Gipabilhan pag-ayo sa daghang tawo sa tibuok kalibotan ang Bibliya. Apan tingali gamay ra silag nahibaloan, kon duna man, bahin sa mga nasulat sa Bibliya. Tinuod kaayo kana sa minilyong taga-Asia, mao man sab sa daghang nasod diin kaylap ang Bibliya.

Pero, tingali mangutana ka, ‘Nganong kinahanglan man gyod nakong masabtan ang Bibliya?’ Kon masabtan nimo ang mensahe niining balaang basahon, matabangan ka nga:

• Mahimong kontento ug malipayon

• Masagubang ang mga problema sa pamilya

• Mabuntog ang mga kabalaka

• Makabaton ug maayong relasyon sa uban

• Magamit sa hustong paagi ang imong kuwarta

Pananglitan, tagda si Yoshiko nga taga-Japan. Nahibulong siya kon unsay naa sa Bibliya, busa gibasa niya kini. Unsay resulta? Matod niya, “Tungod sa Bibliya, may katuyoan na ang akong kinabuhi ug may paglaom na ko sa umaabot.” Siya midugang: “Wala na ko mobatig kahaw-ang.” Si Amit nga gihisgotan sa ibabaw, personal nga nagsusi sa Bibliya. Matod niya, “Bilib kaayo ko. Ang Bibliya dunay praktikal nga impormasyon para sa tanan.”

Dakog epekto ang Bibliya sa kinabuhi sa minilyong tawo. Palihog tun-i kini ug sayra kon sa unsang paagi ka makabenepisyo niini.

Way duhaduha nga karaan na kaayo ang Bibliya. Unsa ka karaan? Gisugdan kini pagsulat mga 3,500 ka tuig kanhi didto sa Middle East. Ingong pagtandi, panahon kadto sa gamhanang dinastiya nga Shang sa China, ug mga 10 ka siglo sa wala pa magsugod ang Budhismo sa India.—Tan-awa ang kahong “Impormasyon Bahin sa Bibliya.”

Aron ang usa ka basahon mapuslanon ug makagiya sa mga tawo, kinahanglang masabtan ni ug makatabang. Ingon niana ang Bibliya. Kini dunay makapalipayng tubag sa importante kaayong mga pangutana sa kinabuhi.

Pananglitan, nakapangutana ka na ba, ‘Nganong naglungtad man ta?’ Dugay na kaayong naglibog ang mga tawo bahin niana, ug hangtod pa gani karon. Pero, ang tubag niana mabasa sa unang duha ka kapitulo sa Genesis, ang unang basahon sa Bibliya. Didto, gihisgotan ang ‘sinugdanan’ binilyon ka katuigan kanhi dihang mitungha ang atong pisikal nga uniberso, apil ang mga galaksiya, kabituonan, ug ang yuta. (Genesis 1:1) Dayon, gihisgotan niini ang sunodsunod nga nahitabo aron mapuy-an ang yuta, kon giunsa pagtungha sa lainlaing matang sa kinabuhi, ug kon sa unsang paagi mitungha ang mga tawo—apil na ang katuyoan nianang tanan.

GISULAT ARON MASABTAN

Dunay praktikal nga tambag ang Bibliya aron tabangan tang masulbad ang mga problema kada adlaw. Sayon sabton kana nga tambag tungod sa duha ka rason.

Una, ang mensahe sa Bibliya klaro, direkta, ug makapadani. Imbes mogamit ug daghang ekspresyon nga makapalibog o misteryoso, gigamit diha sa Bibliya ang mga pulong nga klaro o daling mahanduraw. Ang lisod nga mga ideya gipahayag sa mga pulong nga komon sa atong kalihokan matag adlaw.

Pananglitan, migamit si Jesus ug daghang ilustrasyon nga simple ug binase sa inadlawng kasinatian sa mga tawo aron tudloan silag leksiyon nga makapatandog sa kasingkasing. Kadaghanan niana mabasa diha sa gitawag nga Wali sa Bukid, ug narekord sa basahon sa Mateo, sa kapitulo 5 ngadto sa 7. Gitawag kini sa usa ka komentarista nga “usa ka praktikal nga pakigpulong,” ug siya miingon nga ang tumong niini “maoy paggiya sa atong mga binuhatan, dili ang paghatag ug impormasyon.” Mabasa nimo kana nga mga kapitulo tingali sa 15 hangtod sa 20 minutos, ug imong makita nga ang gipamulong ni Jesus simple pero puwersado.

Ang lain pang rason kon nganong sayon sabton ang Bibliya mao ang unod niini. Dili ni basahon sa mitolohiya o mga sugilanon. Hinuon, sa kadaghanang bahin niini, sumala pa sa The World Book Encyclopedia, “naghisgot kini sa bantogan ug ordinaryo nga mga tawo” ug sa ilang “mga problema, paglaom, kapakyasan, ug kadaogan.” Dali ra natong bation ang mga kasinatian bahin sa tinuod nga mga tawo ug mga panghitabo ug masabtan ang importanteng mga leksiyon nga naa niini.—Roma 15:4.

MABASA SA TANAN

Aron masabtan nimo ang usa ka basahon, kinahanglang mabasa nimo ni sa imong pinulongan. Karon, mabasa na ang Bibliya sa pinulongan nga imong masabtan, bisan asa pa nga nasod ka nagpuyo. Tagda kon unsay nalangkit sa paghimo niini.

