Kon Unsaon sa Pagpalampos sa Payunir nga Ministeryo

ANG payunir nga ministeryo mao ba ang imong karera? Kon ikaw payunir, o bug-os panahong magwawali sa Gingharian, walay duhaduha interesado kang molampos. Apan ang kalamposan nangayo ug kapin pa kay sa paggahin ug panahon sa usa ka propesyon. Ang malamposong tawo kinahanglan magbaton ug pagbansay ug makanunayon sa pag-ugmad sa iyang mga katakos.

Sa unsang paagi, hinunoa, nga ikaw dili lamang makapadayon ingong payunir kondili magmauswagon usab sa imong karera? Dunay daghang yawing mga pangutana nga mahimong palandongon mo.

Unsa ba ka Lig-on ang Akong Relasyon sa Diyos?

Usa sa labing importante nga butang sa kalamposan ingon nga payunir mao ang pagbaton ug suod, lig-ong relasyon uban kang Jehova nga Diyos. Niining bahina, makakat-on kita ug pagtulon-an gikan sa salmistang David. Nangaliyupo siya: “Pahibaloa ako sa imong kaugalingong mga dalan, O Jehova; tudloi ako sa imong kaugalingong mga alagianan. Palakwa ako sa imong kamatuoran ug tudloi ako, kay ikaw mao ang akong Diyos sa kaluwasan. Kanimo ako naglaom sa tibuok nga adlaw.”​—Salmo 25:4, 5.

Si David bug-os nga nagsalig sa ‘Diyos sa iyang kaluwasan.’ Nagtinguha siya nga si Jehova motudlo kaniya ug ‘mopahibalo kaniya sa Iyang kaugalingong mga alagianan.’ Wala ka ba makamatikod sa nagdilaab nga tinguha ni David sa pagpahimuot sa Diyos? Kini labaw pa kay sa kalit lang nga tinguha, kay si David miingon: “Kanimo ako naglaom sa tibuok nga adlaw.”

Apan sa unsang paagi imong mahuptan ang suod nga relasyon uban kang Jehova? Matikdi nga ang anaa sa ibabaw mao ang mga pahayag ni David diha sa pag-ampo. Oo, ang komunikasyon pinaagi sa pag-ampo mao ang mismong patukoranan sa maayong relasyon uban sa Diyos. Ug malipay kita sa kahibalo nga dili na kinahanglang maghimog kahikayan aron makaduol sa atong langitnong Amahan. Makaduol kita kaniya sa bisan unsang panahon. Sama sa giingon ni David: “Kanimo ako nagpadayon sa pagtuaw sa tibuok nga adlaw.” (Salmo 86:3) Bisan ang kaugalingong Anak sa Diyos, kinsa naglakaw sa yuta ingon nga hingpit nga tawo, nakaamgo nga dili siya molampos kon wala ang panabang sa iyang Amahan. Si Jesus nakigsulti kaniya sa pag-ampo sa tibuok adlaw​—sayo sa buntag, sa maadlaw, ug sa magabii.​—Marcos 1:35; Lucas 11:1; 612.

Ingon nga mga Kristohanon, kinahanglang sundon nato ang panig-ingnan ni Jesus kon buot kitang molampos sa atong ministeryo. (Hebreohanon 5:7) Mahitungod sa pag-ampo, ang usa ka Kristohanong babaye kinsa malamposong payunir sulod sa 30 ka tuig nagpahayag: “Nakaplagan nako nga ang pag-ampo hinungdanon alang kanako kon buot kong molampos ingong payunir. Kini nakatabang nako sa pagsalig sa bug-os kang Jehova, nga nakaamgo nga ako dili makahimo niini sa akong kaugalingon. Ako makanunayong naghangyo kang Jehova sa pagtabang nako nga makapadayon.”

Oo, aron molampos sa payunir nga pag-alagad, kinahanglan padayon mong huptan ang lig-ong relasyon uban kang Jehova, bug-os nga mosalig kaniya pinaagi sa pag-ampo. Bisan pa, ang mosunod maoy laing hinungdanong pangutana nga isukna sa imong kaugalingon.

Unsa ka Dako ang Akong Gugma sa Katawhan?

Ang pagpayunuir maoy usa ka kapahayagan sa gugma. Ngano? Tungod kay ang bug-os panahong ministeryo naglangkit sa espiritu sa pagsakripisyo-sa-kaugalingon. Ingong payunir, kanunay kang naghatag sa imong panahon ug kusog sa pagtabang sa uban. Apan kon buot mong magpadayon sa pagbuhat niini, kinahanglan duna kay tiunay nga interes sa mga panginahanglan sa uban. Sa dinhi pa sa yuta, si Jesus nagpasundayag sa maong gugma alang sa katawhan. Pananglitan, anaa kanang okasyon diin siya ug ang iyang mga disipulo nanakay ug sakayan ngadto sa mamingaw nga dapit sa “pagpahulay sa makadiyot.” Bisan pa niana, ang katawhan nag-una kanila didto. “Buweno, sa pagtakas sa mamala, nakita niya ang usa ka dakong pundok, apan siya naluoy kanila, kay sila sama sa mga karnero nga walay magbalantay. Ug iyang gisugdan ang pagpanudlo kanila sa daghang mga butang.”​—Marcos 6:30-34.

Sama kang Jesus, ingong mga payunir kinahanglan duna kitay lalom-pagkagamot nga gugma alang sa katawhan. Ang maong gugma motukmod kanato sa paghago sa atong kaugalingon alang kanila. Sama sa gipamulong sa usa ka eskriba makausa kang Jesus: “Kining paghigugma [sa Diyos] uban sa bug-os mong kasingkasing ug uban sa bug-os mong pagsabot ug uban sa bug-os mong kusog ug kining paghigugma sa imong silingan sama sa kaugalingon labaw pa kay sa tanang mga halad-sinunog ug mga halad-inihaw.” (Marcos 12:33) Kining mga pulonga motabang kanato sa pagpabili nga dili ang atong buhaton sa atong ministeryo ang importante kondili kon nganong gibuhat nato kana.

