Ang Labing Maayong Pagtandi nga Imong Mahimo

GIISIP ba nimo nga Kristohanon ka? Kon mao, apil ka sa kapig duha ka bilyong tawo—halos 1 sa matag 3—nga nag-angkong mga sumusunod ni Kristo. Libolibong relihiyon karon gitawag ug mga Kristohanon, pero nagkasumpaki ang ilang mga doktrina ug mga panglantaw. Busa ang imong tinuohan tingali lahi kaayo sa ubang nag-angkong Kristohanon. Importante ba gayod kon unsay imong tuohan? Oo—kon gusto kang mosunod sa Kristiyanidad nga gitudlo sa Bibliya.

Ang unang mga sumusunod ni Jesu-Kristo nailhang mga “Kristohanon.” (Buhat 11:26) Sila wala na magkinahanglag laing ngalan aron mailhan, kay usa ra man ang Kristohanong pagtuo kaniadto. Ang mga Kristohanon nagkahiusa sa pagsunod sa pagtulon-an ug giya sa Magtutukod sa Kristiyanidad, si Jesu-Kristo. Komosta ang imong relihiyon? Nagtuo ka ba nga ang imong relihiyon nagtudlo sa kon unsay gitudlo ni Jesus ug sa gituohan sa unang mga sumusunod ni Kristo? Sa unsang paagi ka makaseguro? Dunay usa lang ka paagi—ang paggamit sa Bibliya ingong basehanan.

Palandonga kini: Si Jesu-Kristo nagtahod gayod sa Kasulatan ingong Pulong sa Diyos. Supak siya niadtong nagpakamenos sa pagtulon-an sa Bibliya kay ilang giuna ang mga tradisyon nga hinimog tawo. (Marcos 7:9-13) Nan, kita makaingon nga ang tinuod nga mga sumusunod ni Jesus kinahanglang magbase sa ilang mga pagtulon-an diha sa Bibliya. Busa ang matag Kristohanon angayng mangutana sa iyang kaugalingon, ‘Ang pagtulon-an ba sa akong simbahan nahiuyon sa Bibliya?’ Sa pagtubag, nganong dili nimo itandi ang pagtulon-an sa imong simbahan nianang gitudlo sa Bibliya?

Si Jesus miingon nga ang atong pagsimba sa Diyos kinahanglang ibase sa kamatuoran, ug kana nga kamatuoran makita sa Bibliya. (Juan 4:24; 17:17) Ug si apostol Pablo miingon nga ang atong kaluwasan nagdepende sa atong pagkuhag “tukmang kahibalo sa kamatuoran.” (1 Timoteo 2:4) Busa importante nga ang atong pagtulon-an kinahanglang ibase sa tukmang kamatuoran sa Bibliya. Ang atong kaluwasan nagdepende niana!

KON UNSAON PAGTANDI ANG PAGTULON-AN SA IMONG SIMBAHAN NIANANG SA BIBLIYA

Gidapit ka namo sa pagbasa sa unom ka pangutana sa panid 14 ug 15, ug tan-awa ang tubag sa Bibliya niini nga mga pangutana. Basaha ang mga teksto nga gikutlo, ug palandonga ang mga tubag. Dayon pangutan-a ang imong kaugalingon, ‘Unsay gitudlo sa akong simbahan kon itandi sa giingon sa Bibliya?’

Kining mubo nga pasulit makatabang kanimo sa paghimog mapuslanong pagtandi. Andam ka ba sa pagtandi sa ubang pagtulon-an sa imong simbahan nianang gitudlo sa Bibliya? Ang mga Saksi ni Jehova malipay sa pagtabang nimo sa pagsusi sa tin-awng kamatuoran sa Bibliya. Makahangyo ka sa mga Saksi ni Jehova ug libreng pagtuon sa Bibliya. O tan-awa ang website nga jw.org/ceb.

1 PANGUTANA: Kinsa ang Diyos?

TUBAG: Si Jehova, ang Amahan ni Jesus, mao ang Diyos sa walay kataposan ug ang labing gamhanang Maglalalang sa tanang butang.