Paghubad. Sa orihinal, gisulat ang Bibliya sa Hebreohanon, Aramaiko, ug Grego, maong diyutay lang ang makabasa niini. Gipaningkamotan sa sinserong mga maghuhubad nga mabatonan kini sa ubang pinulongan. Tungod sa ilang paghago, ang katibuk-ang Bibliya o ang pipila ka bahin niini nahubad na sa mga 2,700 ka pinulongan. Nagpasabot ni nga kapig 90 porsiyento sa mga tawo karon ang makabasa na sa pipila ka bahin sa Bibliya diha sa ilang kaugalingong pinulongan.

Pag-imprenta. Sa orihinal, gisulat ang Bibliya diha sa mga materyales nga daling madaot, sama sa panit sa hayop ug papiro. Aron mapasa ang mensahe, kana nga mga sinulat manomanong gikopya. Kay mahal kadto nga mga kopya, diyutay lang ang makapalit. Pero dihang naimbento ni Gutenberg ang imprentahanan kapig 550 ka tuig kanhi, mipaspas ang pagkaylap sa Bibliya. Sumala sa banabana, kapig lima na ka bilyong Bibliya, sa katibuk-an o sa bahin niini, ang naapod-apod.

Kanay rason kon nganong way laing basahon sa relihiyon ang makatumbas sa Bibliya. Klaro nga ang Bibliya gisulat aron masabtan. Hinuon, usa ka hagit ang pagsabot niini, pero dunay tabang. Asa man? Ug sa unsang paagi ka makabenepisyo niini? Sayra sa sunod artikulo.

Handurawang misuroy ka sa laing nasod sa unang higayon. Makakita kag mga tawo, kultura, pagkaon, ug kuwarta nga dili pamilyar nimo. Normal lang nga mahibulong ka.

Lagmit ingon sab niana ang imong bation sa una nimong pagbasa sa Bibliya. Samtang magbasa niini, mobalik ka sa karaang panahon nga dili pamilyar nimo. Makahibalag kag mga tawo nga gitawag ug Filistehanon, makakita kag talagsaong mga kostumbre sama sa ‘paggisi sa mga besti,’ o makakat-on kag pagkaon nga gitawag ug mana ug sensilyo nga nailhang drakma. (Exodo 16:31; Josue 13:2; 2 Samuel 3:31; Lucas 15:9) Kining tanan tingali makapalibog. Sama sa pagsuroy sa laing nasod, seguradong malipay ka kon may motabang nimo, dili ba?

TABANG KANIADTO

Sukad sa unang pagsulat sa sagradong mga basahon niadtong ika-16 nga siglo B.C.E., may gitagana nang tabang aron masabtan kini sa mga tawo. Pananglitan, ang unang lider sa nasod sa Israel nga si Moises ‘nagpatin-aw’ sa mga nasulat.—Deuteronomio 1:5.

Mga 1,000 ka tuig sa ulahi, duna pa gihapoy kuwalipikadong mga magtutudlo sa Kasulatan. Niadtong 455 B.C.E., daghan kaayong Hudiyo ang nagtigom sa plasa sa siyudad sa Jerusalem, lakip na ang mga bata. Presente didto ang mga magtutudlo sa Bibliya nga ‘nagbasa sa makusog sa [mao ra nga sagradong] basahon.’ Apan dili kay kana ra. “Sila nagpadayon pagpasabot sa gibasa.”—Nehemias 8:1-8.

Paglabayg 500 ka tuig, si Jesu-Kristo nanudlo usab. Gani, nailhan gyod siya ingong magtutudlo. (Juan 13:13) Nanudlo siya sa daghang tawo ug sa mga indibiduwal. Sa usa ka higayon, atubangan sa dakong panon, nagpakigpulong si Jesus sa iyang iladong Wali sa Bukid, ug “ang mga panon sa katawhan nahingangha sa iyang paagi sa pagpanudlo.” (Mateo 5:1, 2; 7:28) Sa tingpamulak sa 33 C.E., si Jesus nakig-estorya sa duha niya ka tinun-an samtang sila naglakaw padulong sa usa ka balangay duol sa Jerusalem, ug “gibuksan sa bug-os [gipatin-aw pag-ayo ngadto kanila] ang mga Kasulatan.”—Lucas 24:13-15, 27, 32.

Magtutudlo sab sa Pulong sa Diyos ang mga tinun-an ni Jesus. Sa usa ka higayon, dihay opisyal sa Etiopia nga nagbasag asoy sa Kasulatan. Giduol siya sa tinun-ang si Felipe ug gipangutana: “Nakasabot ka ba gayod sa imong ginabasa?” Mitubag ang Etiopianhon: “Sa pagkatinuod, unsaon ko man pagkasabot, gawas kon adunay magtudlo kanako?” Dayon, gipatin-aw ni Felipe kaniya ang kahulogan sa asoy.—Buhat 8:27-35.

MABATONANG TABANG KARON

Sama sa mga magtutudlo sa Bibliya kaniadto, ang mga Saksi ni Jehova karon nanudlo usab sa mga tawo bahin sa Bibliya diha sa 239 ka kayutaan sa tibuok kalibotan. (Mateo 28:19, 20) Matag semana, kapin sa siyam ka milyong tawo ang ilang ginatabangan nga makasabot sa Bibliya. Kadaghanan sa ilang gitudloan dili mga Kristiyano. Kini nga pagtuon libre ug mahimong ipahigayon sa balay o sa ubang lokasyon. Ang uban gani nagtuon ug Bibliya pinaagig telepono, cellphone, o computer.

Alang sa detalye kon unsaon nga makabenepisyo niini nga kahikayan, palihog kontaka ang mga Saksi ni Jehova. Makita nimo nga ang Bibliya masabtan gayod ug “mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong,” aron ka “mahimong takos gayod, bug-os nga masinangkapan alang sa tanang maayong buhat.”—2 Timoteo 3:16, 17.