TUBAG SA MGA PANGUTANA BAHIN SA BIBLIYA

Posible bang masabtan ang Bibliya?

Ang Bibliya maoy Pulong sa Diyos. Sama kinig sulat gikan sa usa ka mahigugmaong amahan. (2 Timoteo 3:16) Sa Bibliya, gipatin-aw sa Diyos kon sa unsang paagi siya mapahimut-an, kon nganong gitugotan niya ang pagkadaotan, ug kon unsay iyang buhaton sa umaabot alang sa katawhan. Apan ang mga magtutudlo sa relihiyon nagtuis sa pagtulon-an sa Bibliya; busa, daghan ang nagtuo nga dili gayod sila makasabot niana.​—Buhat 20:29, 30.

Buot ni Jehova nga Diyos nga mahibaloan nato ang kamatuoran bahin kaniya. Tungod niana, iyang gihatag kanato ang usa ka basahon nga posibleng masabtan.​—Basaha ang 1 Timoteo 2:3, 4.

Sa unsang paagi nimo masabtan ang Bibliya?

Gawas sa paghatag sa Bibliya, si Jehova nagtaganag tabang aron masabtan kini. Iyang gipadala si Jesus sa pagtudlo kanato. (Lucas 4:16-21) Gitabangan ni Jesus ang iyang mga mamiminaw nga masabtan ang Kasulatan, nga nagkutlog lainlaing teksto.​—Basaha ang Lucas 24:27, 32, 45.

Gitukod ni Jesus ang Kristohanong kongregasyon aron mapadayon ang buluhatong gisugdan niya. (Mateo 28:19, 20) Karon, ang matuod nga mga sumusunod ni Jesus nagtabang sa mga tawo nga masabtan ang gitudlo sa Bibliya bahin sa Diyos. Kon gusto nimong masabtan ang Bibliya, ang mga Saksi ni Jehova malipay sa pagtabang nimo.​—Basaha ang Buhat 8:30, 31.