Epektibong Paggamit sa mga Pangutana

TUNGOD kay ang mga pangutana nagkinahanglan man ug tubag​—binaba man o diha sa kaisipan—​kini makatabang aron malangkit ang imong mga tigpatalinghog. Ang mga pangutana makatabang kanimo sa pagsugod sa mga panagkabildo ug pagpahimulos sa bibong pagbayloayg mga opinyon. Ingong mamumulong ug magtutudlo, imong magamit ang mga pangutana aron pukawon ang interes, aron tabangan ang usa ka tawo nga mangatarongan bahin sa usa ka ulohan, o aron dugang mapasiugda ang imong isulti. Kon epektibo nimong gamiton ang mga pangutana, madasig nimo ang uban nga maghunahuna nga aktibo inay mamati nga pasibo. Pagbaton ug tumong sa hunahuna, ug isukna ang imong mga pangutana sa paagi nga makatabang sa pagkab-ot niini.

Aron Idasig ang Panagkabildo. Sa dihang makigbahin ka sa pag-alagad sa kanataran, magmaigmat sa mga kahigayonan sa pag-awhag sa mga tawo nga magpahayag sa ilang kaugalingon kon andam silang mohimo niana.

Daghang Saksi mosugod sa makaiikag nga mga panaghisgot pinaagi lamang sa pagsukna, “Nahibulong ka ba sukad . . . ?” Sa dihang ilang pilion ang usa ka pangutana nga tinuod anaa sa mga hunahuna sa daghang tawo, halos segurado nga sila magmalipayon diha sa pag-alagad sa kanataran. Bisan kon ang pangutana dili sinati sa panghunahuna sa laing tawo, kini makapukaw sa pagkamausisaon. Ang nagkadaiyang mga ulohan ikapailaila pinaagi sa mga pulong sama sa “Unsay imong hunahuna . . . ?,” “Unsay imong pagbati . . . ?,” ug “Nagtuo ka ba . . . ?”

Sa dihang ang ebanghelisador nga si Felipe miduol sa usa ka Etiopianhong opisyal sa korte nga nagbasag kusog sa basahon ni Isaias nga manalagna, si Felipe yanong nangutana: “Nakasabot ka ba gayod sa imong ginabasa?” (Buh. 8:30) Kining pangutanaha nagbukas sa dalan aron si Felipe magpatin-aw sa mga kamatuoran mahitungod kang Jesu-Kristo. Pinaagi sa paggamit sa susamang pangutana, ang pipila ka modernong-adlawng mga Saksi nakakaplag sa mga tawong tinuod nga nagtinguha nga tin-awng makasabot sa kamatuoran sa Bibliya.

Sa dihang mahatagan silag higayon sa pagpahayag sa ilang kaugalingong mga hunahuna, daghang tawo ang mas makiling sa pagpamati kanimo. Human sa pagsuknag usa ka pangutana, pamating atentibo. Magmaluloton inay nga mahimong hinawayon sa pag-ila sa tubag sa tawo. Ipahayag ang pagdayeg sa dihang ikaw sinserong makahimo niana. Sa usa ka okasyon, human nga ang usa ka eskriba ‘nakatubag nga maalamon,’ si Jesus midayeg kaniya, nga miingon: “Ikaw dili halayo sa gingharian sa Diyos.” (Mar. 12:34) Bisan pag ikaw dili motuo sa gituohan sa laing tawo, ikaw makapasalamat kaniya tungod sa pagpahayag sa iyang kaugalingon. Ang iyang gisulti basin makapaamgo kanimo sa usa ka tinamdan nga angay nimong tagdon diha sa pagpakig-ambit sa kamatuoran sa Bibliya kaniya.

Aron Ipaila ang Hinungdanong mga Ideya. Sa dihang ikaw makigsulti sa usa ka grupo o makigkabildo sa usa ka tawo, sulayi ang paggamit ug mga pangutana nga motultol ngadto sa hinungdanong mga ideya. Seguroa nga ang imong mga pangutana nalangkit sa mga butang nga makapainteres gayod sa imong mamiminaw. Makagamit ka usab ug mga pangutana nga makapukaw sa kamausisaon tungod kay ang tubag dili daling masabtan. Kon modalikyat ka paghunong human sa pagsukna, ang imong mamiminaw lagmit mamating may dakong interes sa kon unsay sunod isulti.

