Mangaluwas Unta ang Tanang Matang sa mga Tawo
1. Sa unsa nagdepende ang atong baroganan uban sa Diyos?
1 Ang di-takos nga kalulot sa Diyos nagbukas sa dalan paingon sa kaluwasan. Maoy kabubut-on ni Jehova nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:3, 4) Ang atong baroganan uban sa Diyos nagdepende, dili sa atong rasa, kahimtang diha sa katilingban, mga abilidad, o panggawas nga panagway, kondili sa atong pagpasundayag ug pagtuo sa halad lukat ni Jesus. (Juan 3:16, 36) Ingong mga isigkamagbubuhat sa Diyos, kinahanglang wagtangon nato sa atong kaugalingon ang bisan unsang pagkamapihigon, nga mahimong magtukmod sa atong mga kasingkasing sa pagsalikway sa mga tawo nga andam dawaton ni Jehova.
2, 3. Unsay makatabang kanato nga dili hukman ang mga tawo binase sa ilang panggawas nga panagway?
2 Ayawg Hukmi ang Uban: Si Jehova nagtan-aw kon unsa ang pangsulod nga pagkatawo, nga walay daotang motibo o pagkamapihigon. (1 Sam. 16:7) Gitan-aw usab niya ang ilang mga katakos. Busa, iyang gilantaw kadtong buot magpahimuot kaniya ingong tilinguhaon. (Hag. 2:7) Gilantaw ba nato ang uban sama sa pagtan-aw sa Diyos kanila?
3 Ang panagway sa pipila ka tawo nga atong mahibalag diha sa ministeryo mahimong makapakurat kanato. Tingali nagkato ang ilang mga sinina o dili makasaranganon, taas ug bungot, o dunay mga singsing sa ilong o ngabil. Ang uban tingali walay pinuy-anan. Ang uban mahimong motagad kanato sa dili maayong paagi. Imbes hukman sila ingong dili na gayod mahimong mga magsisimba ni Jehova, kita angayng magbaton ug positibong tinamdan, “kay bisan gani kita kanhi mga walay salabotan, dili-masinugtanon, [ug] gipahisalaag.” (Tito 3:3) Kay nakaamgo niini, kita magmaikagon sa pagsangyaw sa tanan, bisan niadtong kinsa, binase sa panggawas nga panagway, morag dili takos.
4, 5. Unsay atong makat-onan gikan sa mga panig-ingnan ni Jesus ug Pablo?
4 Unang-Siglong mga Panig-ingnan: Si Jesu-Kristo migahin ug panahon sa pagtabang niadtong kinsa giisip sa uban ingong wala nay paglaom. (Luc. 8:26-39) Bisan tuod wala uyoni ang daotang mga binuhatan, siya nahibalo nga ang mga tawo mahimong mahitumpawak sa sayop nga dalan sa kinabuhi. (Luc. 7:37, 38, 44-48) Busa, siya nagpakitag pagsabot, nga “giabot ug kaluoy kanila, tungod kay sila nahisama sa mga karnero nga walay magbalantay.” (Mar. 6:34) Masundog ba nato ang iyang panig-ingnan sa mas bug-os pa?
5 Si apostol Pablo gibato, gikulata, ug gibilanggo. (Buh. 14:19; 16:22, 23) Ang mao bang mabangis nga kasinatian nakapasuko kaniya ug nakahinapos nga nag-usik-usik siya sa iyang panahon taliwala sa pipila ka nasod ug etnikong mga grupo? Wala gayod. Siya nahibalo nga adunay matinud-anong mga tawo nga makaplagan taliwala sa tanang etnikong mga grupo, ug siya determinado sa pagpangita kanila. Ingon ba usab niana ang atong panglantaw niadtong anaa sa atong teritoryo kinsa lahi ug kagikan ug mga kultura?
6. Adunay unsang epekto ang mahimo sa atong tinamdan ngadto sa mga bag-ohan diha sa mga tigom sa kongregasyon?
6 Pag-abiabi sa Uban Karon: Daghan sa katawhan sa Diyos ang nalipay nga sila giabiabi ngadto sa kongregasyon pinaagi sa mga igsoong lalaki ug babaye nga wala maglantaw sa panggawas nga panagway. Dunay usa ka lalaki nga taas ug bungot ug ang buhok abot sa abaga, di-hinlo ang besti, nga misulod sa usa ka Kingdom Hall didto sa Alemanya. Daotan siyag dungog. Bisan pa niana, siya mainitong giabiabi panahon sa tigom. Siya nakadayeg kaayo nga siya mibalik pagkasunod semana. Wala dangtig dugay, gihinloan niya ang iyang panagway, mihunong sa pagtabako, ug gipakaslan ang iyang trato. Sa wala madugay, sila ug ang ilang duha ka anak nga babaye nag-alagad kang Jehova ingong nahiusang pamilya.
7. Sa unsang paagi atong masundog ang atong di-mapihigon nga Diyos?
7 Agig pagsunod sa atong di-mapihigon nga Diyos, hinaot ipaabot nato ang pagdapit ngadto sa uban sa pagpahimulos sa di-takos nga kalulot sa Diyos.
[Blurb sa panid 3]
“Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”—Buh. 10:34, 35.