Makasangyaw Ka ba sa Adlawng Dominggo?
1. Unsay atong makat-onan kang Pablo ug sa iyang mga kauban didto sa Filipos?
1 Sa adlawng Igpapahulay, ang kadaghanang Hudiyo sa Filipos nagpahulay. Si Pablo ug ang iyang mga kauban miduaw sa siyudad panahon sa usa sa ilang misyonaryong panaw. Walay mokuwestiyon kanila kon mopahulay usab sila nianang adlawa. Apan sila nahibalo nga ang mga Hudiyo magtigom sa gawas sa siyudad aron mag-ampo, mao nga ilang gipahimuslan ang higayon sa pagsangyaw kanila. Nalipay gayod si Pablo ug ang iyang mga kauban sa dihang si Lydia ug ang iyang panimalay namati ug sila nabawtismohan! (Buh. 16:13-15) Sanglit daghan ang mopahulay sa Dominggo, nganong dili ka mogahig panahon sa pagsangyaw kanila?
2. Unsang mga kababagan ang nabuntog sa katawhan ni Jehova aron makasangyaw sa Dominggo?
2 Ang Pagsangyaw sa Dominggo Gisupak: Niadtong 1927, ang katawhan ni Jehova gidasig nga mogahig panahon matag Dominggo sa pagsangyaw. Kini gisupak dayon. Sa Amerika, daghan ang gidakop kay ilang gilapas ang mga balaod labot sa Igpapahulay sa adlawng Dominggo, gitugaw ang kalinaw, ug namaligya nga walay lisensiya. Apan ang katawhan ni Jehova wala moundang. Sa katuigan sa 1930, sila nag-organisar ug “grupong pagsangyaw,” diin ang mga magmamantala sa dug-ol nga mga kongregasyon mag-uban sa pagsangyaw sa usa ka teritoryo. Usahay sa dihang dakpon ang mga magmamantala, dili sila mapahunong sa awtoridad tungod sa ilang kadaghan. Imo bang napabilhan ang sakripisyo sa atong mga igsoon aron kita makasangyaw sa Dominggo nga walay kababagan?
3. Nganong maayong mosangyaw sa Dominggo?
3 Usa ka Maayong Adlaw sa Pagsangyaw: Daghan ang anaa ra sa balay kon Dominggo. Sagad mas relaks sila. Ang ubang nanimba mas gustong makig-estorya bahin sa Diyos niining adlawa. Kon Dominggo ang atong tigom, nagsul-ob na kitag desenteng sinina, busa nganong dili mosangyaw sa dili pa o human sa tigom? Kon gikinahanglan, pagbalon ug diyutayng pagkaon.
4. Unsay atong masinati kon mogahin kitag panahon sa pagsangyaw sa Dominggo?
4 Kon mogahin kitag panahon nga mosangyaw sa Dominggo, duna gihapon kitay panahon sa pagpahulay. Ug mahimong matagbawon ang atong pagpahulay kay kita nakaalagad kang Jehova. (Prov. 19:23) Basin makakaplag pa kitag sama kang Lydia!