Mga Ateyista Nangombertir
DUNAY mitungha nga grupo sa mga ateyista. Sila gitawag ug bag-ong mga ateyista, ug dili sila kontento nga magpakahilom lang. Hinunoa, sila nangombertir—“aktibo, agresibo, ug porsigidong nangdani sa mga relihiyoso sa pagsagop sa ilang panghunahuna,” misulat ang kolumnistang si Richard Bernstein. Bisan ang mga agnostiko ilang gipuntirya, kay kining bag-ong mga ateyista dili mohatag ug luna sa pagduhaduha. Para nila, wala gayoy Diyos.
“Ang kalibotan kinahanglang mahigmata kay dugay na kining giurom tungod sa relihiyosong mga pagtulon-an,” matod sa usa ka mananaog ug Nobel nga si Steven Weinberg. “Ang bisan unsa nga mahimo natong mga siyentista sa pagpahuyang sa impluwensiya sa relihiyon kinahanglan gayong himoon kay basig sa ngadtongadto mao kini atong kinadak-ang kontribusyon sa sibilisasyon.” Ang usa ka paagi nga ilang gigamit mao ang mga basahon, nga morag nakapainteres sa daghan, kay ang pipila nila ka libro nahimong himalitan kaayo.
Ang relihiyon daw nakaabag pa gani sa kawsa sa bag-ong mga ateyista kay napul-an na ang mga tawo sa relihiyosong pagkapanatiko, terorismo, ug paggubatay nga nagsakit sa kalibotan karon. “Ang relihiyon maoy hilo,” miingon ang usa ka inilang ateyista. Dugang pa, ang maong “hilo” naglakip kono sa tanang relihiyosong pagtulon-an, dili lang sa panatisismo. Ang bag-ong mga ateyista nag-ingon nga ang pasukaranang mga doktrina kinahanglang iyagyag, isalikway, ug pulihag mga ideya nga gibase sa lohika. Ang mga tawo kinahanglang dili mahadlok sa pagyagyag sa “nagtipun-og nga makamatayng mga tinonto” nga makaplagan diha sa Bibliya ug sa Koran, misulat ang ateyistang si Sam Harris. “Dili na kita maglipodlipod.”
Bisan tuod gitamay sa bag-ong mga ateyista ang relihiyon, ilang gituboy ang siyensiya, ug ang pipila kanila nangangkon pa gani nga napamatud-an sa siyensiya nga walay Diyos. Apan, tinuod ba kana? Mapamatud-an ba gayod kana sa siyensiya? “Sa takdang panahon,” matod ni Harris, “duna gyoy makadaog, duna say mapildi.”
Sa imong hunahuna, kinsa may makadaog? Samtang namalandong niana, pangutan-a ang imong kaugalingon: ‘Makadaot ba gayod ang pagtuo nga dunay Maglalalang? Moarang-arang ba ang kahimtang sa kalibotan kon ateyista ang tanan?’ Atong hisgotan kon unsay giingon sa pipila ka inilang siyentista ug pilosopo bahin sa ateyismo, relihiyon, ug siyensiya.