Ang Imong Pagpabili sa Kamatayon ni Kristo
1 Walay laing tawo nga nabuhi sukad ang makahimo kon unsay nabuhat ni Kristo Jesus alang sa katawhan. (Mat. 20:28) Pinaagi sa kurso sa iyang kinabuhi ug iyang kamatayon, nabatonan ta ang kahigayonan nga makadawat sa labing dakong gasa nga madawat ni bisan kinsa, ang walay kataposang kinabuhi. Bisan pa niana, ang kadaghanang tawo may diyutayng pagpabili kon unsay nabuhat ni Kristo.
2 Tagda ang panagtagbo ni Jesus uban sa napulo ka sanlahon. Bisan tuod nga ang tanang napulo giayo ni Jesus, usa lamang ang mibalik aron pagpasalamat. Ang ubang siyam? Sila mipadayon sa ilang dalan nga walay paghunahuna sa pagpasalamat sa ilang magtatabang. (Luc. 17:15-17) Kang kinsa kita mahisama? Gusto natong mahisama sa tawo nga nagpakitag tinuod nga pagpabili.
3 Pagpakita sa Atong Pagpabili: Sa kada tuig ang Sosyedad nagasugyot nga ang tinong mga bersikulo sa Bibliya pagabasahon sa semana sa Memoryal. Kini makaplagan sa atong kalendaryo ubos sa mga petsa sa Abril 1-6 ug usab ubos sa Mga Pahibalo niini nga Atong Ministeryo sa Gingharian. Ikapakita ta ang atong pagpabili pinaagig pagbasa ug pagpamalandong niining mga bersikuloha.
4 Ang atong pag-alagad sa kanataran nalangkit sa pagpabili alang sa Memoryal. Sagad kini maoy bulan sa dihang linibo ang makig-ambit sa pag-oksilyare payunir. Sa miaging Abril 17,009 ang misalmot dinhi sa Pilipinas. Makabuhat ka ba niana karong Abril? Kon dili ka makaarang sa pagpayunir, planoha nga makapauswag sa imong pakigbahin sa pagsangyaw nga kalihokan segon sa itugot sa mga kahimtang.
5 Tukora ang Pagpabili Diha sa Uban: Sa kada tuig sa Memoryal, daghang interesadong tawo ang atong gikahimamat. Pananglitan, sa 360,297 nga mitambong sa Memoryal sa miaging tuig, kapin sa 245,000 ang interesadong mga tawo.
6 Sa paggamit sa pinatik sa Sosyedad nga mga imbitasyon, buligi ang mga interesado sa pagsabot kon nganong gihikay ang Memoryal, kinsa ang moambit sa mga emblema, ug unsa ang gihawasan sa mga emblema. (1 Cor. 11:23-26) Usab, isaysay ang paglaom niadtong makig-ambit ug nianang mga tigpaniid nga dili makig-ambit. (Juan 10:16; Pin. 14:3, 4) Kini makatabang nila sa pagsabot nga ang tanan nanginahanglang ‘magabatog pagtuo’ ug ang pagtambong lamang sa Memoryal makausa sa usa ka tuig dili pa igo.—Juan 3:16.
7 Ang Memoryal sa kamatayon ni Kristo maoy usa ka espesyal kaayong hitabo. Pinaagig bug-os nga pagpangandam alang niana, kita nagapakita nga tinuod tang nagapabili sa tanang nahimo ni Jehova ug ni Kristo alang kanato.