Mga Balita sa TV—Unsa ka Daghan Niana ang Tinuod nga mga Balita?

Human sa pag-analisar sa 102 ka lokal nga mga balita sa TV gikan sa 52 ka dagkong siyudad sa Tinipong Bansa alang sa kaundan ug presentasyon, nakaplagan sa usa ka grupo nga nagbantay sa palaumagian sa balita nga 41.3 porsiyento lamang sa mga programa ang naundan ug mga balita. Unsay naglangkob sa ubang sibya?

Sa aberids, 30.4 porsiyento sa oras sa pagsibya sa lokal nga mga balita sa TV ang nalangkoban sa mga panganunsiyo. Sa pagkamatuod, ang pipila sa mga estasyon nga gisurbi migugol ug mas daghang panahon sa mga panganunsiyo kay sa mga balita. Dugang pa, ang oras sa pagsibya sa mga balita kasagarang naundan ug way-hinungdang mga estorya, matod sa taho nga nagsumaryo sa mga resulta sa pagtuon.a Ubos sa ulohang “Way-Hinungdang mga Estorya,” ang taho nagklasipikar sa “tingob nga oras sa pagsibya nga gigahin sa pagtabitabi sa mga magsisibya, paghatag ug mga publisidad ug mga pasiuna sa umaabot nga mga balita, sentimental o way-pulos nga mga balita ug mga balita bahin sa mga inilang tawo.” Pananglitan sa pipila ka way-hinungdang mga estorya: “Indigay sa Kinayabagan nga Tenor,” “Tigbalita Misakay sa ‘Makalilisang, Dili-Katuohan, Katingalahan’ nga Roller Coaster,” ug “Mas Daghang Tawo ang Mamalit ug mga Pahid sa Sanwits Diha sa mga Supermarket.”

Unsang mga estoryaha ang naglangkob sa tinuod nga mga balita? Ang mga estorya sa krimen nangibabaw sa mga balita sa TV, nga naglangkob sa 26.9 porsiyento sa oras sa pagsibya sa mga balita. Ang sukdanan nga “‘Kon ang estorya maoy bahin sa pag-ula ug dugo, kini ang mag-una’ dayag gihapon diha sa lokal nga mga balita sa TV . . . Ang gidaghanon sa krimen kubos tingali latas sa T.B. sulod sa milabayng pipila ka tuig, apan dili diha sa lokal nga mga balita sa telebisyon.” Ngano? Sumala sa mga awtor sa pagtuon, “ang mga panghitabo sa krimen tataw kaayo ug nakakuha sa pagtagad sa mga tawo.”

Sunod sa krimen mao ang pagkobre sa mga katalagman, sama sa mga sunog, mga pagbanggaay sa sakyanan, mga baha, ug mga pagbuto (12.2 porsiyento sa mga balita), nga gisundan sa mga balita bahin sa mga esport (11.4 porsiyento). Dayon nagsunod ang pagkobre bahin sa panglawas (10.1 porsiyento), gobyerno (8.7 porsiyento), ug sa ekonomiya (8.5 porsiyento). Ang mga topiko sama sa edukasyon, kalikopan, arte, ug siyensiya wala kaayo tagda (gikan sa 1.3 ngadto sa 3.6 porsiyento). Ang mga taho bahin sa kahimtang sa panahon, sa laing bahin, nag-aberids ug 10 porsiyento sa tanang balita. “Ang tanan buot maghisgot bahin sa kahimtang sa panahon ug ang mga balita sa TV dili eksepsiyon,” mikomento ang mga tigdukiduki. Sila midugang: “Ang bisan unsang kahimtang sa panahon, maayo o dili-maayo, init o bugnaw, basa o uga, makapukaw ug malukpanong pagkobre sa mga balita sa TV.”

Diha sa positibong bahin, ang taho nag-ingon nga nagkadaghang mga magsusulat ug balita ug mga tumatan-aw ang nakakita sa panginahanglan ug kausaban. Apan, ang pagtuon miangkon nga ang maong kausaban dili daling mahitabo tungod kay ang “pamatigayon ug kahakog hayan maghulga kanunay sa dekalidad nga pagpanulat.”

[Footnote]