‘Gusto Kong Moalagad sa Diyos sa Dili pa Ako Mamatay’
ANG SUGILANON NI MAMIE FREE
NIADTONG 1990 miulbo ang giyera sibil sa Liberia. Sa nagkagrabe na ang giyera, si Mamie, nga usa ka 12-anyos nga batang babaye nga sakop sa tribong Krahn, ug ang iyang pamilya natanggong sa ilang balay sa Monrovia, ang kaulohan sa Liberia. “Milanog ang buto sa tapad namong balay,” matod ni Mamie. “Naigo ug bomba ang balay sa among silingan ug nasunog kini. Mitabok ang kalayo sa among balay ug nasunog usab kini.” Bisan pa sa grabeng pinusilay, mikalagiw si Mamie uban sa iyang inahan ug uyoan.
“Sa kalit lang, dihay miigo nako,” nahinumdom si Mamie.
“Dayon nangutana ang akong inahan, ‘Unsay nahitabo?’”
“Morag naigo ko! Naigo man tingali kog bala,” ako mitubag.
Si Mamie nalup-og sa yuta sa kasakit ug miampo: “Diyos ko, palihog dungga ako. Mamatay na man tingali ko, apan gusto kong moalagad kanimo sa dili pa ako mamatay.” Dayon nawad-an siyag panimuot.
Kay nagtuong patay na si Mamie, ilubong na unta siya sa iyang mga silingan diha sa baybayon sa duol. Apan miinsistir ang iyang inahan nga dad-on siya sa ospital sa maong lugar. Ikasubo, kulang kaayog kahimanan ang ospital sa pag-atiman sa daghan kaayong samdan nga mga tawo. Ang uyoan ni Mamie nga nasamdan usab, namatay niadtong gabhiona, apan si Mamie nabuhi ra, nga paralisado gikan sa hawak paubos.
Nagsigeg dugo ang sulod sa iyang lawas ug siya nag-antos sa tumang kasakit. Upat ka bulan sa ulahi na-x-ray ra gyod siya sa mga doktor aron makita ang bala. Kini nataliwad-an sa iyang kasingkasing ug baga. Delikado kaayo ang operasyon, mao nga si Mamie gidala sa iyang inahan ngadto sa arbularyo. “Iya akong gisamaran sa labaha ug dayon iyang gisupsop ang samad aron makuha ang bala,” matod pa ni Mamie. ‘Nia ra,’ miingon ang arbularyo, nga nagkuha sa bala gikan sa iyang baba. Amo siyang gibayran ug namauli kami.”
Apan namakak diay siya. Gipakita sa dugang pag-x-ray nga wala diay makuha ang bala. Mao nga si Mamie ug ang iyang inahan mibalik sa arbularyo, ug sila gipatuo nga dangtan pa konog siyam ka bulan una pa makita sa X-ray nga nakuha na ang bala. Sila namauli ug mapailobong nagpaabot. Sa kasamtangan, klaseklase nang tambal ang gitomar ni Mamie aron mahupayan siya sa kasakit. Siyam ka bulan sa ulahi, nagpa-x-ray pa siya ug kadaghan. Naa gihapon ang bala, apan milayas na ang arbularyo.
Mikabat nag 18 ka bulan ang bala diha sa lawas ni Mamie. Gidala siya sa usa ka paryente ngadto sa usa ka tambalan nga babaye. Inay motabang, siya miingon nga si Mamie o kaha ang iyang inahan mamatay sa usa ka tinong adlaw. Trese anyos na si Mamie niadtong tungora. “Nagsige lang kog hilak,” si Mamie miingon. “Apan pag-abot sa gitagnang petsa, walay namatay kanamo.”
Dayon, gidala si Mamie sa iyang uyoan ngadto sa usa ka lider sa simbahan kinsa miingon nga nakakita kono siyag panan-awon nga ang nakaingon sa paralisis ni Mamie mao ang barang, dili bala. Siya mipasalig nga kon sundon lang ni Mamie ang iyang gipabuhat nga mga rituwal, makalakaw na siya pag-usab sulod lang sa usa ka semana. Si Mamie misaysay: “Kadaghan na ako naligo nga may rituwal ginamit ang tubig sa dagat, nagpuasa, ug nagligidligid sa yuta kada tungang gabii sulod sa daghang oras. Apan kining tanan wala mosaler, ug wala gihapon ko maayo.”
Apan sa ngadtongadto, nagkadaghan na ang medikal nga mga pasilidad, ug sa kataposan nakuha ra gayod ang bala sa lawas ni Mamie. Siya nag-antos ug kapin na sa duha ka tuig sa way-puas nga kaul-ol. “Human sa operasyon,” siya miingon, “ang kaul-ol halos nawala na, ug maarang-arang na ang akong pagginhawa. Bisan tuod paralisado gihapon ang katunga sa akong lawas, makatindog na ako ginamit ang usa ka abag sa paglakaw.”
