Nameligro ang Imong Bata!
Ang pag-among-among ug mga bata maoy mangil-ad nga kamatuoran niining masakitong kalibotan. Ang magasing Lear’s miingon: “Mas daghan kanato ang apektado niini kay sa kanser, mas daghan kanato kay sa sakit sa kasingkasing, mas daghan kanato kay sa AIDS.” Busa gibati sa Pagmata! nga obligasyon ang pagpasidaan sa mga magbabasa niini bahin sa kapeligrohan niini ug kon unsay mahimo labot niini.—Itandi ang Ezekiel 3:17-21; Roma 13:11-13.
SA KATUIGAN nga bag-o pa ang tibuok-kalibotang pagsibaw mitungha bahin sa pag-among-among ug mga bata. Apan ang pagtagad sa palaumagian sa balita, nga kompleto sa mga tawong inila nga nagbutyag sa publiko sa ilang mga kasinatian sa pagdagmal samtang bata pa, misangpot sa pila ka napopular sayop nga pagtuo. Ang pipila nagtuo nga kining tanang paghisgothisgot sa mga pagdagmal ug mga bata kinaulahian lamang nga uso. Hinuon, sa tinuoray, ang seksuwal nga pag-atake dili bag-o. Kini halos ingon ka karaan sa kasaysayan mismo sa tawo.
Usa ka Karaang Suliran
Mga 4,000 ka tuig kanhi, ang mga siyudad sa Sodoma ug Gomora nabantog tungod sa kahilayan. Lagmit ang pagkagustong makigsekso sa bata o pedophilia nahiapil sa daghang bisyo sa rehiyon. Ang Genesis 19:4 nagbatbat sa usa ka magubtanong panong nabuang sa sekso nga mga taga-Sodoma nga naggikan “sa batang lalaki ngadto sa tigulang nga lalaki” nga buot molugos sa duha ka lalaking bisita ni Lot. Palandonga: Ngano mang ang bata pang mga lalaki mahupngan sa hunahuna sa paglugos ug mga lalaki? Tin-aw nga napailaila na sila sa mga hiwing buhat sa homoseksuwal.
Kasiglohan sa ulahi, ang nasod sa Israel mibalhin sa rehiyon sa Canaan. Natuhop pag-ayo kining yutaa sa pag-unay, sodomiya, bestialidad, pagpamampam, ug bisan sa rituwal nga paghalad ug gagmayng mga bata ngadto sa demonyong mga diyosdiyos nga kining tanan nga daotang buhat kinahanglang idili sa tin-aw diha sa Moisesnong Kasugoan. (Levitico 18:6, 21-23; 19:29; Jeremias 32:35) Bisan pa sa balaang mga pasidaan, ang rebelyosong mga Israelinhon, apil ang pipila nila ka magmamando, misagop niining dulumtanang mga buhat.—Salmo 106:35-38.
Hinuon, ang karaang Gresya ug ang Roma daotan pa kaayo kay sa Israel kon bahin niini. Ang pagpatayg mga masuso maoy kasagaran sa duha ka nasod, ug sa Gresya maoy usa ka kaylap-dinawat nga batasan nga ang gulangong mga lalaki makigsekso sa mga batang lalaki. Ang mga balay sa kahilayan sa mga batang lalaki milambo sa matag siyudad sa karaang Gresya. Sa Romanhong Empiryo, ang pagpamampam sa bata kaylap kaayo nga ang linaing mga buhis ug mga pista opisyal gitukod ilabina alang sa maong patigayon. Sa mga hawanan sa dula, ang mga batang babaye gilugos ug gipugos nga mobuhat sa bestialidad. Ang susamang mga kapintasan maoy kaylap sa daghan pang ubang karaang nasod.
Komosta sa modernong panahon? Ang tawo ba sibilisado na kaayo nga dili na molungtad kanang makalilisang seksuwal nga mga buhat karong adlawa? Ang mga estudyante sa Bibliya dili makatuo nianang ideyaha. Sila nasayod gayod nga si apostol Pablo nagpaila sa atong panahon ingong “mga panahon nga lisod sagubangon.” Gihisgotan niya ang kaylap nga paghigugma-sa-kaugalingon, ang gugma sa kalingawan, ug ang pagkawala sa kinaiyanhong gugma sa pamilya nga milukop sa modernong katilingban ug midugang: “Ang mga tawong daotan ug mga impostor mosamot sa pagkadaotan.” (2 Timoteo 3:1-5, 13; Pinadayag 12:7-12) Ang pag-among-among sa bata, nga sagad kaayong gibuhat sa “mga tawong daotan ug mga impostor,” migrabe ba?
