“Ikaw Nagpabiling Positibo”
● Si Camila nag-antos sa sakit nga anemia, may problema sa sistema sa nerbiyos, ug wala motubo. Sa edad nga otso-anyos, 30 pulgadas (75 sentimetros) lang ang iyang gitas-on. Ang ginikanan ni Camila, kinsa mga Saksi ni Jehova, nakadesisyon sa pagdala kaniya sa usa ka medikal nga komperensiya nga gipahigayon diha sa usa ka teatro sa ilang lugar sa Argentina. Sila milingkod sa ikaduhang laray, ug 500 ka tawo ang nanambong.
Panahon sa lektyur, ang mamumulong nga usa ka doktor nagpunting kang Camila ingong pananglitan sa usa ka himsog tan-awon nga bata. Kay wala mahibalo sa edad sa bata ug sa iyang problema sa panglawas, ang doktor nangutana: “Pilay edad sa imong anak?”
“Otso anyos,” miingon ang inahan ni Camila nga si Marisa.
“Seguro walo ka bulan ang imong gipasabot,” matod sa doktor.
“Dili, otso anyos na siya,” mitubag si Marisa.
Ang doktor nahibulong mao nga iyang gipaadto sila sa plataporma aron interbiyohon. Human maasoy ni Marisa ang pagtuon sa mga doktor sa sakit ni Camila ug sa mga tambal nga ilang nasulayan, ang doktor miingon: “Ang ubang inahan maguol na pag-ayo bisag gitrangkaso lang ang ilang anak. Apan ikaw nagpabiling positibo bisag pito ka tuig na mong naningkamot sa pagpatambal kang Camila. Unsay hinungdan niana?”
Sa pagtubag, gisuginlan ni Marisa ang mga nanambong sa iyang binase-sa-Bibliya nga paglaom bahin sa matarong nga bag-ong kalibotan diin ang sakit ug pag-antos, ug bisan ang kamatayon, mawala na. (Isaias 33:24; Pinadayag 21:3, 4) Dayon, gihubit ni Marisa ang tibuok-kalibotang panag-igsoonay nga natagamtam sa mga Saksi ni Jehova ug iyang gisaysay kon sa unsang paagi ang ilang gugma sa usag usa nakatabang kanila sa pagsagubang sa mga pagsulay ug sa ubang kalisdanan.—Juan 13:35.
Human sa programa, usa ka babaye ang miduol kang Marisa ug mihangyo nga sultihan siyag dugang bahin sa mga punto nga gihisgotan niini. Kay gustong makabatog kahibalo, gidawat sa babaye ang libreng pagtuon sa Bibliya sa balay, nga gitanyag sa mga Saksi ni Jehova sa mga tawo nga gustong makasabot sa Bibliya ug sa kahibulongang katuyoan sa Diyos alang sa katawhan.
[Hulagway sa panid 25]
Otso-anyos nga si Camila uban sa iyang inahan nga si Marisa