Pangutana

● Kinsa ang modumala sa mga pahibalo sa Tigom sa Pag-alagad?

Ang tumong niining bahina sa Tigom sa Pag-alagad mao ang pagpahibalo sa kongregasyon sa mga detalye nga importante nga matuman kana diha sa tinudlong ministeryo. Ang pipila sa mga pahibalo nagasilbing mga pahinumdom ug susama ra sa matag semana. Apan, ang tanang pahibalo kinahanglang isulti nga matin-aw. Walay isulti nga kasagaran lang o isipon ingong naandan.

Ang kahimtang sa pipila ka pahibalo mahimong nagakinahanglan nga kini ipresentar pinaagig usa ka ansiyano. Kon kini mao ang kahimtang, maoy responsabilidad sa nagadumalang magtatan-aw sa paghikay sa takos-kaayong igsoong lalaki nga ipresentar ang maong impormasyon, bisan tuod ang laing igsoong lalaki ang modumala sa ubang gieskedyol nga mga pahibalo.

Sa dihang ang usa ka sulat nga may impormasyon alang sa kongregasyon nagalakip ug ubang impormasyon nga gitumong ngadto sa mga ansiyano lamang, ang usa ka ansiyano mao ang mopresentar sa maong impormasyon. Ang ubang sulat sa Sosyedad nga may tinong direksiyon alang sa kongregasyon mahimong mas maayong basahon pinaagig takos nga ansiyano. Ang maong mga sulat basin maylabot sa espesyal nga pagsulat nga mga kampanya mahitungod sa atong mga igsoon nga nakaagom ug paglutos. Ang ubang mga sulat may detalyadong impormasyon bahin sa umaabot teokratikanhong mga buluhaton, sama sa mga duaw sa magtatan-aw sa sirkito, mga asembliya, o mga kombensiyon.

Adunay mga panahon nga ang usa ka importanteng pahibalo bahin sa kaayohan sa kongregasyon kinahanglang ibutyag, ug ang impormasyon kinahanglang ipresentar nga matin-aw. Ang maong mga pahibalo mas maayong himoon sa usa ka ansiyano.

Himoon man kana sa mga ansiyano o ministeryal nga mga alagad, ang mga pahibalo kinahanglang ibungat nga matin-aw ug minubo. Ang pagsunod niini nga mga giya magpaneguro sa hustong paglangkit sa mga instruksiyon ngadto sa kongregasyon aron ang tanan magalihok nga mauswagon diha sa panaghiusa.​—Sal. 133:1.