Iwali ang Gingharian
1 Sa Hebreohanon 10:23, kita giawhag nga “panguptan pag-ayo ang pagpahayag sa dayag bahin sa atong paglaom.” Ug ang atong paglaom anaa sa Gingharian sa Diyos. Misugo si Jesus nga ang maayong balita sa Gingharian kinahanglang iwali sa tanang kanasoran. (Mar. 13:10) Kinahanglang huptan nato kini sa hunahuna sa atong ministeryo.
2 Sa dihang makontak nato ang mga tawo, mosulay kita sa pagsugod sa panaghisgot bahin sa butang nga nakapabalaka kanila. Kasagaran kita mohisgot ug mga butang nga nasayran na nila pag-ayo, sama sa krimen sa kasilinganan, mga suliran sa mga batan-on, mga kabalaka sa panginabuhi, o katalagman sa mga kalihokan sa kalibotan. Sanglit ang mga hunahuna sa kadaghanang katawhan napunting man niining “mga kabalaka sa kinabuhi,” sa dihang atong hisgotan kini, ang katawhan kasagaran mopahayag kon unsay anaa sa ilang mga hunahuna. (Luc. 21:34) Hayan magbukas kini sa dalan alang kanato nga ipaambit ang atong paglaom.
3 Kon dili kita mabinantayon, bisan pa niana, ang panaghisgot mapondo sa negatibong mga butang ngadto sa punto nga kita mapakyas sa pagpalampos sa katuyoan sa atong duaw—ang pagwali sa mensahe sa Gingharian. Bisan tuod atong dad-on sa pagtagad ang daotang mga kahimtang, ang atong tumong mao ang pagtultol sa pagtagad ngadto sa Gingharian, nga maoy mosulbad sa tanang suliran sa katawhan. Aduna kita ing kahibulongang paglaom nga kinahanglang madunggan gayod sa katawhan. Busa samtang una tingaling hisgotan nato ang “makuyaw nga mga panahong lisod sagubangon,” angay nga ato dayong ipunting sa atong pangunang mensahe, ang “walay-kataposang maayong balita.” Niining paagiha bug-os natong matuman ang atong ministeryo.—2 Tim. 3:1; 4:5; Pin. 14:6.