Unsay Atong Palamposon Sulod Niining Tuiga sa Pag-alagad?
1 Samtang nagasulod kita sa 1994 nga tuig sa pag-alagad, maoy tukmang panahon karon alang kanatong tanan ingong katawhan ni Jehova sa pagbutang nga tin-aw sa atong mga hunahuna kon unsay buot natong palamposon ingong mga indibiduwal ug ingong usa ka organisasyon sulod niining bag-ong tuig sa pag-alagad.
2 Padayong Mouswag sa Espirituwal: Kon kita bag-ong nakig-uban sa kamatuoran, angay kitang magtinguha nga magmalig-on sa pagtuo. (Heb. 6:1-3) Kon kita malig-on na sa espirituwal, dili lamang kay tabangan nato ang mga bag-ohan ug ang uban apan kinahanglang tagdon usab nato ang atong kaugalingong espirituwalidad, dili gayod mobating ania na kanato ang tanang gikinahanglang kahibalo sa Bibliya ug kasinatian sa Kristohanong pagkinabuhi. Ginatagad ba nato ang inadlaw nga teksto, naganunot sa programa sa pagbasa sa Bibliya nga gihan-ay diha sa Theocratic Ministry School Schedule, ug mangandam alang sa Pagtuon sa Libro sa Kongregasyon ug Pagtuon sa Bantayanang Torre? Kana angay nga sa labing menos mahimong tumong alang natong tanan. Kinahanglang padayon kita nga mouswag sa espirituwal kon kita buot nga molabang-buhi sa kalaglagan niining daotang sistema sa mga butang ug maluwas ngadto sa bag-ong kalibotan sa Diyos—Itanding Filipos 3:12-16.
3 Pabiling Hinlo sa Espirituwal: Aron nga bug-os dalawaton atubangan kang Jehova, kinahanglang mahinloan ta sa “tanang kahugawan sa unod ug espiritu.” (2 Cor. 7:1) Sa dihang kita nahinloan na, nganong buot pa man kitang ‘molunang sa lapok’ niining daotan daang kalibotan? (Itanding 2 Pedro 2:22.) Kinahanglang determinado ta sa pagpabiling lig-on sa espirituwal ug mahinlo. Unya dili kita maignorante sa daotang mga desinyo ni Satanas ug dili malingla, nga mahulog sa sala ug mahilayo gikan sa pabor ni Jehova—2 Cor. 2:11.
4 Paminawa ang Maalamong Tambag: Ang Proverbio 15:22 nagapunting: “Diha sa daghang magtatambag adunay kalamposan.” Bisan pa niana, hinumdomi, nga ang tawong nagsulti nianang mga pulonga, si Solomon, sa ulahi nagtugot sa ‘iyang mga asawa sa pagpasimang sa iyang kasingkasing sa pagsunod sa laing mga diyos’ tungod kay napakyas siya sa pagpaminaw sa maalamong tambag bahin sa dili pagkuhag langyawng mga asawa. (1 Hari 11:1-4) Busa kon sa personal dili kita maminaw sa maalamong tambag, unsaon man nato pagdahom nga mahimong epektibo sa pag-alagad kang Jehova o pagpahilunag panig-ingnan nga takos pagasundon? (1 Tim. 4:15) Ang tambag sa Bibliya mobulig kanato sa pag-amping sa atong kasingkasing. (Prov. 4:23) Ang paghigugma kon unsay gihigugma ni Jehova, pagdumot kon unsay iyang gidumtan, padayong magapangita sa iyang pagtultol ug pagbuhat sa makapahimuot kaniya maoy usa ka seguradong panalipod.—Prov. 8:13; Juan 8:29; Heb. 1:9.
5 Ang atong pagsimba kang Jehova dili lamang kay usa ka dagway sa diyosnong debosyon sama nianang sa nag-angkong mga Kristohanon sa kalibotan, apan maoy malagsik, aktibo, ug buhi sumala sa kamatuoran nga makaplagan sa Pulong sa Diyos.—Juan 4:23, 24.
6 Ang atong determinasyon sa pagbuhat sa kabubut-on sa Diyos mahimong hagiton sa matag adlaw. Angay nga kita magmalig-on pinaagig kahibalo nga si Jehova mao ang magapalig-on kanato. (1 Ped. 5:9, 10) Niana makahimo kita sa bug-os nga pagtuman sa atong ministeryo sulod sa 1994 nga tuig sa pag-alagad.—2 Tim. 4:5.