Usa ka Sulirang Dinalian
Ang mga pag-atake sa kabataan sagad giliminan sa pagkasekreto, sa hilabihan kaayo nga kana gitawag nga tingali mao ang labing wala ikataho sa mga krimen. Bisan pag mao, kanang maong mga krimen sa dayag misulbong sa mga dekadang bag-o pa. Sa Tinipong Bansa, ang usa ka surbi bahin sa ulohan gidumala sa Los Angeles Times. Nakaplagan niini nga 27 porsiento sa kababayen-an ug 16 porsiento sa kalalakin-an ang naamong-amongan sa sekso samtang bata pa. Bisan tuod makalilisang kaayo ang maong mga estadistika, ang ubang maampingong mga pagbanabana alang sa Tinipong Bansa maoy tag-as pa kaayo.
Sa Malaysia, ang mga taho mahitungod sa pag-among-among ug bata miupat ka pilo latas sa miaging napulo ka tuig. Sa Thailand, mga 75 porsiento sa kalalakin-an sa usa ka surbi miangkon nga nakigsekso uban sa mga batang pampam. Sa Alemanya, ang opisyales nagbanabana nga abot ug 300,000 ka bata ang giamong-amongan sa sekso kada tuig. Sumala sa Cape Times sa Habagatang Aprika, ang gidaghanon sa mga taho sa maong mga pag-atake misulbong ug 175 porsiento sa bag-o pang tulo ka tuig nga yugto. Sa Netherlands ug sa Canada, nakaplagan sa mga tigdukiduki nga duolag un-tersiya sa tanang babaye ang giamong-amongan sa pagkabata pa. Sa Pinlandiya, 18 porsiento sa mga batang babayeng nagtungha sa nuybe-grado (15 o 16 anyos) ug 7 porsiento sa mga batang lalaki mitaho nga may pakigsekso uban sa usa ka tawong labing menos lima ka tuig nga magulang nila.
Sa lainlaing mga nasod ang makapatugawng mga taho nanggula mahitungod sa relihiyosong mga kulto nga nag-among-among ug mga bata pinaagi sa sadistikong mga buhat seksuwal ug pagpaantos. Sa makadaghan, kadtong motaho nga sila mga biktima sa maong mga krimen gitratar uban sa pagkadili-makatuo, dili sa kaluoy.
Busa ang pag-among-among ug bata dili bag-o o talagsaon; kini dugay nang suliran nga maoy epidemya karong adlawa. Ang epekto niini mahimong makagun-ob sa balatian. Daghan nga nakalabang nag-antos sa dulot nga mga pagbati sa kawalay-pulos ug sa ubos nga pagtamod-sa-kaugalingon. Ang mga eksperto sa natad nagtala sa pila ka kasagarang epekto sa pag-unay diha sa mga batang babaye, sama sa paglayas, pag-abusar sa droga ug alkohol, depresyon, pagsulay sa paghikog, delingkuwensiya, pagkamahilayon, mga suliran sa pagkatulog, ug nadaot nga katakos sa pagkat-on. Ang layog-abot nga mga epekto mahimong maglakip sa dili-maayong mga kahanas sa pagkaginikanan, kabugnaw sa sekso, kawalay-pagsalig sa mga lalaki, pagkaminyo ngadto sa tawong gustong makigsekso ug bata, pagkatomboy, pagpamampam, ug pag-among-among sa bata mismo.
Kining maong mga sangpotanan dili kay dili-kalikayan sa usa ka biktima; ni may si bisan kinsa nga sa husto makapakamatarong sa daotang kagawian pinasukad lamang sa mga hinungdang giamong-amongan sa nangagi. Ang pag-among-among wala magtino daan sa dulnganan sa mga biktima niini ngadto sa pagkaimoral o pagkadelingkuwente; ni kana magwagtang sa ilang tanang personal nga tulubagon alang sa mga kapiliang himoon nila sa ulahi sa kinabuhi. Apan kining kasagarang mga sangpotanan alang sa mga biktima maoy tinuod nga mga kapeligrohan. Makadugang kini sa pagkadinalian sa pangutana, Sa unsang paagi mapanalipdan nato ang mga bata gikan sa pag-among-among?