ang Estado mismo ang nagatago sa likod sa armadong mga pundok aron mawagtang ang mga kontra ug kuwestiyonableng mga elemento,” miingon ang La Repubblica.

Dili kay walay katarongan, hinunoa, nga ang dinasig nga Pulong ni Jehova nagpakasama sa tawhanong kagamhanan sa usa ka “mapintas nga mananap.” (Pinadayag 13:2) Apan, ang maong gipaluyohan sa politika nga kabangisan dili molungtad sa walay kataposan. Sama sa giingon sa Salmo 92:7: “Sa moturok ang daotan ingon sa balili ug sa diha nga molabong ang tanang mga mamumuhat ug kasal-anan, kini mao nga sila pagalaglagon sa walay kataposan.” Ang langitnong Gingharian sa Diyos diha sa mga kamot ni Kristo Jesus, ang “Prinsipe sa Pakigdait,” mao ang mohimo niini.—Isaias 9:6; Daniel 2:44.