Sa Unsang Paagi Akong Mapapaminaw ang Tagbalay?

¹ Sa siyudad sa Filipos, “usa ka babaye nga ginganlag Lydia, usa ka tigbaligyag purpura, . . . nga namati, ug gibuksan pag-ayo ni Jehova ang iyang kasingkasing aron motagad sa mga butang nga gipamulong ni Pablo.” (Buh. 16:14) Unsa ang gitudlo niining hitaboa kanato? Ang pagpaminaw mao ang motultol sa usa sa pagkat-on sa kamatuoran. Ang atong kalamposan sa pagpaambit sa mensahe sa Gingharian nagaagad una sa tanan sa pagkaandam sa tagbalay sa pagpaminaw. Sa dihang ato na silang mapapaminaw, dili na lisod ang pagpresentar sa atong mensahe. Apan ang pagpapaminaw sa usa mahimong usa ka hagit. Unsay atong mahimo?

² Sa dili pa makig-ambit sa pag-alagad, kinahanglan natong hatagan ug pagtagad ang atong panagway ug ang atong mga himan nga gamiton. Ngano? Ang katawhan mas mahilig sa pagpaminaw sa usa kinsa nagapasundayag sa iyang kaugalingon uban ang kaligdong. Kita ba nagasinina nga maayo apan kasarangan? Bisan tuod ang pagpasagad sa sinina tingali ilado sa kalibotan, atong likayan ang maong pagpasagad tungod kay kita mga ministro nga naghawas sa Gingharian sa Diyos. Ang atong hinlo ug hapsay nga panagway nagadugang sa paborableng pagpamatuod sa mensahe sa Gingharian nga atong ginasangyaw.

³ Magmahigalaon ug Magmatinahoron: Bisan pa niining nagakausab nga mga tinamdan karong adlawa, daghang tawo ang may pagtahod gihapon sa Bibliya ug mosanong nga paborable ngadto sa usa ka matinahoron ug mahigalaon nga panaghisgot bahin sa kon unsa ang anaa sa Bibliya. Ang usa ka mainiton, tiunay nga pahiyom makapakalma sa tagbalay ug magabukas sa agianan alang sa usa ka maanindot nga panaghisgot. Ang atong matinuoron ug maayong mga batasan kinahanglang mabanaag usab diha sa atong sinultihan ug panggawi, nga nagalakip sa atong pagpaminaw nga matinahoron sa mga pagpaniid sa tagbalay.

⁴ Ang atong tuyo mao ang pagpaambit sa paglaom sa Bibliya ngadto sa uban. Nagahupot niini sa hunahuna, kinahanglan natong tinoon nga ang atong panaghisgot maoy madanihon, dili masupakon o mahagiton. Walay panginahanglang usikan ang panahon sa panaglantugi uban sa usa ka tawo kinsa masupakon gayod. (2 Tim. 2:23-25) Kita makapili gikan sa dakong pagkadaiya sa makapadasig ug tukma-sa-panahong mga presentasyon nga gitagana alang kanato diha sa Atong Ministeryo sa Gingharian ug sa librong Nangatarongan. Siyempre, kinahanglan nato kining andamon pag-ayo aron kita makasulti diha sa mainiton ug madanihong paagi.​—1 Ped. 3:15.

⁵ Human sa atong pagduaw, pipila sa mga tagbalay ang arang makahinumdom nga tukma kon unsa ang atong gisulti. Apan, halos tanan gayod kanila ang makahinumdom sa paagi nga kana gikasulti. Kinahanglang dili nato pakamenoson ang gahom sa pagkamaayo ug kalulot. Tino nga adunay daghan karnerohong mga tawo sa atong teritoryo kinsa mahinangop sa pagpaminaw sa kamatuoran sama gayod sa gihimo ni Lydia niadtong unang siglo. Ang paghatag ug maampingong pagtagad sa atong panagway ug paagi sa sinultihan makadasig sa mga sinsero sa pagpaminaw sa Pulong sa Diyos ug mauyonong modawat niana.​—Mar. 4:20.