Sa usa ka higayon, ang manalagnang si Miqueas migamit ug daghang pangutana. Human sa pagsukna kon unsay gidahom sa Diyos gikan niadtong nagsimba kaniya, ang manalagna mipahayag ug upat pa ka pangutana, nga ang matag usa naglakip sa usa ka posibleng tubag. Kanang tanang pangutana makatabang sa pag-andam sa mga magbabasa alang sa maalamong tubag nga gigamit niya sa pagtapos nianang bahina sa iyang paghisgot. (Miq. 6:6-8) Makahimo ka ba ug ingon niana sa dihang magapanudlo? Sulayi kana.

Aron Mangatarongan Bahin sa Usa ka Ulohan. Ang mga pangutana magamit sa pagtabang sa uban nga makasabot sa lohika sa usa ka argumento. Sa dihang nagpahayag ug mabug-at nga deklarasyon ngadto sa Israel, si Jehova naghimo niini, sumala sa gipakita sa Malaquias 1:2-10. Sa sinugdan siya nag-ingon kanila: “Gihigugma ko kamo.” Napakyas sila sa pag-ila sa maong gugma, busa siya nangutana: “Dili ba si Esau ang igsoon ni Jacob?” Unya si Jehova nagpunting sa biniyaang kahimtang sa Edom isip ebidensiya nga tungod sa ilang pagkadaotan, ang Diyos wala mahigugma sa maong nasod. Iyang gisundan kinig mga ilustrasyon nga gisal-otan ug mga pangutana aron ipasiugda ang kapakyasan sa Israel nga mosanong sa hustong paagi sa iyang gugma. Ang pipila sa mga pangutana gihan-ay nga samag ang dili-matinumanong mga saserdote maoy nangutana kanila. Ang uban maoy mga pangutana nga gisukna ni Jehova sa mga saserdote. Ang panagkabildo mopukaw sa mga emosyon ug makahawid sa atong atensiyon; ang pangatarongan dili malalis; ang mensahe, dili mahikalimtan.

Ang pipila ka mamumulong mogamit nga epektibo sa mga pangutana sa susamang paagi. Bisan pag wala tingali magdahom ug binaba nga tubag, ang mamiminaw malangkit diha sa ilang hunahuna, nga samag nakig-ambit sa panagkabildo.

Sa dihang magdumala kitag mga pagtuon sa Bibliya, mogamit kitag usa ka metodo nga gikinahanglan ang pagpakigbahin sa estudyante. Siyempre, mas mapuslanon kon ang estudyante dili lamang mopahayag sa pinatik nga mga tubag. Sa malulotong tono, gamita ang suplementong mga pangutana aron mangatarongan sa estudyante. Mahitungod sa pangunang mga ideya, dasiga siya sa paggamit sa Bibliya ingong basehanan sa iyang tubag. Makasukna ka usab: “Sa unsang paagi ang atong ginahisgotan mohaom niining laing punto nga atong gitun-an? Nganong hinungdanon man kini? Unsay angay nga epekto niini sa atong mga kinabuhi?” Ang maong metodo mas epektibo kay sa ipahayag ang imong kaugalingong mga kombiksiyon o ihatag nimo mismo ang taas nga katin-awan. Niining paagiha, makatabang ka sa estudyante sa paggamit sa iyang “gahom sa pangatarongan” aron simbahon ang Diyos.​—Roma 12:1.

Kon ang usa ka estudyante dili makasabot sa usa ka tinong ideya, magpailob. Basin siya nagsulay sa pagtandi sa imong ginasulti ug sa iyang gituohan sa daghang katuigan. Ang pagpatin-aw sa ulohan pinasukad sa laing punto de bista basin makatabang. Hinuon, usahay gikinahanglan ang paninugdan kaayo nga pangatarongan. Gamita kanunay ang Kasulatan. Gamita ang mga ilustrasyon. Duyog niini, gamita ang yanong mga pangutana nga magdasig sa tawo nga mangatarongan pinasukad sa ebidensiya.

Aron Ipagawas ang Kinasulorang mga Pagbati. Sa dihang motubag ang mga tawo sa mga pangutana, sila dili kanunayng magpadayag kon unsay tinuod nilang pagbati. Sila tingali mohatag lamang sa mga tubag nga sa ilang hunahuna maoy gusto nimo. Gikinahanglan ang hait nga pag-ila. (Prov. 20:5) Sumala sa gihimo ni Jesus, ikaw makasukna: “Motuo ka ba niini?”​—Juan 11:26.