ANG GIINGON SA BIBLIYA:

“Nagpasalamat kami kanunay sa Diyos nga Amahan sa atong Ginoong Jesu-Kristo sa dihang nagaampo kami alang kaninyo.”—Colosas 1:3.

“Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang.”—Pinadayag 4:11.

Basaha usab ang Roma 10:13; 1 Timoteo 1:17.

2 PANGUTANA: Kinsa si Jesu-Kristo?

TUBAG: Si Jesus ang panganayng Anak sa Diyos. Si Jesus gilalang, ug busa siya dunay sinugdanan. Si Jesus mas ubos kay sa Diyos ug nagtuman sa Iyang kabubut-on.

ANG GIINGON SA BIBLIYA:

“Ang Amahan labaw pa kay kanako.”—Juan 14:28.

“[Si Jesus] mao ang larawan sa dili-makita nga Diyos.”—Colosas 1:15.

Basaha usab ang Mateo 26:39; 1 Corinto 15:28.

3 PANGUTANA: Unsa ang balaang espiritu?

TUBAG: Ang balaang espiritu maoy usa ka puwersa nga gigamit sa Diyos sa pagtuman sa iyang katuyoan. Dili kini persona. Ang mga tawo mapuno sa balaang espiritu ug makadawat ug gahom.

ANG GIINGON SA BIBLIYA:

“Dihang nadungog ni Elisabet ang pangomosta ni Maria, ang bata sulod sa iyang tagoangkan miulpot; ug si Elisabet napuno sa balaang espiritu.”—Lucas 1:41.

‘Kamo makadawat ug gahom sa dihang ang balaang espiritu mokunsad kaninyo.’—Buhat 1:8.

Basaha usab ang Genesis 1:2; Buhat 2:1-4; 10:38.

4 PANGUTANA: Unsa ang Gingharian sa Diyos?

TUBAG: Ang Gingharian sa Diyos maoy usa ka gobyerno sa langit. Si Jesus maoy Hari sa Gingharian sa Diyos. Sa dili madugay, tumanon niini nga Gingharian ang kabubut-on sa Diyos sa tibuok yuta.

ANG GIINGON SA BIBLIYA:

“Ang ikapitong manulonda mihuyop sa iyang trompeta. Ug dihay makusog nga mga tingog sa langit, nga nag-ingon: ‘Ang gingharian sa kalibotan nahimo nang gingharian sa atong Ginoo ug sa iyang Kristo, ug siya magamando ingong hari hangtod sa kahangtoran.’”—Pinadayag 11:15.

Basaha usab ang Daniel 2:44; Mateo 6:9, 10.

5 PANGUTANA: Ang tanan bang maayong tawo moadtog langit?

TUBAG: Dili. “Gamayng panon” lang sa matinumanong mga tawo ang gipili sa Diyos sa pag-adtog langit. Sila maghari uban kang Jesus.

ANG GIINGON SA BIBLIYA:

“Ayaw kahadlok, gamayng panon, tungod kay giuyonan sa inyong Amahan ang paghatag kaninyo sa gingharian.”—Lucas 12:32.

“Sila mahimong mga saserdote sa Diyos ug sa Kristo, ug magamando ingong mga hari uban kaniya.”—Pinadayag 20:6.

Basaha usab ang Pinadayag 14:1, 3.

6 PANGUTANA: Unsay katuyoan sa Diyos alang sa yuta ug sa katawhan?

TUBAG: Ubos sa Gingharian sa Diyos, ang yuta mahimong usa ka paraiso ug ang matinumanong mga tawo makatagamtam ug hingpit nga panglawas, permanenteng kalinaw, ug walay kataposang kinabuhi.

ANG GIINGON SA BIBLIYA:

“Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”—Salmo 37:10, 11.

“Iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”—Pinadayag 21:3, 4.

Basaha usab ang Salmo 37:29; 2 Pedro 3:13.