Ang Kinabuhi nga Gipaposible Niya

“TAN-AWA! Usa ka hari magahari alang sa pagkamatarong.” Ang sama niini nga makapadasig nga mga saad mahitungod sa pagmando ni Jesus sa Gingharian maoy pangunang bahin sa Bibliya. Ang laing saad nag-ingon: “Pagaluwason niya ang kabos nga nagatuaw alang sa tabang, ingon man ang sinakit ug si bisan kinsa nga walay magtatabang. Maluoy siya sa timawa ug sa kabos, ug pagaluwason niya ang mga kalag sa mga kabos. . . . Ang ilang dugo mahimong bililhon sa iyang mga mata.”—Isaias 32:1; Salmo 72:12-14.

Duna bay makalimod nga ang mga tawo sa tibuok kalibotan nagkinahanglan nianang matarong nga pagmando? Giawhag ni Jesus ang iyang mga sumusunod nga kanunayng huptan sa hunahuna ang Gingharian sa Diyos. Gitudloan niya sila sa pag-ampo: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.”—Mateo 6:9, 10.

Pamatuod nga ang Gingharian sa Diyos Haduol Na

Unsaon nato pagkahibalo kon kanus-a moabot ang maong Gingharian ingong tubag sa maong pag-ampo? Ang unang mga sumusunod ni Jesus gustong masayod ug nangutana: “Unsa man unya ang ilhanan sa imong presensiya [ingong nagamandong Hari] ug sa kataposan sa sistema sa mga butang?” Mitubag si Jesus: “Ang nasod motindog batok sa nasod . . . , ug aduna unyay mga kanihit sa pagkaon ug mga linog sa nagkalainlaing mga dapit. Kining tanan maoy sinugdanan sa mga kaul-ol sa kasakit.” Dugang pa, nagpasidaan siya: “Tungod sa pag-uswag sa kalapasan mobugnaw ang gugma sa kadaghanan.”—Mateo 24:3-12.

Ang laing tagna sa Bibliya nag-ingon nga “sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, magmahigugmaon sa salapi, mapagawalon, mapahitas-on, mapasipalahon, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig ulo, nangburot sa garbo, mga mahigugmaon sa kalipayan inay nga mga mahigugmaon sa Diyos, nga nagbaton sa dagway sa diyosnong pagkamahinalaron apan nagpanghimakak sa gahom niini.”—2 Timoteo 3:1-5.

Mouyon ka tingali nga kining kahubitan sa “kataposang mga adlaw” mohaom gayod sa panahon nga atong gikinabuhian. Daghan ang pamatuod nga karon na ang panahon nga matuman ang mosunod nga tagna sa Bibliya: “Ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino.”—Daniel 2:44.

Ang pagmando sa Gingharian sa “Prinsipe sa Pakigdait” magwagtang sa tanan nga makatugaw sa kalinaw niadtong makalabang buhi sa kataposan niining kalibotana. (Isaias 9:6) Ang tagna sa Bibliya nagsaad: “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:17) Sa pagkatapos niining kalibotana, ang nagabuhat sa kabubut-on sa Diyos makatagamtam sa mga butang nga wala matagamtam sa tawhanong pamilya sa dihang ang atong unang mga ginikanan nga si Adan ug Eva mirebelde sa Diyos.

Ang Kinabuhi nga Haduol Na

“Sa paglalang-pag-usab,” nagpatin-aw si Jesus, “ang Anak sa tawo molingkod sa iyang mahimayaong trono.” (Mateo 19:28) Unsa man kining “paglalang-pag-usab”? Ang laing hubad naggamit sa ekspresyong “pagbag-o sa tanang butang.” (New International Version) Ang susamang asoy sa Bibliya nagtawag niana nga “umaabot nga sistema sa mga butang.” (Lucas 18:30) Nianang panahona si Jesus mogamit sa iyang hinatag-sa-Diyos nga awtoridad ingong Prinsipe sa Pakigdait pinaagi sa paghatag ug kinabuhing walay kataposan sa tanan nga magpasundayag ug pagtuo sa iyang halad lukat.—Juan 5:21.

Sa bag-ong sistema sa mga butang sa Diyos, ang mga tawo makatagamtam sa matang sa kinabuhi nga gitagana sa Diyos kang Adan ug Eva sa dihang gibutang niya sila sa yutan-ong Paraiso. Hinumdomi nga gisugo sila sa Diyos nga manganak, oo, ‘pun-on ang yuta ug gamhan kini.’ Ang ilang asaynment mao ang pagpasangkad sa ilang Edenikong Paraiso sa tibuok yuta! (Genesis 1:28) Sa samang paagi, sa paglalang pag-usab, ang yuta mapuno sa mga makalabang-buhi sa kataposan niining kalibotana, sa ilang mga anak, ug niadtong pagabanhawon. Ang asaynment nila mao ang pagpakigbahin sa paghimo sa yuta nga usa ka paraiso, nga maoy orihinal nga katuyoan sa Diyos.

Hatagig pagtagad ang pipila sa mga panalangin nga gipakita sa Bibliya nga matagamtam sa mga tawo nianang bag-ong kalibotan sa pagkamatarong.—2 Pedro 3:13.

Bisan tuod ang mga saad nga giilustrar niining mga panira morag dili katuohan, tinong matuman kini sa “umaabot nga sistema sa mga butang.” Sa iyang pag-ampo sa Diyos, gihubit ni Jesus kon unsay gikinahanglan sa mga tawo aron makatagamtam niining maong mga panalangin, nga nag-ingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Hinaot mahiapil ka niadtong mapainubsanong nangita niining nagahatag-kinabuhi nga kahibalo.

[Hulagway sa panid 7]

“Ang iyang ngalan pagatawgon nga . . . Prinsipe sa Pakigdait. Sa kadagaya sa prinsipenhong pagmando ug sa pakigdait walay kataposan.”—Isaias 9:6, 7

[Kahon/Mga hulagway sa panid 8, 9]

Mga Balay ug Trabaho Alang sa Tanan

“Sila gayod magtukod ug mga balay ug magpuyo niini . . . Dili sila magtanom ug lain ang magkaon.”—Isaias 65:21, 22.

Abundang Pagkaon Alang sa Tanan

“Ang yuta magapatungha gayod sa iyang bunga.” “Aduna unyay dagayang lugas sa ibabaw sa yuta.”—Salmo 67:6; 72:16.

Ang Pakigdait sa Tibuok Yuta Mag-apektar Bisan sa mga Mananap

“Ang lobo mopuyo gayod sa makadiyot uban sa laki nga nating karnero, ug ang leopardo mohigda uban sa nating kanding, . . . ug usa lamang ka gamayng bata ang mangulo kanila.”—Isaias 11:6.

Wagtangon ang Gubat, May Pakigdait sa Walay Kataposan

“Usa ka nasod dili mobakyaw sa espada batok sa usa ka nasod, ni makakat-on pa sila sa gubat.” “Sa kadagaya sa prinsipenhong pagmando ug sa pakigdait walay kataposan.”—Isaias 2:4; 9:7.

Banhawon ang mga Minahal nga Nangamatay

“Ang takna nagsingabot nga ang tanan nga anaa sa handomanang mga lubnganan makadungog sa iyang [Jesus] tingog ug manggula.”—Juan 5:28, 29.

Wala nay Sakit o Kamatayon

“Walay pumoluyo nga moingon: ‘Ako masakiton.’” “Ang kamatayon mawala na . . . Ang unang mga butang nangagi na.”—Isaias 33:24; Pinadayag 21:3, 4.