Magmaalamon—Ipadapat ang mga Butang nga Imong Makat-onan
1 Maoy tumong sa kadaghanang tawo nga magkinabuhing malipayon, malinawon. Linibo ka libro ug mga artikulo nagahatag ug tambag kon sa unsang paagi mabatonan ang malamposong kaminyoon, kon sa unsang paagi amomahon ang mga anak, ang paagi nga molampos sa pinansiyal, kon unsaon mabatonan ug mamentinar ang maayong panglawas, ug ubay-ubay pang ubang mga ulohan nga maylabot sa mga tawo nga makakab-ot ug kalipay. Bisan tuod ang pipila ka mapuslanong kaalam mahimong makaplagan diha sa kalibotanong mga basahon, ang kadaghanan sa mga tawo sa kalibotan dili malipayon ug malinawon. Nganong ingon niini?
2 Ang tubag makita sa Bibliya diha sa Proverbio 1:7, nga nagaingon: “Ang kahadlok kang Jehova mao ang sinugdanan sa kahibalo. Ang kaalam ug disiplina gitamay sa mga buangbuang.” Dili makadahom ang usa ka tawo sa paghupot ug kalinaw ug kalipay kon dili niya ilhon ug tahoron ang Tinubdan sa matuod nga kahibalo ug kaalam, si Jehova nga Diyos.
3 Ang kalibotan pordoy sa espirituwal—gutom kaayo. Nga masukwahion, kining makaguol nga kahimtang maoy hinimo-kaugalingon, sanglit kay ang kadagaya sa espirituwal nga pagkaon mabatonan man sa tanan sa tibuok yuta, ug walay bayad ang pagkaon niana. (Prov. 1:20, 21; Pin. 22:17) Tungod kay ang mga tawo sa kalibotan nagasalikway sa kaalam gikan kang Jehova, sila padayong nagasampiray diha sa espirituwal nga kangitngit. (Prov. 1:22-32) Sa laing bahin, ingong katawhan ni Jehova, nga nagatahod sa iyang mga balaod ug nagasunod sa iyang mga sugo, kita busog-kaayo sa espirituwal ug malipayon. (Isa. 65:13, 14) Usab, ang gugma nga dagaya diha sa organisasyon sa Diyos nagapaila kanato ingong matuod nga mga tinun-an ni Kristo. (Juan 13:35) Oo, ang tibuok-kalibotang panag-igsoonay sa mga Saksi ni Jehova maoy buhing pamatuod nga ang pagtapot sa mga pagtulon-an sa Bibliya maoy maalamong dalan nga pagasundon.
4 Sa gihapon, ang pipila nga nagapakig-anib sa kapunongan ni Jehova hayan wala makatagamtam sa kalipay nga ilaha unta. Basin gani sila sa di-maayo nakaapektar sa kalipay sa uban nga ilang gipakig-ubanan pinaagig mga butang nga ilang ginasulti ug ginabuhat. Sa unsang paagi maingon niini? Tungod kana gayod kay sila wala magpadapat sa kaalam sa Diyos diha sa ilang mga kinabuhi. Mahimong nagatambong sila sa mga miting sa kongregasyon, mga sirkitong asembliya, ug distritong mga kombensiyon. Basin sila nunot-panahon man kon unsa ang ginaingon diha sa mga basahon sa Sosyedad, apan ang ilang estilo-kinabuhi ug ang paagi sa ilang pakiglabot sa uban, apil ang mga isigka-Kristohanon, wala magabanaag sa kapadapatan sa kamatuoran sa ilang nakat-onan. Unsa ang kinahanglang pagabuhaton? Ang maong mga tawo kinahanglang mopunting maylabot sa “pagpugas uban sa panglantaw sa espiritu” aron mapatungha nila ang tinuod nga kalipay sa ila mismong mga kinabuhi ug makaamot ngadto sa kalipay niadtong anaa sa ilang palibot.—Gal. 6:7, 8.
KON UNSA ANG IPADAPAT
5 Kon kita sa tinagsatagsa mahimong luag, palugakan ang atong pagbantay, ug magpahaylo kang Satanas, sa kalibotan, o sa atong di-hingpit nga unod, kita mawad-an sa kangaya sa suod nga pakiglabot kang Jehova. Karon, nga mas pa sukadmasukad, gikinahanglan nga magmaigmat sa pagpadapat sa mga butang atong makat-onan diha sa atong mga tigom sa kongregasyon ug maingon man sa mga asembliya sama sa ubang mga tagana sa organisasyon. Ang kalibotan nga kita nagapuyo maoy makuyaw nga lugar nga kanunayng nagausab-usab. Kinahanglan kitang magmaalisto sa pagpadapat sa tambag nga mahigugmaong gitagana ni Jehova pinaagi sa “matinumanon ug maalamong ulipon,” nga nagaila niana ingong pagkaon sa hustong panahon.—Mat. 24:45-47.
