Among mga Magbabasa Nangutana
Giuyonan ba sa Diyos ang Pagbaton ug Daghang Asawa?
Wala. Sa dihang gihiusa sa Diyos ang unang magtiayon sa Eden, iyang katuyoan nga ang lalaki magbaton lamang ug usa ka asawa. Ang maong katuyoan gisulti pag-usab ni Jesu-Kristo sa iyang mga sumusunod.—Genesis 2:18-24; Mateo 19:4-6.
Dili ba si Abraham, Jacob, David, ug Solomon kaniadto dunay daghang asawa? Oo, apan unsay gisulti sa Bibliya bahin niana? Gipadayag sa Bibliya nga kana miresultag mga problema ug dili pagsinabtanay sa mga pamilya ni Abraham ug Jacob. (Genesis 16:1-4; 29:18–30:24) Sa ulahi, ang Balaod sa Diyos nagsugo sa matag hari: “Dili . . . siya magpadaghan ug mga asawa alang sa iyang kaugalingon, aron ang iyang kasingkasing dili motipas.” (Deuteronomio 17:15, 17) Wala sunda ni Solomon ang maong balaod ug siya nagminyog kapin sa 700 ka asawa! Ikasubo, ang kasingkasing ni Solomon mitipas gayod gikan sa pagsimba kang Jehova tungod sa daotang impluwensiya sa iyang mga asawa. (1 Hari 11:1-4) Busa, tin-aw nga ang Bibliya wala magdasig sa pagpangasawag daghan o poligamiya.
Apan, lagmit ang pipila natingala kon nganong gipalabay sa Diyos nga magbatog daghang asawa ang iyang mga alagad. Tagda kini: Aduna ka bay gamit nga angay na untang ilisdan apan imo lang gihapong gigamit tungod kay dili pa praktikal nga ilisdan kini? Siyempre, ang pamaagi ug panghunahuna sa Diyos labaw kay sa atoa. (Isaias 55:8, 9) Apan, tingali may mga rason kon nganong gipalabay una sa Diyos ang poligamiya kaniadto.
Hinumdomi nga sa Eden, si Jehova nagsaad ug usa ka “binhi” nga maglaglag kang Satanas. Sa ulahi, si Abraham gisaaran nga siya mahimong amahan sa usa ka dakong nasod ug nga ang gisaad nga Binhi maggikan sa iyang banay. (Genesis 3:15; 22:18) Determinado gayod si Satanas nga babagan ang pagtungha sa maong Binhi. Busa, gusto niyang puohon ang karaang nasod sa Israel. Kanunay niyang gitental ang mga Israelitas sa pagpakasala aron mawad-an silag pag-uyon ug proteksiyon sa Diyos.
Aron matabangan ang mga Israelitas batok sa mga lit-ag ni Satanas, daghang higayon nga si Jehova nagpadalag mga propeta sa pagpasidaan kanila ilabina sa dihang sila misugod na sa pagtipas gikan sa iyang matarong nga mga sukdanan. Bisan pa niana, ang Diyos nahibalo nga ang iyang katawhan pirme gayong mapakyas sa pagsunod kaniya, bisan sa sayon nga mga balaod, sama sa dili pagsimbag mga idolo. (Exodo 32:9) Kon sila nalisdan sa pagsunod sa labing sayon nga balaod, unsa pa kaha ang balaod bahin sa pagdili sa poligamiya? Kay si Jehova nakasabot gayod sa kinaiyahan sa tawo, iyang nakita nga dili pa panahon nga idili ang maong buhat, nga dugay nang ginahimo sa mga tawo kaniadto. Kon gidili pa sa Diyos ang poligamiya niadtong mga panahona, dali ra untang matental ni Satanas ang mga Israelitas sa pagpakasala.
Ang temporaryong pagpalabay sa Diyos sa poligamiya naghatag ug mga kaayohan. Nakatabang kini sa pagdaghan sa mga tawo. Ang dakong populasyon nakatabang aron maseguro nga dili mapuo ang nasod hangtod sa pag-abot sa Mesiyas. Lagmit ang poligamiya nakahatag usab ug proteksiyon sa pipila ka babaye tungod kay sila nakabatog puy-anan ug pamilya sa maong peligrosong mga panahon.
Apan, hinumdomi nga dili si Jehova ang nagmugna sa poligamiya. Bisan pag iya kining gipalabay sulod sa pipila ka panahon, siya naghatag ug balaod aron kini makontrolar. (Exodo 21:10, 11; Deuteronomio 21:15-17) Sa dihang mihukom na si Jehova sa pagtapos sa maong buhat, iyang gigamit ang iyang Anak aron matino pag-usab ang iyang sukdanan bahin sa kaminyoon nga una niyang gisulti didto sa Eden. Busa gidili ni Jesus ang poligamiya sa iyang mga sumusunod. (Marcos 10:8) Dayon, kini nga kamatuoran mas natin-aw pa: Ang Balaod ni Moises maayo, apan ang “balaod ni Kristo” maoy labi pang maayo.—Galacia 6:2.