Ang Pasiunang mga Pulong Makahimog Kalainan

¹ Gikaingon nga ang unang 30 segundos sa atong presentasyon diha sa pamalaybalay mao ang labing hinungdanon. Oo, ang atong pasiunang mga pulong makatino kon kita paminawon ba o dili. Sa panid 9 sa librong Nangatarongan, kini naghisgot sa duha ka hinungdanong butang nga gikinahanglang huptan ta sa hunahuna sa dihang ipaila nato ang kaugalingon. Mao kini: (1) Ang mensahe nga kita gisugo nga ipahayag mao “kining maayong balita sa gingharian,” nga nagpasabot nga kinahanglan nga kanunay tang maningkamot sa pagtabang sa katawhan nga makakita sa panginahanglan sa Gingharian ug mahinangop sa pagtagad niana. (2) Ang dalisay nga kabalaka sa kaayohan sa katawhan magaabag kanato sa pag-abot ug mga kasingkasing. Kini ikapakita pinaagig mainitong pahiyom ug mahigalaong pamatasan, pagkaandam nga maminaw sa dihang sila mosulti, ug pinaagig paggamit nato sa mga pangutana aron pagpukaw sa interes ug makasugod sa panaghisgot.

² Nagagamit ka ba sa pipila ka introduksiyon nga gisugyot sa librong Nangatarongan o kadtong gipakita sa ulahing mga gula sa Atong Ministeryo sa Gingharian? Daghang mga magmamantala mitaho ug dagkong kalamposan sa ilang balaybalay nga ministeryo pinaagig paggamit niining pasiunang mga pulong nga pulong-por-pulong ingon sa makita diha sa ilang pagkapatik. Ang uban nakakaplag nga pinaagig paggugol ug dugang diyutay nga panahon sa pagpangandam sa ministeryo sa kanataran, sila nakaarang sa paghan-ay sa pasiunang mga pulong sa ilang kaugalingong pinulongan apan pinasukad sa pamulong diha sa pinatik nga mga sugyot.

³ Usa ka butang ang tino, nga kon anaa na gayod sa imong hunahuna ang pasiunang mga pulong una pa moduol sa usa uban ang mensahe sa Gingharian, bation mong mas komportable ug mas masaligon. Ang imong ipanulti mopadayag sa imong tiunay nga tinguha sa pagpaambit sa maayong balita. Ang pagkaandam nimo pag-ayo makahimo sa imong ministeryo nga makalilipay tungod kay mabatonan mo ang mas maayong mga resulta. Labing hinungdanon pa mao nga mahatag nato ang atong kinamaayohan diha sa atong halad sa pag-alagad.​—Heb. 13:15; 1 Ped. 2:5.

⁴ Busa paggahin ug panahon nga makapangandam. Tagda ang matang sa katawhan nga lagmit imong ikahibalag sa imong lokal nga teritoryo. Unsa may ilang gikabalak-an ug talagdonon? Unsang mga panghitabo karon nga nakaapektar sa ilang mga kinabuhi? Human makapamalandong sa mga tubag niining mga pangutanaha, lantawa ang pasiunang mga pulong nga gisugyot sa mga panid 9-15 sa librong Nangatarongan o pagpilig usa o dugang pang pasiunang mga pulong gikan sa Atong Ministeryo sa Gingharian. Batiang gawasnon nga makausab o makapasibo sa tukmang pamulong aron nga mobati kang komportable niana. Ang sunod nga lakang mao ang pag-ensayo sa imong pasiunang mga pulong kauban sa ubang mga magmamantala diha sa usa ka praktis nga sesyon. Hayan kini makadasig sa uban nga makapauswag usab sa ilang pasiunang mga pulong. Sa bisan unsa man, kamo gayod magkadinasigay sa usag usa ug maglinig-onay ang usag-usa diha sa maayong mga buluhaton.

⁵ Ang panahon ug pagpanikaysikay nga imong nagugol sa pagpangandam sa imong mga presentasyon sa kanataran pagagantihan. Mahimong mapanalanginan ka nga makabaton ug labaw pang epektibong pakigbahin sa makapaukyab nga buluhatong pagpanigom nga nagapadayon karon.