Ang Uban Natinuod, Pero Daghan ang Wala

Gusto ka bang mahibalo sa imong kaugmaon? Daghan ang interesadong mahibalo sa ilang kaugmaon. Dunay mga naghimog prediksiyon bahin sa umaabot. Tagda ang mosunod:

• MGA SIYENTISTA Sila naggamit ug modernong teknolohiya ug daghang salapi aron mohimog mga prediksiyon, sama sa kon unsay epekto sa polusyon diha sa yuta sa umaabot ug kon moulan ba pagkaugma.

• MGA PROPESYONAL NGA ANALISTA Ilang tagnaon ang dagan sa negosyo ug politika. Si Warren Buffett, usa sa mga kinadatoan sa kalibotan, gitawag ug propeta tungod sa iyang kalamposan sa pagpamuhonan sa negosyo. Si Nate Silver nag-analisar ug mga estadistika aron makahimog mga prediksiyon, gikan sa politika sa U.S.A. ngadto sa kon kinsay makadawat ug mga award sa Hollywood.

• KARAANG MGA SINULAT Giisip kini ingong mga tagna. Ang dili tin-awng mga sinulat ni Michel de Notredame (Nostradamus) sa ika-16 nga siglo gituohang nagakatuman karon. Ang usa ka siklo sa kalendaryo sa mga Maya nga natapos sa Disyembre 21, 2012, gituohan sa uban ingong tilimad-on sa kataposan sa kalibotan.

• MGA LIDER SA RELIHIYON Sila usahay motagna ug tibuok kalibotang kalamidad sa pagpasidaan sa mga tawo ug sa pagbaton ug mga sumusunod. Si Harold Camping ug ang iyang mga sumusunod nagpahibalo nga ang kalibotan matapos sa 2011. Pero naa pa gihapon karon ang kalibotan.

• MGA PSYCHIC Sila nangangkon nga duna silay espesyal nga katakos sa pagtagna sa umaabot. Si Edgar Cayce ug Jeane Dixon nakahimog pipila ka tukmang prediksiyon sa mahitabo sa ika-20ng siglo. Apan daghan sab sa ilang prediksiyon wala matinuod. Pananglitan, si Dixon nagtagna nga mobuto ang Gubat sa Kalibotan III sa 1958, ug si Cayce miingon nga ang New York maunlod sa kadagatan sa tungatunga sa dekada sa 1970.

Duna ba gayoy kasaligang paagi nga makita ang umaabot? Importante kana nga pangutana. Kon mahibalo ka daan sa umaabot, posibleng makaapektar kana sa imong kinabuhi ug mga desisyon.