Ang Paagi nga Mahuptan ang Dugang Kalipay Tungod sa Pagtambong ug mga Tigom
1 Ang mga tigom hinungdanon sa atong espirituwal nga kahimsog. Ang kalipay nga atong makuha gikan niana deretsong nalangkit kon unsay atong gibuhat sa dili pa, sa panahon, ug human sa mga tigom. Sa unsang paagi kita makatabang sa atong kaugalingon ug sa uban sa paghupot ug kalipay sa pagtambong sa mga tigom diha sa dakong paagi?
2 Sa Dili pa ang mga Tigom: Ang pagpangandam adunay deretsong epekto sa kalipay nga atong makuha gikan sa mga tigom. Sa dihang kita nangandam pag-ayo, kita mas makiling sa pagpamati ug sa pagpakig-ambit. Dugang pa, ang bisan unsang asaynment sa tigom nga atong madawat angayng andamon pag-ayo, uban ang mga tumong sa tukmang pagpaathag sa impormasyon sumala sa mga instruksiyon ug sa paghupot sa interes sa mamiminaw. Kita sa bug-os mag-ensayo gayod. Sa dihang kita moamot sa mainiton ug makapadasig nga mga tigom nga makabenepisyo sa tanan, ang atong personal nga pag-uswag mahimong dayag ug matagamtam ta ang mas dakong kalipay.—1 Tim. 4:15, 16.
3 Panahon sa mga Tigom: Ang pagkomento sa mga tigom makatabang kanato sa mas pang pagpahimulos niini. Ang mga bahin nga nagkinahanglag pakig-ambit sa mamiminaw angayng isipon ingong personal nga mga asaynment alang sa tanan diha sa kongregasyon. Ang mga komento nga mubo ug laktod sa punto mao ang kasagarang labing epektibo. Ang pag-asoy sa mubo sa makapalig-ong mga kasinatian makapadasig gayod ug makapalagsik, ug kita angayng magmaalisto sa paglakip niini sa dihang kini haom. (Prov. 15:23; Buh. 15:3) Sa dihang ipresentar ang usa ka bahin diha sa tigom, kita angayng magsulti nga may kadasig ug hugot nga pagtuo, nga maghimo niana nga makapainteres, realistikanhon, ug praktikal.
4 Human sa mga Tigom: Ang pagpaambit sa uban ug mabinationg pulong, mahigalaong pagtimbaya, ug pipila ka yawing mga puntos nga gikonsiderar diha sa mga tigom mohatag kaayohan kanatong tanan. Ang pagpahayag sa atong kalipay nga makita ang mga batan-on, mga tigulang, ug ang mga bag-ohan nga magpakig-ambit magpalalom sa gugma sa panag-igsoonay. Inay kay sawayon ang pipila nga tingali wala sa mga tigom, angay natong ipaambit kanila ang atong kalipay gumikan sa pagtambong, nga niana magdasig kanila sa pagtambong.—Heb. 10:24, 25.
5 Dili nato hikawan ang atong kaugalingon niining hinungdanong tagana sa pagdinasigay. (Roma 1:11, 12) Pinaagig matanlagong pag-amot sa matag matinuorong paningkamot, kitang tanan makahupot kanunay sa kalipay sa pagtambong sa Kristohanong mga tigom.