6 Sa kinabag-ohang programa para sa atong espesyal adlawng asembliya, ang maayo kaayong impormasyon gitagana kon sa unsang paagi makabarog nga malig-on ingong usa ka panon. Ang mapuslanong mga sugyot gihatag kon unsaon sa pagbuntog sa makahuyang nga mga impluwensiya, sama sa makapaluya nga mga hitabo, ang kalibotanong espiritu sa independiyensiya, ug ang nagahurot-panahon nga mga kabaldahan. Kita ba nagapadapat sa maayong tambag sa bug-os nga pagsalig kang Jehova ug sa iyang mga dalan, sa pag-ila ug pagpasakop sa teokratikanhong awtoridad, sa pagkamapainubsanon ug pagkakasarangan, ug sa pagpahimulos sa angayng panahon alang sa teokratikanhong mga pangagpas? (Miq. 6:8; Efe. 5:15, 16; Heb. 6:10; 13:17) Ang mga membro ba sa pamilya nagatinabangay sa usag usa sa pagsunod sa Kristohanong pagkinabuhi? Ang atong pagpili sa lulinghayaw, atong mga batasan, ug atong adlaw-adlaw nga mga naandan kinahanglang apektado sa tambag nga atong nadawat gikan sa Kasulatan. Gawas kon aduna ing makugihong panlimbasog sa pagpadapat sa mga butang nga nakat-onan, diyutay ra o walay espirituwal nga progreso, ug ang atong kalinaw sa hunahuna ug kalipay sa di-maayo maapektahan.—Filip. 4:7-9; Sant. 1:22-25.
7 Ang tininuod nga paninguha sa personal ug pamilyahanong pagtuon gikinahanglan. Ang Watch Tower Publications Index makatultol man kanato ngadto sa detalyadong impormasyon bahin sa pagpadapat sa mga prinsipyo sa Bibliya. Ang Batan-on Nangutana nga libro maoy ekselenteng tabang alang sa mga ginikanan nga gamiton kana sa pagbulig sa ilang mga anak nga makabuntog sa karong komplikadong satanasnong kalibotan. Sa pagpunting sa maong materyal, atong mabatonan ang panghunahuna ni Jehova sa mga butang ug magiyahan pinaagig matarong nga mga prinsipyo. Ang dili pagbuhat niini maoy sama sa pagbaton ug medisina para sa sakit pero wala gayod motumar niana, bisan tuod atong nahibaloan nga kana magpaayo sa atong sakit. Ang regular nga pagtuon ug ang pagtuon sa banay magpalambo sa atong pagtuo ug mohatag kanato ug kusog sa paglahutay. Sa usa ka panahon sa pagsulay, ang atong pagtuo dili maluya, nga magpaagwanta kanato.—Mat. 13:6; Luc. 8:13; Heb. 2:1.
8 Ang mga ansiyano ug ministeryal nga mga alagad kinahanglang magpasunod ug panig-ingnan diha sa pagdumala sa ilang mga panimalay. Kini maglakip sa pag-abag sa ilang mga asawa ug mga anak sa pagpadapat sa mga butang nga ilang nakat-onan gikan sa Pulong sa Diyos ug sa organisasyon aron padayong malig-on sa espirituwal. Niining paagiha, ang pamilya sa katibuk-an mahimong sumbanan sa Kristohanong pagkinabuhi ug makahatag pagpalig-on alang sa uban sa sulod ug sa gawas sa kongregasyon.—Efe. 6:4; 1 Tim. 3:4, 12, 13.
KON KINSAY TABANGAN
9 Taliwala kanilang nagatambongan sa Memoryal sa matag tuig daghan ang nagakinahanglan ug dugang pagpalig-on aron ipadapat ang ilang nakat-onan ug sa aktibong pagpakig-uban sa organisasyon. Ikapakita ang mahigugmaong pagtagad ngadto sa atong mga estudyante sa Bibliya pinaagig pagtudlo kanila kon unsaon sa pagpadapat sa mga prinsipyo sa Bibliya sa ilang mga kinabuhi ug ang paagi sa pagtuman sa matarong nga mga sugo sa Diyos. Ato gayong ipasundayag ang kabalaka alang kanila nga nagamauswagon ngadto sa pagkahimong atong mga igsoong lalaki ug babaye diha sa pagtuo.
10 Ang bisan kinsa nga nahimong diregular o diaktibo kinahanglang pagabuligan sa pagsabot sa panginahanglan nga moambit sa regular nga buluhaton uban sa kapunongan. Gikinahanglan nilang mabatonan pag-usab ang kalinaw ug kalipay nga kanhi ilang gipahimuslan sa dihang sila mas bug-os nga nag-alagad kang Jehova. (Juan 13:17) Pinaagig maluloton nga pagtabang kanila nga mahaling pag-usab ang ilang pagpabili sa kamatuoran ug sa “pagtanyag ngadto sa Diyos ug halad sa pagdayeg,” sila makahimo man sa pagpadapat sa mga butang nga ilang makat-onan ug magpabilin diha sa dalan sa kinabuhi.—Heb. 13:15; tan-awang Atong Pag-alagad sa Gingharian, Agosto 1979, panid 3, ug Abril 1977, panid 3.
11 Ang tanang katawhan sa Diyos kinahanglang padayong monunot sa kusog-nagauswag nga organisasyon ni Jehova. Dili ta katugotan ang atong kaugalingon nga malingla sa pagkatagbaw-kaugalingon. Gikinahanglan ta nga kanunayng huptan ang atong espirituwalidad, nga padayong monunot sa kinaulahiang impormasyon nga gitagana pinaagig kapunongan sa Diyos ug paghimog andam nga pagpadapat niana. Kini nagakinahanglan ug makugihong panikaysikay ug may mga panahong duyogan sa personal nga sakripisyo. Apan si Jehova dili mopabuhat kanato sa dili ta maarangan sa pagbuhat. Siya ang atong Maglalalang, ug siya hibalo kon unsa ang labing maayo alang kanato. Busa pamatud-an ta ang atong kaugalingon nga maalamon pinaagig padayon nga natudloan ni Jehova ug sa pagpadapat sa mga butang atong makat-onan. Kini magpatunghag kadayegan ngadto kaniya ug moresulta diha sa walay kataposang kaayohan alang kanato.—Isa. 48:17; 54:13.