Pangutana

● Unsa man gayoy ibutang sa tabla-paskinan o ‘information board’ nga iya sa kongregasyon?

Ang tabla-paskinan diha sa Kingdom Hall nagataganag impormasyon maylabot sa mga kalihokan sa kongregasyon. Walay mga butang nga ipaskin dinha nga walay pag-uyon sa nagadumalang magtatan-aw.

Ang pipila sa mga butang nga ipaskin maglakip sa: Tigom sa Pag-alagad ug Teokratikanhong Ministeryong Tunghaan nga mga eskedyol ug mga asaynment, listahan sa mga pahayag publiko nga naeskedyol na, mga asaynment sa Miting Publikong tsirman ug tigbasa sa Bantayanang Torre, kahan-ayan ug dapit sa mga Pagtuon sa Basahon sa Kongregasyon, pahibalo sa sunod nga duaw sa magtatan-aw sa sirkito, impormasyon bahin sa umaabot nga asembliya o kombensiyon, ug ang eskedyol sa pagpanghinlo sa Kingdom Hall. May mga panahon nga ang Sosyedad modireher sa mga ansiyano nga ipaskin ang tinong mga sulat o ubang mga butang.

Bisan tuod ang mubong pahibalo bahin sa usa ka kasal nga naeskedyol nga himoon sa Kingdom Hall mahimong himoon sa usa sa mga tigom, ang pormal nga pahibalo sa kasal dili ipaskin sa ‘information board.’ Ni husto nga ipaskin ang mga pahibalo maylabot sa sosyal nga mga tigomtigom, kay kini wala may kalabotan sa mga buluhaton sa kongregasyon.

Ang tabla-paskinan kinahanglang mahinlo ug madanihon. Kini gayod may igong gidak-on aron makapasulod sa gikinahanglang mga butang nga gihisgotan dinhi. Ang miagi nang mga eskedyol ug mga butang pagakuhaon gilayon. Kon kapin sa usa ka kongregasyon ang nagatigom sa samang hawanan, ang matag kongregasyon kinahanglang adunay iyang kaugalingon separadong ‘information board’ o bahin niana. Among girekomendar nga ang nagadumalang magtatan-aw, o usa nga iyang gitudlo, mosusi sa pupanahon sa tabla-paskinan aron sa pagseguro nga ang mga butang nga gipaskin maoy kinabag-ohan, tukma, ug malinis.