Isulti sa Uban ang Bahin sa “Kahayag sa Kalibotan”
1. Unsang dakong kahayag ang gitagna sa Pulong sa Diyos, ug unsang okasyon ang maghatag ug linaing pagtagad ngadto sa maong kahayag?
1 Pinaagi sa manalagna nga si Isaias, si Jehova nagtagna: “Ang katawhan nga naglakaw sa kangitngit nakakita ug dakong kahayag. Kon bahin niadtong mga nagapuyo sa yuta sa mabagang kangiob, ang kahayag mismo misidlak diha kanila.” (Isa. 9:2) Ang maong “dakong kahayag” nakita diha sa mga buhat sa Anak sa Diyos, si Jesu-Kristo. Ang iyang pagsangyaw samtang dinhi siya sa yuta ug ang mga kaayohan nga miresulta pinaagi sa iyang halad nagpagawas niadtong anaa sa espirituwal nga kangitngit. Ang maong kahayag mao ang gikinahanglan sa mga tawo niining mangiob nga mga panahon. Ang Panihapon sa Ginoo maoy linaing kahigayonan alang kanato sa pagsulti sa uban bahin sa “kahayag sa kalibotan.” (Juan 8:12) Sa miaging tuig, milyonmilyon ang nagpasundayag ug pagtuo pinaagi sa pagpakig-uban kanato sa pagtuman sa sugo ni Jesus: “Ipadayon ninyo ang pagbuhat niini sa paghandom kanako.” (Luc. 22:19) Samtang nagkaduol na ang atong pagsaulog sa Memoryal niining tuiga, sa unsang paagi atong ikasulti sa uban ang bahin sa dakong kahayag nga gipasidlak ni Jehova?—Filip. 2:15.
2. Sa unsang paagi atong mapauswag ang atong kinasingkasing nga pagpabili sa halad lukat, ug unsay moresulta sa pagbuhat niini?
2 Ugmara ang Kinasingkasing nga Pagpabili: Ang panahon sa Memoryal maoy usa ka higayon sa pagpamalandong sa dakong gugma nga gipakita ni Jehova ug ni Jesus sa pagtagana sa halad lukat alang sa katawhan. (Juan 3:16; 2 Cor. 5:14, 15) Ang maong pagpamalandong magpauswag sa atong kinasingkasing nga pagpabili niining sagradong okasyon. Ang tanang katawhan sa Diyos buot mogahin ug panahon sa pagbasa ug pagpamalandong sa linaing pagbasa sa Bibliya panahon sa Memoryal, sumala sa gilaraw diha sa Pagsusi sa Kasulatan sa Adlaw-Adlaw. Pinaagi sa pagpamalandong sa dili-hitupngang mga hiyas ni Jehova, nga mahimayaong gipadayag pinaagi sa lukat, kita mapasigarbohon nga siya ang atong Diyos. Ang pagpamalandong sa kahulogan sa lukat alang sa matag usa kanato magpauswag sa atong kinasingkasing nga gugma alang sa Diyos ug sa iyang Anak ug magtukmod kanato sa pagbuhat kutob sa atong maarangan sa pagbuhat sa kabubut-on sa Diyos.—Gal. 2:20.
3. Sa unsang paagi atong ikapasundayag ang atong pagpabili alang sa Memoryal?
3 Kon atong palalomon ang atong pagpabili sa tagana ni Jehova alang sa kaluwasan, ang atong kasibot alang sa Memoryal makaimpluwensiya sa atong mga estudyante sa Bibliya, mga balikduaw, mga paryente, mga silingan, mga eskolmet, mga isigkatrabahante, ug sa uban pa nga atong dapiton sa pagtambong niining espesyal nga okasyon. (Luc. 6:45) Busa, paghimog linaing paningkamot sa pagdapit kanila, ug hatagi silag pinatik nga imbitasyon sa Memoryal aron mapahinumdoman sila. Aron walay malimtan, daghan ang mibati nga praktikal ang paghupot ug listahan niadtong regular nilang imbitahon sa Memoryal, nga idugang sa listahan ang bag-ong mga imbitahon matag tuig. Ang paghimo niana sa organisadong paagi ug ang pagbuhat sa atong maarangan sa pag-imbitar sa mga interesado maoy usa ka maayong paagi sa pagpahayag sa atong pagpasalamat kang Jehova nga Diyos “tungod sa iyang dili-mahubit nga walay bayad nga gasa.”—2 Cor. 9:15.
4. Unsay makatabang kanato aron makagahin kitag dugang panahon sa ministeryo sa Marso, Abril, ug Mayo?
4 Paggahin ug Dugang Panahon sa Ministeryo: Makagahin ka bag dugang panahon sa ministeryo sa Marso, Abril, ug Mayo? Ang pagpaningkamot sa pagpaambit sa uban sa “mahimayaong maayong balita bahin kang Kristo” panalanginan gayod sa Diyos. Si Jehova, ang Tuboran sa tanang espirituwal nga kalamdagan, nagsugo: “[Ipasidlak] ang kahayag gikan sa kangitngit.” (2 Cor. 4:4-6) Segun sa gikinahanglan, ang mga ansiyano maghikay ug dugang mga tigom sa dayon nang pagsangyaw diha sa ubang mga dapit, nga manguna sa pagpaluyo sa mga magmamantala nga gustong mogahin ug dugang panahon sa pagsangyaw. Kini mahimong maglakip sa pagsangyaw diha sa kadalanan sa sayong kabuntagon o diha sa mga negosyohanan ug sa pagsangyaw pinaagig telepono sa hapon na o sa sayong gabii. Ingong tabang sa imong paggahin ug dugang panahon sa pagpakigbahin sa ministeryo, pagtakda ug makataronganong tumong nga oras, ug paningkamoting makab-ot kana. Alang sa daghan, ang paghatag kang Jehova sa ilang kinamaayohan naglakip sa pag-oksilyare payunir.—Col. 3:23, 24.
