MANANABANG

Ang Hebreohanong termino sa “mananabang” maoy usa ka feminine participle sa berbong ya·ladhʹ (manganak) ug busa sa literal nagtumong sa usa ka babaye nga motabang sa pagpahimugso o sa pagpanganak sa usa ka bata. (Tan-awa ang PAGPANGANAK.) Ang usa ka mananabang motabang sa inahan panahon sa kalisdanan sa pagbati, ug sa dihang matawo na ang bata iyang putlon ang pusod ug hugasan ang masuso. Sa karaang kapanahonan iyang hilogan usab kini ug asin ug puston kini ug mga bakbak.​—Eze 16:4.

Ang suod nga mga higala o mga paryente ug ang tigulang nga mga babaye sa komunidad usahay maoy mobuhat niini, apan tungod kay gikinahanglan ang linaing kahibalo, kabatid, ug kasinatian, ilabina kon lisod ang pagpanganak, ang pagpanabang gihimong propesyon sa pipila. Mahitungod sa pagpanganak kang Benjamin, sa dihang “naglisod [si Raquel] sa pagpanganak,” ang mananabang nagpasalig kang Raquel nga siya makabaton ug usa ka anak nga lalaki, bisan tuod nga si Raquel namatay. (Gen 35:16-19) Panahon sa malisod nga pagpanganak sa kaluhang anak ni Tamar nga si Perez ug Zera, ang mananabang alisto sa pagbutang ug ilhanan sa usa nga iyang gidahom nga mao ang panganay. Siya dalidaling naghikot ug sanag-pulang higot sa migula nga kamot ni Zera. Apan, ang iyang kamot milugnot pagbalik sa sulod ug ang iyang igsoon maoy unang migula, nga tungod niana nasisi ang batadbatad sa ilang inahan.​—Gen 38:27-30.

Ang mga mananabang taliwala sa mga Israelinhon panahon sa ilang pagkaulipon sa Ehipto nakasinati sa malisod ug peligrosong kahimtang. Gipatawag ni Paraon ang duha kanila, si Sipra ug Pua, ug gisugo sila sa pagpatay sa tanang Hebreohanon nga batang lalaki sa dihang kini ipanganak na. Lagmit nga kining duha ka babaye nag-alagad ingong mga dakodako sa maong propesyon ug maoy responsable sa pagpahibalo sa mga mando sa hari ngadto sa ilang mga kaubanan. Apan, “ang mga mananabang nahadlok sa matuod nga Diyos, ug sila wala mobuhat sumala sa gisulti kanila sa hari sa Ehipto, apan ilang gitipigang buhi ang mga batang lalaki.” Tungod niini sila gipatawag aron manubag kang Paraon, kinsa misukmat: “Nganong gibuhat man ninyo kini?” Kay nagpakaaron-ingnon nga sila walay mahimo sa mga butang nga nahitabo, sila miinsistir nga ang mga babayeng Hebreohanon maoy “mapiskay” ug nanganak ‘sa wala pa moabot ang mananabang’ ngadto kanila. (Ex 1:15-19) Tungod kay kini nga mga mananabang nahadlok kang Jehova ug nagdumili sa pagpatay sa mga bata, gipanalanginan niya sila ug gigantihan pinaagi sa paghatag kanila ug kaugalingong mga panimalay.​—Ex 1:​20, 21.