Pagpasulod sa Sugo sa Diyos ‘Nganhi sa Atong Kahiladman’
1 Gitagna nga si Jesus maghupot sa sugo ni Jehova ‘sulod sa iyang kahiladman.’ (Sal. 40:8) Kini nagmatuod, ug nakatabang kana niya sa pagtuman sa kabubut-on sa iyang Amahan.
2 Ang iyang dinihogang mga tinun-an naghupot usab sa sugo ni Jehova ‘diha sa ilang mga hunahuna ug misulat sa ilang mga kasingkasing.’ (Heb. 8:10) Kini nagpaarang kanila sa pagmentinar sa maayong pamatasan ug pagpalampos sa ilang ministeryo. Sa unsang paagi ang tanan kanato makaseguro nga ang sugo ni Jehova masilsil sa atong mga hunahuna ug masulat sa atong mga kasingkasing?—Prov. 3:3.
PERSONAL NGA PAGTUON UG PANUKIDUKI
3 Ang personal nga pagtuon sa Pulong sa Diyos makatabang kanato sa paghimo sa kamatuoran nga atong kaugalingon. Ang pagtuon nagalangkit ug panukiduki ug pamalandong. Kini maoy pamalandong nga may katuyoan uban sa pagtagad gayod sa mga detalye. Kinahanglang disiplinahon ang atong kaugalingon aron adunay programa sa regular nga pagtuon nga magpaandam kanato alang sa tanan tang senemanang mga tigom.
4 Ang maayong mga batasan sa pagtuon magapalig-on sa atong paglaom. Oo, kita “mouswag ngadto sa kaluwasan.” (1 Ped. 2:2) Sa dihang atong makat-onan ang makapainteres nga mga butang gikan sa Kasulatan, buot tang mohisgot niana ngadto sa atong mga silingan. Ang atong kasibot sa pagsulti “sa pulong sa gingharian” mapalambo pinaagig pagpabili sa espirituwal nga mga butang nga nabatonan pinaagig maayong mga batasan sa pagtuon.—Mat. 13:19.
MGA TABANG SA PAGTUON
5 Ang kapunongan ni Jehova nagtagana kanato sa atong gikinahanglan aron makahupot ug ekselenteng kahibalo sa kamatuoran. Imo bang gigamit ug maayo ang 1930-1985 nga Index? Uban niining maayo kaayong instrumento ug sa lainlaing mga basahon nga karon mabatonan, pagkadakong bahandi sa tukmang kahibalo nga atong mahuptan! Dili sayloan mao ang mga librong Insight ug Pinadayag. Gigamit ba nimo kini nga epektibo?
6 Ang pagtagamtam ug dako gayod gikan sa personal nga pagtuon magdepende sa gidak-on sa atong panlimbasog. Tinoa kon kanus-a ug asa nimo makaplagi ang gikinahanglang kahilom ug kahilit alang sa pamalandong. Seguroang moampo alang sa panabang ni Jehova sa dili pa mosugod sa pagtuon. Aron makalihok nga maalamon niining makuyaw nga mga panahon, gikinahanglan tang ipadulot gayod ang Pulong sa Diyos sa atong mga kasingkasing ug mga hunahuna. (Prov. 7:1-3; Jos. 1:8) Gigamit ni Jehova ang iyang espiritu sa pagtanom sa iyang sugo ug mga pahinumdom diha sa atong mga kasingkasing. (Juan 14:26; 1 Cor. 2:10) Dili niya isalikway ang tim-os nga pangaliyupo sa panabang aron sa pagkaplag ug pagsabot sa mga bahandi sa iyang Pulong.—Prov. 2:1-6.
7 Gikinahanglan tang mahimong regular ug masubayon sa atong programa sa pagtuon aron ikapasulod ang sugo sa Diyos ‘nganhi sa atong kahiladman.’ Sa ingon atong maugmad ang mas dakong espirituwalidad, makahupot ug mas maayong pagsabot sa kamatuoran, mapauswag ang atong mga kahanas sa pagtabang sa uban nga makakat-on sa kamatuoran, ug makahupot kanunay sa mas malig-ong pagsubay sa “dalan sa kinabuhi.”—Sal. 16:11; Col. 2:7.