Pagtanyag sa Pagpangita sa Katawhan sa Diyos
1 Daghan karon ang mibati nga ang relihiyon maoy usa ka pribado kaayo nga butang. Busa, ang pagpakigsulti sa atong mga silingan niining ulohana mahimong mahagiton. Apan karon aduna tay basahong Pagpangita sa Katawhan sa Diyos, nga makabulig nato sa pag-abot sa mga tawo diha sa nagakadaiyang relihiyosong mga kagikan. Magatanyag ta niini diha sa kanataran sa Nobyembre.
2 Unsa may imong isulti aron pagpukaw sa interes sa tagbalay sa pagbasa sa libro? Ang mosunod nga mga sugyot makabulig nato sa pagpakita sa atong mga silingan sa panginahanglan nga “mangita kang Jehova.”—Isa. 55:6.
3 Nganong Susihon Kon Unsay Atong Isulti?: Sanglit daghan man ang tagbaw na sa ilang relihiyon ug dili interesado nga mobalhin, hayan gikinahanglan natong ipahiuyon ang atong pasiuna sa pagbulig sa tagbalay nga mosusi uban ang bukas nga hunahuna sa atong isulti.
4 Human sa tukmang pagtimbaya, makaingon ka:
◼ “Sa among pagpakigsulti sa mga silingan, nakaplagan namong daghang tawo ang tagbaw na sa ilang relihiyon ug dili buot nga mobalhin. Apan kon ang mga tawo maggahin ug panahon sa pagsusi sa mga pagtulon-an sa uban, gihunahuna ba nimong motultol kini sa maarang-arang nga pagsinabtanay ug diyutay rang kayugot sa kalibotan? [Tugoting motubag ang tagbalay.] Matikdi ang giingon sa Bibliya mahitungod niadtong kinsa nahigugma sa Diyos ug kon sa unsang paagi sila kinahanglang mobati sa uban.” Human mabasa ang Buhat 17:26, 27, dad-ang pagtagad ngadto sa mga parapo 15 ug 16 sa panid 10 sa librong Pagpangita sa Katawhan sa Diyos.
5 Daghan ang nakakaplag nga ang pagpakli sa usa ka kapitulo diha sa libro nga nagahisgot sa relihiyon sa tagbalay makabutad sa iyang pagtagad. Matikdi kon unsaon kini paghimo.
6 Human ikapailang kaugalingon, makaingon ka:
◼ “Uban sa daghan kaayong relihiyon karon, nahibulong ka ba kon unsaon ta pagseguro nga ang atong relihiyon mauyonan sa Diyos?” Human nga mokomento ang tagbalay, tultoli ang iyang pagtagad ngadto sa kahon sa panid 377 sa librong Pagpangita sa Katawhan sa Diyos, nga nagapakita sa napulo ka paagi sa pag-ila sa matuod nga relihiyon, nga nagamatikod ilabina sa punto numero 7. Suknaang tagbalay kon siya mouyon ba nga ang usang nagabuhat sa matuod nga relihiyon kinahanglang mobati nianang paagiha bahin sa ubang mga rasa ug nasyonalidad. Tan-awang gisitar nga mga kasulatan.
7 Ubang Makabulig nga mga Bahin: Ang indise sa mga ulohan sa luyo sa libro magamit usab. Pananglitan, kon daghan ang mibati nga ang tanang mga relihiyon managsama, tan-awa ang ubos sa ulohang “Relihiyon” ug ang sub-ulohang “‘tanang relihiyon managsama’: 12.” Ang lima nga “Mga Pangutana nga Nangayog Tubag” diha sa mga panid 17-18 hayan ilabinang makapainteres niadtong nagapangutana kon ang Bibliya nagatudlo ba kon unsay giwali sa kadaghanang mga relihiyon.
8 Pinaagig epektibong paggamit sa mga pagbalhin (transitions) ngadto sa libro, basin mabuligan ta ang katawhan nga atong gikaestorya sa pagpangita sa usa nga matuod nga Diyos, si Jehova.