Unsay Makat-onan sa Uban sa Ilang Pagpaniid Kanimo?
1. Unsay nakat-onan sa mga tinun-an ni Jesus sa ilang pagpaniid kaniya?
1 Si Jesus miingon: “Isangon diha kaninyo ang akong yugo ug magtuon gikan kanako.” (Mat. 11:29) Tataw nga siya nanudlo sa uban pinaagi sa pagpakitag maayong panig-ingnan, dili lang sa pulong. Tagda kon unsay nakat-onan sa mga tinun-an sa ilang pagpaniid kang Jesus. Siya malumo, maluloton, ug mahigugmaon. (Mat. 8:1-3; Mar. 6:30-34) Siya mapainubsanon gayod. (Juan 13:2-5) Samtang sila miuban kang Jesus sa ministeryo, ilang nakita nga siya kugihan kaayo ug epektibo sa pagpanudlo sa kamatuoran ngadto sa uban. (Luc. 8:1; 21:37, 38) Sa unsang paagi maapektohan ang uban sa ilang pagpaniid kanato diha sa ministeryo?
2. Sa unsang paagi ang atong maayong pamostura ug pamatasan diha sa ministeryo magbilin ug maayong impresyon sa mga tagbalay?
2 Mga Tagbalay: Adunay dakong epekto sa mga tagbalay ang atong makasaranganong pamesti, maayong pamatasan, ug tiunay nga interes sa mga tawo. (2 Cor. 6:3; Filip. 1:27) Ilang makita nga kita kanunayng naggamit sa Bibliya. Ang uban makadayeg kon kita matinahorong mamati sa dihang sila mosulti. Ang pagpakitag maayong panig-ingnan niining mga bahina makapainteres sa mga tawo sa mensahe sa Gingharian, busa ayaw gayod kini pakamenosa.
3. Unsay maayong epekto nato ngadto sa atong mga igsoon?
3 Atong mga Igsoon: Hunahunaa usab kon unsay maayong epekto nato ngadto sa atong mga igsoon. Ang atong kasibot sa ministeryo makatakod sa uban. Ingong ang puthaw makapahait sa puthaw, ang atong maayong pagkaandam nga presentasyon makadasig sa uban sa pagpauswag sa ilang katakos sa pagpanudlo. (Prov. 27:17) Kon kita kugihan sa paghupot ug tukmang rekord sa mga interesado ug sa pagbalikduaw dayon kanila, ang uban madasig usab sa paghimo sa ingon. Mahimo kitang maayong impluwensiya sa atong mga igsoon kon atong tumanon sa bug-os ang atong ministeryo.—2 Tim. 4:5.
4. Nganong angay natong pamalandongon sa matag karon ug unya ang atong ginahimo ug ginasulti?
4 Matag karon ug unya, pamalandonga kon unsay imong ginahimo ug ginasulti ug unsay epekto niana sa uban. Ang atong maayong panig-ingnan makapahimuot kang Jehova, ug sama kang apostol Pablo kita makaingon usab: “Mahimong mga tigsundog kanako, ingon nga ako nagsundog kang Kristo.”—1 Cor. 11:1.