Pangutana

◼ Unsa may ato gayong hinumdoman sa dihang magsulat ngadto sa mga tagbalay nga wala nato maabti sa balay?

Sa pipila ka dapit, nagakalisod na ang pagkontak sa katawhan sa dihang kita moduaw sa ilang mga balay. Nakaplagan sa pipila ka magmamantala nga praktikal nga paagi ang pagsulat aron sa pag-abot kanila. Bisan tuod kini makapatunghag pipila ka maayong resulta, adunay panginahanglan sa pagtagad sa pipila ka pahinumdom aron malikayan ang wala kinahanglanang mga kakulian:

Ayawg gamita ang return address sa Sosyedad. Kini sa di-hustong paagi magpaila nga ang sulat gipadala gikan sa among opisina, nga magpahinabog wala kinahanglanang mga suliran ug usahay ekstra nga gasto.

Tinoa nga ikaw adunay hustong adres ug tukmang selyo.

Ayawg iadres ang mga sulat ngadto sa “Okupante”; gamita ang espesipikong ngalan.

Labing maayo ang mubong mga sulat. Pagsukip ug usa ka tract o usa ka magasin inay sulayan ang pagsulat ug taas nga mensahe.

Ang mga sulat nga gimakenilya mas sayong basahon ug makahimog mas paborableng impresyon.

Ang mga sulat dili iphon ingong mga balikduaw gawas lamang kon nasangyawan na nimo sa personal ang indibiduwal kanhi.

Kon ikaw nagasulat sa usa ka tawo kinsa nagpakitag interes sa miagi, angay nimong hatagan ug adres o numero sa telepono aron ikaw matawagan. Isaysay ang atong programa sa pagtuon sa Bibliya.

Dapita ngadto sa mga tigom sa lokal nga kongregasyon. Ihatag ang adres ug ang mga oras sa tigom.