Ingong payunir, mas daghang panahon ang gigugol mo sa buluhaton sa pagwali ug sa paghimog-disipulo labaw kay sa gibuhat sa kadaghanan. Ug mas daghang tawo usab ang imong makontak. Unsa man ang imong pagbati kanila? Ang usa ka payunir miingon: “Nahibalo ako nga ang gugma maoy bunga sa espiritu sa Diyos. Busa kon wala kini ako wala sa kamatuoran, bisag dili na hisgotan pa ang kalamposan ingon nga payunir. Ang gugma nagpahimo kanakong magmahunahunaon sa mga tawo, maalingaton sa ilang mga panginahanglan, ug akong nakita nga ang mga tawo mosanong sa gugma. Hinoon, may mga panahong masulayan ang imong gugma sa mga tawo tungod sa ilang mga tinamdan o mga taras. Nianang kahimtang nga maningkamot gayod ako sa pagpamati ug magmapailobon.”

Mao ba kanay imong pagbati sa mga tawo sa imong teritoryo? Aron mahimong malamposong payunir, kinahanglan mahigugma ka sa mga tawo. (1 Tesalonica 2:6-8) Aron mahimong epektibo sa imong karera sa pagpayunir, hinunoa, nagkinahanglan kag maayong iskedyol. Busa, suknaa ang imong kaugalingon:

Ako ba Dunay Balanse nga Iskedyol?

Aron makapadayong malamposon sa bug-os panahong ministeryo, ang payunir kinahanglan organisado kaayo. Kon walay maayo personal nga iskedyol, ang pagpayunir makapahigawad. Hinoon, ang pagbaton ug iskedyol nga nagtugot sa paggahin ug ispesipikong gidaghanon sa panahon sa ministeryo sa kanataran dili lang mao ang nalangkit.

Ang payunir nagkinahanglag balanse nga iskedyol. Aduna ka bay iskedyol? Suknaa ang imong kaugalingon: Ako ba naggahin ug hustong gidaghanon sa panahon sa nagkalainlaing bahin sa ministeryo? Makaingon ba ako nga ako naningkamot taman sa mahimo sa pag-abot sa katawhan sa teritoryo? Ako ba naghimo sa gikinahanglang pagpasibo sa akong iskedyol aron makaduaw kon anaa sila sa balay? Naghimo ba akog epektibong mga pagbalik-duaw? Nag-ingon si Jesus: “Busa panglakaw ug maghimog mga tinun-an sa katawhan . . . magatudlo kanila.” (Mateo 28:19, 20) Ang pagwali ug pagpanudlo maoy hinungdanong mga bahin sa atong ministeryo. Kontento ka na ba sa pagpahalunag literatura, o ginabalikan ba nimo ang tanan nga nagpakitag interes, midawat man sila sa literatura sa Bibliya o wala? Sa mubo, gipahimuslan ba nimo ang imong panahon?

Ako ba Mauswagong Magtutudlo?

Kana maoy laing importante nga pangutana. Diha sa 2 Timoteo 4:2, misulat si Pablo: “Iwali ang pulong, magmadasigon niini sa maayo nga panahon, sa dili maayo nga panahon, . . . uban sa tanang pagkamapailobon ug arte sa pagpanudlo.” Aron makawali sa pulong, sa sulod o sa gawas sa kongregasyon, ang malamposong mga payunir naningkamot sa pagbaton ug sa pagpauswag sa arte sa pagpanudlo. Nganong si Pablo nagtawag sa pagpanudlo nga arte? Tungod kay ang pagpanudlo nagkinahanglag kabatid ug pagbansay.

Sa unsang paagi mapauswag nimo ang imong katakos ingon nga magtutudlo? Ang apostol Pablo nagtubag: “Palandonga kining mga butanga; magmapuliki niini, aron ang imong pag-uswag makita sa tanang mga tawo.” (1 Timoteo 4:15) Oo, ang mga payunir kinahanglan mogahin ug panahon sa personal nga pagtuon sa Bibliya, sa paghinuktuk, ug sa pagpalandong. Kini naglakip sa praktikal nga pagpadapat sa mga sugyot nga makaplagan diha sa mga publikasyon sama sa Nangatarongan Pinasukad sa Kasulatan, sa Atong Ministeryo sa Gingharian, ug sa Giya sa Tunghaan sa Teokratikanhong Ministeryo.a

Busa, aron molampos sa payunir nga ministeryo, hupti ang imong lig-on personal nga relasyon uban kang Jehova nga Diyos. Kini, sa baylo, motukmod kanimo sa pagbaton ug sa pagpasundayag sa lalom-pagkagamot nga gugma alang sa katawhan. Hinoon, sa pagpahayag niining maong gugma, dili lamang mahunahunaon ka sa gidaghanon sa panahon nga imong gamiton sa ministeryo, kondili buot usab nimo nga mahimong bililhon ang imong panahon. Sa unsang paagi? Pinaagi sa pakigbisog sa pag-abot sa mas daghang mga tawo kon mahimo uban sa mensahe sa Gingharian. Sa kataposan, padayong mauswagon ingon nga magtutudlo pinaagi sa pagkat-on sa nagkalainlaing paagi sa pagduol sa mga tawo diha sa ministeryo ug sa makugihong pagtuon sa Bibliya uban sa tumong sa pagpauswag sa imong arte sa pagpanudlo.

[Footnote]