Ipaambit sa Uban nga Uyon sa Ilang mga Panginahanglan
1 Si Jehova nagahimog dagayang tagana alang sa atong espirituwal nga mga panginahanglan pinaagi sa matinumanong “ulipon.” (Mat. 24:45-47) Sanglit kita nakadawat nga madagayaon, gidahom ni Jehova nga kita mopaambit sa usag usa ingong tibuok-kalibotang pamilya, nga nagatinong ang tanan makapahimulos nga managsama. (Mat. 10:8) Unsaon nato paghimo kini? Atong tagdon ang tulo ka paagi.
2 Pag-amot sa Literatura: Kadaghanan sa literatura nga atong madawat ginaapod-apod sa kubos nga bili aron matabangan kadtong may limitadong materyal nga mga kahinguhaan. Gipadala usab kini ngadto sa mga kongregasyon nga utang una. Busa, kon kita moamot dayon sa literatura nga atong madawat ug ibalik kini nga bug-os ngadto sa Sosyedad, atong ginabalik ang salapi nga gamiton sa paghimog dugang mga basahon. Atong ginatagad ang mga panginahanglan sa uban, dili lamang sa atong kaugalingon, ug kini magpatunghag mas dakong kalipay. (Buh. 20:35) Apan kon ang mga magmamantala o mga payunir mokuhag literatura nga utang ug mapakyas sa pag-amot niana, nan ilang gipugngan ang salapi nga makatabang unta sa paghimog dugang mga basahon.
3 Mga Pahulam sa Kingdom Hall: Ang inyong kongregasyon ba nakakuhag pahulam aron sa pagtukod ug usa ka Kingdom Hall? Kon mao, sa walay duhaduha ikaw malipayon sa pagpakabaton ug maayong mga pasilidad. Kining salapia gitagana pinaagig mga amot sa atong mga igsoon sa tibuok kalibotan. Sa panahon nga ang pahulam gihangyo, sa walay duhaduha ikaw sa personal nagsaad sa pag-amot ug tinong kantidad matag bulan aron makatabang sa pagbayad sa nahulam. Kon ikaw matinumanong nagatuman niini, nan ikaw nagapaambit uban sa tanan nimong igsoon sa tibuok kalibotan. Diin ang kongregasyon sa kinatibuk-an matinumanong nagabalik sa salaping nahulam ngadto sa Sosyedad matag bulan sumala sa ilang saad, sila nagatabang sa pagtukod ug dugang mga Kingdom Hall.
4 Dinhi sa Pilipinas, ang salaping mabatonan nga mahulam alang sa bag-ong mga Kingdom Hall maoy limitado sumala sa kantidad nga madawat sa binulan gikan niadtong mga nakahulam na o gikan sa mga amot sa Kingdom Hall Fund. Busa, kon ang mga kongregasyon mapakyas sa pagpadala sa bug-os nga kantidad matag bulan, ilang gihikawan gayod ang ubang mga kongregasyon sa salapi nga itukod sa ilang mga Kingdom Hall. Dili gayod nato gustong buhaton kana, dili ba? Busa kitang tanan nga adunay mga hulam mosanong unta sa pahimangno ni Pablo sa pagpaambit sa uban “sumala sa ilang mga panginahanglan,” nga niining paagiha “managtan-aw, dili sa personal nga kaayohan nianang mga butang labot sa inyong kaugalingon lamang, apan usab sa personal nga kaayohan nianang ila sa uban.”—Roma 12:13; Filip. 2:4.
5 Boluntaryong mga Amot: Sa nag-unang mga parapo atong nahisgotan ilabina ang pagbalik ngadto sa pondo sa Sosyedad ingong bayad sa mga taganang nadawat. Bisan pa niana, kadtong kinsa nagapabili gayod sa tanang ginahimo ni Jehova pinaagi sa iyang organisasyon dili matagbaw sa pagbuhat lamang niana. Hinunoa, buot nilang mopaambit sa uban pinaagig paghatag ug boluntaryong mga amot ngadto sa Sosyedad. Daghan, bisan tuod may mga obligasyon sa lokal nga kongregasyon, mahinangop sa pag-amot ngadto sa tibuok-kalibotang buluhaton sa Sosyedad o ngadto sa Kingdom Hall Fund matag bulan.—Tan-awa ang Disyembre 1, 1995 Bantayanang Torre, mga panid 30 ug 31.
6 Si Jesus miingon nga ang iyang mga disipulo mailhan pinaagi sa ilang gugma sa usag usa. (Juan 13:34, 35) Ang atong pagkamanggihatagon sa materyal nga paagi ug ang atong pagkadi-hakog sa pagpaambit sa uban uyon sa ilang mga panginahanglan mao gayoy maayong mga paagi sa pagpamatuod sa atong kaugalingon ingong lunsay nga mga Kristohanon.