Dayega si Jehova sa “Tibuok Adlaw”
1 Si Haring David miingon sa Salmo 145:2: “Sa tibuok adlaw pagadayegon ko ikaw, ug magadayeg ako sa imong ngalan sa panahong walay katinoan, bisan sa walay kataposan.” Unsaon nato sa pag-awat ang panig-ingnan ni David sa pagdayeg kang Jehova sa “tibuok adlaw”?
2 Pun-on ang Atong mga Kasingkasing Pinaagig Pagpabili Kang Jehova: Ang regular nga pagtuon sa Pulong sa Diyos nagapalalom sa atong pagpasalamat sa kon unsay nahimo ni Jehova ug pagahimoon pa alang kanato. Samtang motubo kita sa pagpabili, kita matugob bahin sa iyang pagkamaayo. (Sal. 145:7) Kita mahinamong magadayeg kang Jehova matag adlaw.
3 Dayega si Jehova sa Adlaw-Adlawng Panaghisgot: Sa dihang makigsulti uban sa mga silingan, mga eskulmet, mga kauban sa trabaho, ug uban pang makontak nato sa adlaw-adlaw, hayan atong makaplagan ang mga kahigayonan sa pagpaambit sa atong paglaom uban kanila. Ang usa ka silingan tingali mabalaka bahin sa krimen diha sa katilingban; ang usa ka eskulmet tingali mabalaka bahin sa pag-abuso sa droga o imoralidad; ang usa ka kauban sa trabaho tingali mosultig usa ka opinyon bahin sa pipila ka isyu sa politika. Mahimong ikapunting nato ngadto sa Pulong sa Diyos sa pagpakita sa tukmang dalan nga batonan karon ug sa dumalayong sulbad alang nianang mga problemaha. Ang maong mga pulong nga isulti sa “tukmang panahon” mahimong usa ka panalangin!—Prov. 15:23.
4 Sulti Bahin Kang Jehova sa Bug-os Panahon: Ang tawo nga dunay halawom nga pagpabili kang Jehova buot nga mopaambit sa maayong balita ngadto sa daghang uban pa nga maarangan. (Sal. 40:8-10) Busa kinahanglang atong pangutan-on ang atong kaugalingon, ‘Ako bang gihimo ang tanan nga gitugot sa akong mga sirkumstansiya?’ Daghan ang nakakaplag nga uban sa pipila ka kausaban, sila nakaarang sa pagregular payunir. Kon ang atong mga kahimtang dili motugot niana, kita ba makatala ingong katabang nga mga payunir? Sanglit ang panahon sa Memoryal maoy panahon alang sa pagpalapad sa kalihokan, ang mga bulan sa Marso, Abril, ug Mayo maoy maayong panahon sa pagkahimong katabang payunir.
5 Tabangi ang mga Bag-ohan nga Moduyog Kanato sa Pagdayeg Kang Jehova: Ang pagsaulog sa Memoryal sa kamatayon ni Jesus kanunayng nagapahinumdom kanato sa mga katarongan nga dayegon si Jehova. Kini maoy usa ka maayong panahon sa pagdasig sa atong mga estudyante sa Bibliya sa pagduyog kanato sa publikong pagmantala bahin sa pagkahari ni Jehova. Awhaga sila sa pagbanaag kon unsay giingon sa mga parapo 7-9 sa mga panid 173-5 sa Kahibalo nga libro. Kon sila kuwalipikado, kinahanglang kay kulang sila sa kasinatian. Kon sila makigbisog nga magmaisog sa pagsangyaw, sila mahimong masaligon nga ang tabang igahatag kanila pinaagig takos nga mga magmamantala ug pinaagi ni Jehova.—Buh. 4:31; 1 Tes. 2:2.
6 Atong mahatagan ug dumalayong mga kaayohan ang atong mga kaugalingon maingon man usab ang uban sa dihang tinguhaon nato ang pagdayeg kang Jehova sa tibuok adlaw.