Tabangi Sila nga Makasabot
1 Daghang nagabati nga ang basahong Pinadayag maoy “lisod sabton.” (2 Ped. 3:16) Bisan pa niana, ang kahulogan niini gihimong matin-aw diha sa Pinadayag nga libro. Sa unsang paagi atong matabangan ang mga interesado nga makagamit sa labing maayo niana?
2 Kon imong nahisgotan ang Pinadayag 1:3 sa imong unang pagduaw, kining panghunahunaa hayan makapukaw ug dugang interes:
◼ “Sa miagi atong nahisgotan kon sa unsang paagi ang pagsabot sa basahong Pinadayag makapatunghag kalipay. Apan, sa pagkab-ot nianang maong kalipay gikinahanglan natong magtuon sa Bibliya, ug ato gayong ipadapat kon unsa ang atong natun-an.” Basaha ug komentohi ang Santiago 1:25. Paklia ang parapo 9 sa panid 8, ug ipakita kon sa unsang paagi ang pagsabot sa basahong Pinadayag makatabang kanatong makab-ot ang kalipay.
3 Kon imong nahisgotan ang Juan 17:3 sa imong unang pagduaw, mahimong imong ipasiugda ang panginahanglan sa pagkuhag dugang kahibalo sa Bibliya pinaagi sa pag-ingon:
◼ “Sa miagi nakong pag-anhi, atong gibasa ang Juan 17:3 nga ang pagkuhag kahibalo bahin sa Diyos makatultol ngadto sa kinabuhing dayon. Apan buot ba nimong magkinabuhing walay kataposan diha sa kalibotan nga atong ginapuy-an karon? [Tugoting motubag.] Ang kadaghanan dili buot. Tungod niining maong hinungdan, kita malipay sa dihang atong madunggan kon unsa ang gisaad sa Diyos.” Paklia sa parapo 6 sa panid 303, basaha ug komentohi ang Pinadayag 21:4, ug unya itanyag nga mobalik pag-usab alang sa dugang panaghisgot.
4 Kon imong nagamit ang hulagway sa panid 302 sa imong unang pagduaw, mahimong ablihan nimo ang libro sa maong panid pag-usab ug moingon:
◼ “Atong nahisgotan ang mga panalangin nga gihulagway dinhi nga matagamtam sa mga tawo ilalom sa pagmando sa Gingharian sa Diyos. Unsa sa imong hunahuna ang kinahanglan natong himoon kon buot natong magkinabuhi ilalom nianang Ginghariana? [Tugoting motubag.] Ang pipila ka tawo sa mga panahon diha sa Bibliya nagpahiluna ug usa ka maayong panig-ingnan aron atong masundog.” Basaha ang Buhat 17:11, nga nagpasiugda sa panginahanglan nga sa ‘adlaw-adlaw nagausisa sa mga Kasulatan.’ Itanyag ang usa ka pagtuon sa Bibliya sa balay.
5 Kon imong nabilin ang tract nga “Kini Bang Kalibotana Molungtad?” sa tagbalay kinsa puliki, ikaw makaingon:
◼ “Sa miduaw ko di pa dugay, puliki ka gayod niadto, apan gibilin ko ang usa ka tract kanimo ug atong gibasa ang Pinadayag 21:4, nga gikutlo dinhi niining libroha, Pinadayag—Hingpit nga Sangkoanan Niini Haduol Na! [Basaha kana gikan sa parapo 6 sa panid 303.] Kining hulagway [sa panid 302] nagapakita kon mahisama sa unsa unya sa dihang ‘pahiran sa Diyos ang matag luha gikan sa atong mga mata.’” Itanyag ang libro.
6 Kon ikaw makakitag interes, buot nimo sa kapulihay nga dad-on ang pagtagad ngadto sa librong Kahibalo nga Motultol sa Kinabuhing Walay Kataposan ug gamiton kana sa pagsugod ug usa ka pagtuon. Tinong makaplagan mo ang dakong kalipay sa pagtabang sa “mga walay pagtagad nga makasabot.”—Sal. 119:130.