Daghan ang Ginahatag—Daghan ang Pugsanong Ginapangayo
1 Pagkapinaboran nato nga nakabaton sa kamatuoran! Tungod sa atong pagpahinungod kang Jehova, kita gikapiyalan sa maayong balita. (1 Tes. 2:4) Kini nagabutang kanato ilalom sa mas dakong kaakohan. Si Jesus miingon: “Ang matag usa nga gihatagan ug daghan, daghan usab ang pugsanong pangayoon kaniya.”—Luc. 12:48b.
2 Pagkatinuod nianang mga pulonga! Ingong napanalanginan uban sa kahibalo sa Pulong sa Diyos, sa usa ka kahibulongang panag-igsoonay, ug sa usa ka katingalahang paglaom, daghan gayod ang ginahatag kanato. Sa pagkamakataronganon, daghan usab ang gidahom nga balos.
3 Hupti ang Tukmang Panglantaw sa mga Kinahanglanon: Ang pipila naghinapos nga sobra ra kaayo ang gidahom kanato. Ingong Ulo sa Kristohanong kongregasyon, si Jesu-Kristo nagatino “kon unsa ang gikinahanglan aron tukma kanang mapalihok. (Efe. 4;15, 16) Siya nagapasalig kanato nga ang ‘iyang yugo maluloton ug gaan ang iyang luwan.’ (Mat. 11:28-30) Siya mahigugmaong nagapahanugot niadtong adunay mga limitasyon. (Luc. 21:1-4) Kon atong ihatag ang atong kinamaayohan, walay-sapayan sa gidak-on, kita mapanalanginan.—Col. 3:23, 24.
4 Suknaa ang imong kaugalingon, ‘Ang intereses ba sa Gingharian maoy una sa akong kinabuhi? Gigamit ba nako ang akong panahon ug mga butang sa pagdayeg sa ngalan sa Diyos ug nagabenepisyo sa uban? Gibatonan ba nako ang labing dakong kalipay gikan sa pag-alagad kang Jehova inay kay sa pagkalipay sa materyal nga mga butang?’ Ang atong matinud-anong mga tubag niining mga pangutanaha magapadayag sa mga motibo sa atong kasingkasing.—Luc. 6:45.
5 Likaye nga Matintal sa Pagbuhat sa Daotan: Wala pa gayod sukad nga adunay samang mga pagpit-os ngadto sa kinaugalingong-interes, kahakog, ug gugma sa unodnong kalipayan. Matag adlaw giatubang nato ang mga tentasyon sa pagkompromiso. Aron masagubang kini nga malamposon, kinahanglang hangyoon nato si Jehova sa pagtabang kanato. (Mat. 26:41) Pinaagi sa iyang espiritu, siya maghimo kanatong kusganon. (Isa. 40:29) Ang pagdisiplina-sa-kaugalingon ug pagpugong-sa-kaugalingon nagadula usab ug dakong bahin.—1 Cor. 9:27.
6 Dili pa igo ang paghigugma sa maayo, apan kinahanglang dumtan usab nato ang daotan. (Sal. 97:10) Ang Proverbio 6:16-19 nagalista sa pito ka butang nga ginadumtan ni Jehova. Dayag nga ang usa nga buot nga magpahimuot kang Jehova kinahanglang magdumot usab nianang mga butanga.
7 Maoy tukma ang pag-ampo alang sa mga sirkumstansiya nga magtugot kanunay kanato sa pagbaton ug “daghang buhaton diha sa buluhaton sa Ginoo.” (1 Cor. 15:58) Daghan ang nakakaplag nga ang usa ka puliking eskedyol diha sa pag-alagad kang Jehova maoy usa ka panalipod tungod kay kini nagatugot ug diyutayng panahon sa pagpangagpas sa walay-kapuslanang mga butang.
8 Nga nagtagad na sa tanang butang, ang gikinahanglan kanato ni Jehova makataronganon gayod. (Miq. 6:8) Busa kanunay kitang “nagahago ug nagapanlimbasog sa atong kaugalingon,” nga masaligon nga ang atong ganti maoy sa walay-kinutoban mas dako kay sa bisan unsang ginapangayo gayod kanato.—1 Tim. 4:10.