5. Sa unsang paagi daghan ang nakabenepisyo tungod sa gipakubsan nga kinahanglanong oras alang sa pag-oksilyare payunir?
5 Makaoksilyare Payunir Ka Ba? Kapin na sa pito ka tuig ang milabay sukad nga gipakubsan ang kinahanglanong oras sa mga oksilyare payunir. Kini nga kausaban nakapaarang sa mas daghan sa pagtagamtam sa mga panalangin sa pag-oksilyare payunir. Nasulayan na ba nimo kini? Ang pipila naanad nang mag-oksilyare payunir kada tuig. Diha sa daghang kongregasyon, ubay-ubayng magmamantala ang dungang mag-aplay, ug kini nahimong makalilipay nga kalihokan sa kongregasyon nianang panahona sa tuig. Makagahin ka bag usa ka malipayong bulan sa pag-oksilyare payunir panahon sa Memoryal? Ang Abril maoy usa ka linaing bulan alang sa pipila, kay kini adunay lima ka Sabado ug lima ka Dominggo.
6. Unsang makaiikag nga mga kahikayan ang atong mapahimuslan?
6 Ang inyo bang kongregasyon gieskedyul nga duawon sa magtatan-aw sa sirkito sa Marso, Abril, o Mayo? Usa ka espesyal nga kahigayonan ang imong mapahimuslan. Sama sa gipahibalo di pa dugay, sa 2006 nga tuig sa pag-alagad, ang tanang mag-oksilyare payunir sa bulan nga may mga duaw sa magtatan-aw sa sirkito patambongon sa unang katunga sa miting alang sa mga payunir nianang semanaha. Walay duhaduha nga ang makapalig-on sa espirituwal nga impormasyon nga ihatag niining mitinga motabang sa daghang oksilyare payunir sa pagpangab-ot nga mahimong mga regular payunir. Dugang pa, sa Marso kita malipay sa pagtabang sa mga tawo nga makadangat sa espirituwal nga kahayag pinaagi sa bag-ong tun-anang publikasyon nga Unsay Tinuod nga Gitudlo sa Bibliya? Nganong dili nimo himoong tumong nga makasugod ug pagtuon sa Bibliya pinaagi sa bag-ong libro?
7, 8. (a) Unsay makatabang kanato sa paghimog eskedyul aron makaoksilyare payunir? (b) Sa unsang paagi makatabang ang pagtinabangay sa pamilya, ug sa unsang paagi makabenepisyo ang tibuok pamilya?
7 Samtang imong hunahunaon ang kinahanglanong 50 ka oras alang sa oksilyare payunir, tinoa kon unsang eskedyul ang makapaarang kanimo sa pagpasidlak sa kahayag sa kamatuoran sulod sa 12 ka oras matag semana. Ipakigsulti kini ngadto sa malamposong nakahimo niini, ug sa uban usab. Kini makadasig kanila sa pagduyog kanimo. Pinaagi sa maayong pagplano, nahibaloan sa bawtismadong mga magmamantala, mga batan-on ug tigulang, nga dili ra diay lisod ang pagkab-ot niining dalayegong tumong. Iampo kini. Dayon, kon posible, paghimog mga plano, ug pahimusli ang pag-oksilyare payunir!—Mal. 3:10.
8 Naeksperyensiyahan sa daghang pamilya nga ang pagtinabangay magpaposible sa labing menos usa ka membro sa pamilya nga makaoksilyare payunir. Usa ka pamilya ang nakahukom nga mag-oksilyare payunir ang tanang lima ka bawtismadong membro. Ang duha ka anak nga dili pa bawtismado mihimog linaing paningkamot sa pagpauswag sa ilang kalihokan. Sa unsang paagi nakabenepisyo ang maong pamilya gumikan sa paghimog ekstrang paningkamot? Sila misulat: “Kadto maoy usa ka malipayon nga bulan, ug gibati gayod namo nga nalig-on ang among pamilya. Among gipasalamatan si Jehova tungod sa maong kahibulongang panalangin!”
9. Sa unsang paagi atong ikapasidlak ang atong kahayag panahon sa Memoryal?
9 Ang ato bang linaing kalihokan sa Marso, Abril, ug Mayo makapadasig ug makapasuod pa kanato sa atong langitnong Amahan? Kini nag-agad gayod sa atong personal nga paningkamot sa pagpauswag sa atong gugma alang sa Diyos ug sa iyang Anak ug sa paggahin ug dugang panahon sa ministeryo. Hinaot determinado kita sama sa salmista, kinsa miawit: “Pagadayegon ko pag-ayo si Jehova pinaagi sa akong baba, ug pagadayegon ko siya sa taliwala sa daghang katawhan.” (Sal. 109:30) Panalanginan ni Jehova ang atong masibotong kalihokan panahon sa Memoryal. Busa, hinaot atong ipasidlak ang kahayag aron daghan pa ang makagula gikan sa kangitngit ug “makabaton sa kahayag sa kinabuhi.”—Juan 8:12.