GITAS-ON SA KINABUHI

Ang orihinal nga katuyoan sa Diyos mao nga ang tawo mabuhi sa walay kataposan. Ingong hingpit, ang unang tawo nga si Adan may kahigayonan nga makapahimulos ug taas nga kinabuhi nga dili matapos, basta magmasinugtanon lamang ngadto sa Diyos. (Gen 2:15-17) Hinunoa, tungod sa pagkadili-masinugtanon, nawala ni Adan ang maong kahigayonan, ug gikan kaniya napanunod sa tanang tawhanong rasa ang sala ug kamatayon.—Rom 5:12.

Sa Panahon sa mga Patriarka. Sa wala pa ang Lunop, ang gitas-on sa kinabuhi halos miabot ug usa ka libo ka tuig. (Gen 5:5-29) Ang mga tawo nga duol pa sa kahingpitan nakapahimulos ug mas taastaas nga kinabuhi kay sa niadtong halayo na gikan niana. Ang kinadugayang nabuhi nga tawo nga narekord mao si Matusalem, nga nabuhi ug 969 ka tuig. Human sa Lunop, ang gitas-on sa kinabuhi sa tawo kusog nga mius-os.

Ang pipila nagtuo nga ang usa ka tuig sa kapanahonan sa wala pa ang Lunop maoy usa lamang ka bulan ang gitas-on. Hinunoa, kini nga panglantaw wala paluyohi sa Kasulatan. Kon kana nga tuig maoy usa ka bulan nga may 30 ka adlaw, kini magkahulogan nga si Enos nahimong amahan nga wala pay otso anyos, ug ang uban, sama kang Kenan, Mahalalel, ug Enoc, nakabaton ug mga anak nga wala pay sayis anyos. (Gen 5:9, 12, 15, 21) Ang pagtandi sa Genesis 7:11 sa Genesis 8:3, 4 nagpakita nga ang 150 ka adlaw mikabat ug lima ka bulan. Tungod kay ang Bibliya naghisgot usab sa ika-10 nga bulan ug dayon sa usa ka 40 ka adlaw nga yugto ug labing menos sa duha ka 7 ka adlaw nga yugto nga milabay sa mao ra nga tuig, kini nagpakita nga ang tuig maoy 12 ka bulan ang gitas-on.—Gen 8:5, 6, 10, 12-14.

Sukad sa Panahon ni Moises. Mga 3,500 ka tuig kanhi, si Moises misulat maylabot sa gitas-on sa kinabuhi: “Ang mga adlaw sa among panuigon maoy kapitoan ka tuig; ug kon tungod sa talagsaong kabaskog kini maoy kawaloan ka tuig, bisan pa niana ang ilang pagpanlimbasog mosangpot lamang sa kasamok ug sa mga butang makapadaot.” (Sal 90:10) Kini nga kahimtang wala gayod mausab.

Latas sa kasiglohan, ang mga paningkamot sa tawo sa pagpalugway sa gitas-on sa iyang kinabuhi wala magmalamposon. Apan sa daghang kayutaan ang gidahom nga gitas-on sa kinabuhi miuswag. Busa, si James Fries ug Lawrence Crapo miingon: “Ang aberids nga gitas-on sa kinabuhi sa Tinipong Bansa miuswag gikan sa gibanabanang 47 ka tuig sa pagsugod niining sigloha [ang ika-20 nga siglo] ngadto sa kapin sa 73 ka tuig karong adlawa, usa ka pag-uswag nga kapin sa 25 ka tuig. . . . Apan ang mainampingong pag-usisa niini nga impormasyon nagpakita nga ang pag-uswag sa gidahom nga gitas-on sa kinabuhi maoy gumikan sa pagkawagtang sa ahat nga kamatayon inay sa pagpalugway sa kinaiyanhong gitas-on sa kinabuhi.”—Vitality and Aging, 1981, pp. 74, 75.

Halos 2,000 ka tuig kanhi si Jesu-Kristo nag-ingon nga walay tawo ang “makadugang ug usa ka maniko sa gitas-on sa iyang kinabuhi.” (Luc 12:25) Apan si Jesus usab miingon: “Ang mga butang nga imposible sa tawo maoy posible sa Diyos.” (Luc 18:27) Pinaagi ni manalagnang Isaias, ang Diyos mitagna: “Ang mga adlaw sa akong katawhan mahisama sa mga adlaw sa usa ka kahoy.” (Isa 65:22) Ug gitagna sa Isaias 25:8 nga ang Diyos ‘magalamoy gayod sa kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong.’ Kining saara gisubli diha sa kataposang basahon sa Bibliya: ‘Ug pagapahiran sa Diyos ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa.’—Pin 21:4.

[Chart sa panid893]

GITAS-ON SA KINABUHI SA MGA PATRIARKA

Ngalan

Genesis

Gitas-on sa Kinabuhi

Adan

5:5

930

Set

5:8

912

Enos