Sulat Gikan sa Nagamandong Lawas

Minahal nga mga Igsoon:

Nagsimba ta kang Jehova, maong gihigugma nato ang iyang Pulong, ang Bibliya. Segurado ta nga ang mga estorya niini tinuod, ang giya niini kasaligan, ug nga gipamatud-an niini nga pinangga ni Jehova ang mga tawo. (Salmo 119:105; Lucas 1:3; 1 Juan 4:19) Gusto gyod natong matabangan ang uban nga mahibalo sa importanteng mga kamatuoran nga naa sa Pulong sa Diyos. Tungod niana, nalipay mi sa paghimo niini nga libro, Mga Leksiyon Gikan sa Bibliya.

Kini nga libro gisulat para sa mga bata. Pero makatabang sab ni sa mga hamtong nga gustong mahibalo pag dugang sa Bibliya. Ug kay ang Bibliya para man sa tanang tawo, makabenepisyo gyod ta sa pagbasa sa mga leksiyon niini. Makatabang ni nato nga magmalipayon.

Giasoy niini nga libro ang mga estorya sa Bibliya, gikan sa paglalang hangtod sa umaabot. Gihimo ang tanan aron maasoy kini nga tin-aw ug sayon sabton. Kutob sa mahimo, gisunodsunod kini sumala sa pagkahitabo sa mga estorya.

Pero kining libroha wala lang mag-asoy sa mga estorya sa Bibliya. Ang mga pulong ug mga hulagway niini gipili pag-ayo aron mahimong buhi ang mga estorya ug inyong mabati ang emosyon sa mga karakter.

Gipakita niining libroha nga ang Bibliya maoy basahon bahin sa mga tawo—kadtong mituman kang Jehova ug kadtong misupak niya. Ug kini nagdasig nato nga mokuhag leksiyon sa ilang mga panig-ingnan. (Roma 15:4; 1 Corinto 10:6) Kining libroha dunay 14 ka seksiyon. Ang sinugdanan sa matag seksiyon nagsumaryo sa mga leksiyon nga atong makat-onan.

Kon ginikanan mo, mahimong basahan ninyog usa ka leksiyon ang inyong anak ug hisgotan ang hulagway. Dayon puwede ninyong basahon ang mga teksto nga gibasehan sa leksiyon. Tabangi ang inyong anak nga masabtan ang koneksiyon sa iyang gibasang teksto ug sa leksiyon diha sa libro. Bisan kadtong dili na bata mahimong matabangan niini nga paagi aron mahibalo sab sila sa mensahe sa Bibliya.

Hinaot kining basahona makatabang sa tanan nga sinserog kasingkasing​—bata man o tigulang—​nga makakat-on sa Pulong sa Diyos ug mapadapat ang ilang nakat-onan. Sa ingon, sila usab makasimba niya ingong membro sa iyang pinanggang pamilya.