Ang Pagbansay Sumala sa Paagi sa Diyos Mamungag Maayong Bunga
Ang mga ginikanan nga nagtudlo sa ilang mga anak sukad pa sa pagkabata makaanig maayong bunga sa ilang paghago. Si Dorian, nga taga-Peru, Amerika del Sur, naghatag ug bahin sa unang higayon sa Teokratikanhong Tunghaan sa Ministeryo sa Kingdom Hall sa mga Saksi ni Jehova sa dihang kuwatro anyos pa siya. Sa dihang nagsugod siya sa pag-eskuyla, siya makapatin-aw na sa iyang maestra ug mga klasmet gikan sa Bibliya kon nganong dili siya magsaulog ug Pasko.
Sa nag-edad siya ug singko anyos, gihangyo si Dorian sa paghatag ug pakigpulong ngadto sa tanang estudyante sa eskuylahan—mga 500 ka estudyante—bahin sa iyang pagtuo sa Father’s Day. Naghatag siya ug napulo ka minuto nga pakigpulong nga nag-ulohang “Ang mga Responsibilidad sa Amahan,” nga gibase sa teksto sa Bibliya sa Efeso 6:4. Iyang gitapos ang iyang pakigpulong pinaagi sa pag-ingon, “Imbes magsaulog ug Father’s Day kas-a sa usa ka tuig, angayng tahoron ug sundon sa mga bata ang ilang mga ginikanan adlaw-adlaw.”
Sa 1943 nahimong bahin sa senemanang tigom sa mga Saksi ni Jehova ang Teokratikanhong Tunghaan sa Ministeryo, nga gilaraw sa pagpauswag sa katakos sa mga bata ug tigulang sa paghatag ug pakigpulong sa publiko. Sukad niadto, kini nakahatag ug binase sa Bibliya nga pagbansay agig suplemento sa instruksiyon nga giawhag nga ihatag sa mga ginikanan ngadto sa ilang mga anak.—Proverbio 22:6.
Sa Nobyembre 2005, si Simon nga taga-Switzerland, sa nag-edad ug sayis anyos, naghatag sa iyang unang bahin sa pagbasag Bibliya diha sa Teokratikanhong Tunghaan sa Ministeryo. Paglabay sa mga usa ka tuig, giinterbiyo siya diha sa usa ka programa sa dakong asembliya sa mga Saksi ni Jehova. Unsang tinamdan bahin sa pagsimba ug pag-alagad sa Diyos ang iyang naugmad?
Gusto kaayo si Simon motambong ug Kristohanong mga tigom, kay bisan pag gikapoy siya, dili gayod siya mopalta sa pagtambong. Mokuyog pod siya sa pagsangyaw uban sa mga membro sa iyang pamilya. Matag bulan makapahimutang siyag 30 ngadto sa 50 ka kopya sa mga magasing Ang Bantayanang Torre ug Pagmata! sa mga tawo sa tanang pangedaron. Dugang pa, makigsulti gayod siya sa iyang amahan bahin sa Bibliya ug imbitahon gayod niya siya sa pagtambong sa mga miting uban sa mga membro sa iyang pamilya.
Sa walay duhaduha, ang mga ginikanan nga nagmatuto sa ilang mga anak “sa disiplina ug sa pagdumala-sa-kaisipan ni Jehova” malipay kaayo kon ang mga anak mosanong sa ilang pagbansay ug mamungag maayong bunga.—Efeso 6:4; Santiago 3:17, 18.
[Hulagway sa panid 28]
Si Dorian diha sa eskuylahan
[Hulagway sa panid 28]
Si Simon diha sa Kingdom Hall