Usa ka Kapeligrohan nga Angayng Kabalak-an sa Tanang Ginikanan
SI Heather ug Scott maoy bibo, malipayong magtiayon, nga dunay tres anyos nga batang lalaki nga himsog ug maukit-ukiton.a Ilang giatiman ug maayo ang ilang anak. Sa atong panahon karon, dili lalim ang pag-atiman ug anak kay daghang problema ug responsibilidad ang maatubang sa mga ginikanan. Daghan usab kaayong butang ang kinahanglang itudlo sa mga anak! Ang usa sa mga responsibilidad nga gustong himoon ni Heather ug Scott mao ang pagpanalipod sa ilang anak batok sa mga kapeligrohan sa seksuwal nga pag-abuso. Kay ngano man?
Si Heather miingon: “Ang akong amahan way puangod ug palahubog. Grabe kaayo siyang makabunal nako, ug kami sa akong mga manghod nga babaye iyang giamong-amongan.”b Ang kadaghanang tawo mouyon nga kini nga pag-abuso makahatag ug dakong kadaot sa emosyon. Dili ikatingala kon nganong porsigido gayod si Heather sa pagpanalipod sa iyang anak! Ingon usab niini ang gibati ni Scott.
Daghang ginikanan nabalaka bahin sa pag-abuso ug bata. Tingali nabalaka sab ka. Dili sama kang Heather ug Scott, tingali wala ka makaagi niini ug wala mag-antos sa mga epekto niini, apan sa walay duhaduha nakadungog kag mangilngig nga mga report nga daghan ang naghimo niining mangil-ad nga buhat. Sa tibuok kalibotan ang mahigugmaong mga ginikanan makurat gayod dihang mahibalo kon unsay nagakahitabo sa kabataan sa ilang lugar.
Dili ikahibulong kon nganong gitawag sa usa ka tigdukiduki bahin sa seksuwal nga pag-abuso ang kaylap nga pag-among-among ug mga bata ingong “usa sa labing makaguol nga kamatuoran sa atong panahon.” Tinuod nga makaguol gayod kana nga balita, apan makapahibulong ba kon nganong nagkadaghan ang tig-among-amongan ug bata? Dili kana makakurat alang sa mga estudyante sa Bibliya. Ang Pulong sa Diyos nag-ingon nga kita nagkinabuhi na sa magubot nga panahon nga gitawag ug “kataposang mga adlaw,” usa ka panahon nga daghan ang “mabangis” ug panggawi, diin ang mga tawo “magmahigugmaon sa ilang kaugalingon” ug “walay kinaiyanhong pagbati.”—2 Timoteo 3:1-5.
Ang seksuwal nga pag-abuso maoy usa ka dako kaayong problema. Sa pagkatinuod, ang ubang mga ginikanan matugaw gayod dihang maghunahuna sa tuman nga pagkadaotan sa mga tawo nga mamiktima ug bata. Apan, dako ba kaayo kini nga problema nga dili arang masulbad sa mga ginikanan? O may praktikal bang mga paagi nga mahimong himoon sa mga ginikanan agig pagpanalipod sa ilang mga anak? Kining mga pangutanaha tubagon sa sunod nga artikulo.
[Mga footnote]
a Ang mga ngalan niini nga serye sa mga artikulo giusab.
b Ang pag-among-among ug bata mahitabo kon gamiton sa usa ka hamtong ang bata sa pagtagbaw sa iyang gana sa sekso. Sagad nalangkit niini kanang gitawag sa Bibliya nga pakighilawas, o por·neiʹa, nga mahimong maglakip sa pag-ugay-ugay sa kinatawo, pagpakigsekso, ug pakigsekso pinaagi sa baba o sa lubot. Ang ubang seksuwal nga pag-abuso—sama sa pag-ugay-ugay sa suso, pag-agni sa pagpakigsekso, pagpakitag malaw-ayng mga hulagway ngadto sa usa ka bata, pagtan-awg mga tawong naghubo o nakigsekso, ug pagpakita sa pribadong mga bahin sa lawas—maklasipikar nianang gihukman sa Bibliya ingong “malaw-ayng panggawi” o “kahugawan uban ang kadalo.”—Galacia 5:19-21; Efeso 4:19.