Pagkinabuhi Uban sa Kahapsay sa Hunahuna ug Pagkamatarong
1 Kita nagakinabuhi sa usa ka kalibotan nga may kusganong impluwensiya ngadto sa pagkadi-diyosnon. Ang mga suntoan niining sistemaha nagapadayon sa pagkadaot. (2 Tim. 3:3) Ingong mga Kristohanon, kinahanglan tang mobarog kon unsa ang matarong ug makasabot kon nganong kinahanglang padayon tang buhaton kana. Apan unsa mang direksiyon ug paggiya ang mabatonan? Unsa mang mga suntoana ang kinahanglan tang sundon? “Pagkinabuhi Uban sa Kahapsay sa Hunahuna ug Pagkamatarong” mao ang makapadasig nga tema nga gipili alang sa programa sa atong espesyal nga adlaw nga asembliya sa 1993.—Tito 2:12.
2 Pinaagig mga pakigpulong, mga pasundayag, mga kasinatian, atong makat-onan kon unsaon nato paglig-on ang atong kaugalingon aron makasukol sa pagkadi-diyosnon ug pagwagtang sa kalibotanong mga pangibog. Makita usab nato kon sa unsang paagi nga posible ang pagkinabuhi uban ang kahapsay sa hunahuna ug pagkamatarong taliwala niining daotang sistema. Ang mga tagana sa pagbulig kanato nga mapanalipdan ang atong mga gahom sa panghunahuna igapakita. (1 Ped. 4:7) Ang mga ginikanan ug mga batan-on ilabina gayong buot mohatag ug pagtagad sa mga pakigpulong ug mga interbiyu sa programa sa hapon. Kini magapasiugda sa panginahanglan sa pagbatog diyosnong kaalam ug kasinatian ug sa duyog nga pagbuhat aron tukoron ang usa ka malipayong teokratikanhong kaugmaon.
3 Bisan pa nga gilibotan sa usa ka di-diyosnon nga kalibotan, ang Pulong sa Diyos nagatudlo kanato sa labing maayong paagi nga sundon. Ang mga benepisyo sa pagsugot sa tambag sa Bibliya ipatugbaw diha sa pakigpulong “Mahala ang Imong mga Panalangin Taliwala sa Masub-anong Kalibotan.” Samtang mangandam ta sa pagtambong, buot tang huptan sa hunahuna nga ang paghatag ug suod nga pagtagad sa programa ug pagpadapat sa tambag makapaarang nato nga mahimong mas epektibo diha sa atong pag-alagad kang Jehova.—Filip. 3:15, 16.