Sa dihang ang daghang tinun-an ni Jesus nasuko tungod sa iyang gisulti ug mibiya kaniya, giawhag ni Jesus ang iyang mga apostol sa pagpahayag kon unsay ilang gibati. Siya nangutana: “Buot ba usab ninyong mobiya?” Gipahayag ni Pedro ang ilang mga pagbati diha sa mga pulong, nga miingon: “Ginoo, kang kinsa man kami moadto? Ikaw mao ang may mga pulong mahitungod sa kinabuhing walay kataposan; ug kami mituo ug nahibalo nga ikaw mao ang Balaang Usa sa Diyos.” (Juan 6:67-69) Sa laing higayon, si Jesus nangutana sa iyang mga tinun-an: “Sumala sa sulti sa mga tawo kinsa ba ang Anak sa tawo?” Gisundan niya kinig usa ka pangutana nga nag-awhag kanila sa pagpahayag kon unsay diha sa ilang kaugalingong mga kasingkasing. “Apan kamo, sumala ninyo kinsa ba ako?” Sa pagtubag, si Pedro miingon: “Ikaw mao ang Kristo, ang Anak sa Diyos nga buhi.”​—Mat. 16:13-16.

Sa dihang magdumalag pagtuon sa Bibliya, basin makadiskobre ka nga mapuslanon ang paghimog susamang pagdumala sa pipila ka isyu. Makasukna ka: “Unsay panghunahuna sa imong mga klasmet (o mga kauban sa trabaho) niining butanga?” Unya ikaw makasukna: “Unsay imong pagbati bahin niini?” Sa dihang mahibaloan mo ang tinuod nga mga pagbati sa usa ka tawo, kini mopaposible nga isip magtutudlo ikaw labaw nga makatabang.

Aron Dugang Ipasiugda. Ang mga pangutana magamit usab aron dugang ipasiugda ang mga ideya. Gihimo kini ni apostol Pablo, sumala sa natala sa Roma 8:​31, 32: “Kon ang Diyos dapig kanato, kinsa ang batok kanato? Siya nga wala gani magpalingkawas sa iyang kaugalingong Anak kondili nagtugyan kaniya alang kanatong tanan, dili ba siya usab uban kaniya malulotong maghatag kanato sa tanang ubang butang?” Matikdi nga, sa matag kahimtang, ang pangutana dugang nagpatin-aw sa naunang put-ong sa mga pulong.

Human sa pagtala sa hukom ni Jehova batok sa hari sa Babilonya, ang manalagnang si Isaias nagpahayag ug lig-ong kombiksiyon pinaagi sa pagdugang: “Si Jehova sa mga panon maoy naglaraw, ug kinsa ang makabungkag niini? Ug ang iyang kamot mao ang gituy-od, ug kinsay makapahuyhoy niini?” (Isa. 14:27) Pinaagi sa mismong unod niini, ang maong mga pangutana nagpaila nga ang ideyang gipahayag dili ikapangulipas. Wala dahoma ang tubag.

Aron Iyagyag ang Sayop nga Panghunahuna. Ang mga pangutana nga gihunahunag maayo maoy gamhanang mga himan usab aron iyagyag ang sayop nga panghunahuna. Sa wala pa ayoha ang usa ka lalaki, si Jesus nangutana sa mga Pariseo ug sa pipila ka batid sa Balaod: “Subay ba sa balaod ang pagpang-ayo panahon sa igpapahulay o dili?” Human sa paghimo sa pagpang-ayo, gisundan niya kanag laing pangutana: “Kinsa kaninyo, kon ang iyang anak o torong baka mahulog sa atabay, ang dili gilayon magbira kaniya pagawas sa adlawng igpapahulay?” (Luc. 14:1-6) Wala dahoma ang tubag, ni may gihatag nga tubag. Ang mga pangutana nagyagyag sa ilang sayop nga panghunahuna.

Usahay, bisan ang matuod nga mga Kristohanon mahatumpawak sa sayop nga panghunahuna. Ang pipila sa unang-siglo nga Corinto nagtaral sa ilang mga igsoon sa hukmanan aron sa pagsulbad sa mga problemang angay untang masulbad nila sa ilang kaugalingon. Giunsa pagdumala ni apostol Pablo ang suliran? Siya misuknag sunodsunod pintok nga mga pangutana aron matul-id ang ilang panghunahuna.​—1 Cor. 6:1-8.

Pinaagi sa pagbansay, ikaw makakat-on sa paggamit nga epektibo sa mga pangutana. Bisan pa niana, hinumdomi nga magmatinahoron, ilabina sa dihang makigsulti sa mga tigulang, sa mga tawong dili nimo kaila sa personal, ug niadtong anaa sa mga katungdanang may awtoridad. Gamita ang mga pangutana sa pagpresentar sa kamatuoran sa Bibliya sa madanihong paagi.