Si Mamie Nakahimamat ug mga Saksi ni Jehova
Pipila ka semana human sa operasyon, ang inahan ni Mamie nakahimamat ug duha ka Saksi ni Jehova. Kay nahibalo nga ang iyang anak babaye gustong magbasa ug Bibliya, iyang gipadayon ang mga Saksi sa iyang balay. Gidawat dayon ni Mamie ang pagtuon sa Bibliya. Ugaling lang, human sa pipila ka bulan, naadmit siya sa ospital ug wala na siyay komunikasyon sa mga Saksi.
Bisan pa niana, maikagon gihapon si Mamie nga makahibalo bahin sa Bibliya. Mao nga sa dihang may usa ka lider sa relihiyon nga mitanyag ug tabang, iya kining gidawat. Panahon sa klase sa Dominggo, gipangutana sa iyang klasmet ang maestro, “Si Jesus parehas ra ba sa Diyos?”
“Oo,” mitubag ang maestro. “Parehas ra sila. Apan si Jesus dili gyod kaayo parehas sa Diyos.”
‘Dili gyod kaayo parehas?’ naghunahuna si Mamie. ‘Binuang ni. Sayop gyod ni.’ Kay wala makombinsir nga ang iyang nakat-onan mao ang kamatuoran sa Bibliya, sa ngadtongadto si Mamie mihunong sa pagpakig-uban nianang relihiyona.
Niadtong 1996, miulbo na usab ang kapintasan sa Monrovia. Duha na pod ka membro sa pamilya ni Mamie ang namatay, ug nasunog na pod ang ilang balay. Pipila ka bulan sa ulahi, si Mamie nakahimamat ug duha ka Saksi nga namalaybalay. Nagtuon na usab ni Mamie sa Bibliya. Sa iyang unang pagtambong sa tigom, nahingangha siya nga ang tanan—lakip ang mga ansiyano sa kongregasyon—mitabang sa paghinlo sa Kingdom Hall. Sa hinapos nianang tuiga, nalipay siya nga nakatambong sa usa sa “Mga Mensahero sa Diyosnong Pakigdait” nga Distritong mga Kombensiyon, ang unang dakong panagkatigom sa mga Saksi ni Jehova nga iyang natambongan.
“Nakadayeg kaayo ako,” matod ni Mamie. “Gihigugma gayod sa mga Saksi ang usag usa, bisan pag sila naggikan sa lainlaing tribo. Ug organisado kaayo ang tanan.”
Pagtuman sa Iyang Tinguha sa Pag-alagad sa Diyos
Niadtong 1998, ang bag-ong panaggubatay nakapugos kang Mamie ug sa iyang inahan sa pagkalagiw ngadto sa silingang nasod sa Côte d’Ivoire, diin sila mipuyo sa Peace Town Refugee Camp uban sa mga 6,000 ka taga-Liberia. Gipadayon ni Mamie ang iyang pagtuon sa Bibliya uban sa mga Saksi ug kusog ang iyang pag-uswag. Sa wala madugay, buot na niyang ipaambit ang iyang pagtuo ngadto sa uban. Aron siya makasangyaw sa publiko, ang iyang espirituwal nga mga igsoong lalaki ug babaye maoy motulod sa iyang wheelchair. Niining paagiha nasangyawan pag-ayo ni Mamie ang uban pang mga kagiw.
Bisan pag ang iyang pagkabaldado nakapalisod kaniya sa pag-adto sa Kingdom Hall, nga sayis kilometros ang gilay-on gikan sa iyang gipuy-an, si Mamie nakatambong gihapon sa tanang tigom. Niadtong Mayo 14, 2000, mibiyahe siyag 190 kilometros aron sa pagtambong sa adlaw sa espesyal nga asembliya ug sa pagpasimbolo sa iyang pahinungod sa Diyos pinaagi sa bawtismo sa tubig. (Mateo 28:19, 20) Atubangan sa daghang tawo nga nanglugmaw ang mga luha, si Mamie gisakwat ngadto sa sapa ug gibawtismohan. Malipayon kaayo siya sa iyang paghaw-as sa tubig.
Karon nga anaa siya sa kampo sa mga kagiw sa Ghana, gusto ni Mamie nga mahimong regular payunir, o bug-os-panahong magsasangyaw. Ang iyang inahan nagtuon na usab sa Bibliya uban sa mga Saksi ni Jehova ug karon nagpaambit na sa iyang nakat-onan ngadto sa uban. Silang duha maikagong nagpaabot sa panahon nga gisaad diha sa Pulong sa Diyos sa dihang “ang bakol mosaka ingon sa laking osa, ug ang dila sa amang mosinggit sa kasadya.”—Isaias 35:5-7.
[Hulagway sa panid 22]
Ang bala nga nakuha gikan sa lawas ni Mamie
[Hulagway sa panid 23]
Si Mamie nga gisakwat ngadto sa sapa aron bawtismohan
[Hulagway sa panid 23]
Nagdumalag pagtuon sa Bibliya uban sa iyang inahan, si Emma