Moses Me Aaron Ra Chuuri Farao

LUPWEN Moses a liwinló Isip, a ereni pwiin we Aaron usun ekkewe manaman. Iwe, lupwen Moses me Aaron ra áiti ngeni ekkewe chón Israel ekkewe manaman, meinisin ekkewe aramas ra lúkú pwe Jiowa a nónnóm rer me rúúemén.

Mwirin, Moses me Aaron ra ló chuuri Farao. Ra ereni: ‘Jiowa, ewe Koten Israel a apasa, “Kopwe mut ngeni nei kewe aramas ar repwe sái úlúngát rán pwe repwe fel ngeniei lón ewe fénúpéén.”’ Nge Farao a pélúweni: ‘Use ngang lúkú Jiowa. Iwe, usap pwal mut ngeni Israel an epwe feiló.’

Farao a song, pún ekkewe aramas ra mochen ekis asésé seni ar angang fán iten ar repwe fel ngeni Jiowa. Iwe, ra eriániir ar repwe angang weires lap seni lóóm. Ekkewe chón Israel ra tipi ngeni Moses pwe tipisin ar ra kúna riáfféú, iwe Moses a letipechou. Nge Jiowa a ereni pwe esap lólilen. Jiowa a apasa: ‘Upwe aota pwe Farao epwe angasaaló nei kewe aramas.’

Moses me Aaron ra ló chuursefáli Farao. Nge lón ei fansoun ra féri eú manaman. Aaron a oturatiw wokun we, iwe a wiliti emén serepenit watte. Nge ekkewe mwán mi tipachem mi nóm ren Farao ra pwal oturatiw wokur kewe, iwe ra wiliiti serepenit. Nge, nengeni! Néún Aaron we serepenit a ocheei néún ekkewe mwán tipachem kewe serepenit. Nge, Farao ese pwal mochen mut ngeni ekkewe chón Israel ar repwe feiló.

Iwe, a tori ewe fansoun lupwen Jiowa epwe áiti ngeni Farao eú lesen. Ka silei ifa usun an a féri ei mettóch? A féri ren an atoto ngeni Isip 10 riáfféú, are fitikoko lapalap.

Mwirin an a wes ekkewe chómmóng riáfféú, Farao a tiiti Moses, iwe a apasa: ‘Aúkaló mwo ewe riáfféú, iwe upwe mut ngeni Israel an epwe ló.’ Nge lupwen an a kaúló ewe riáfféú, Farao a kan sissiwili an ekiek. Esap mut ngeni ekkewe aramas ar repwe feiló. Nge, mwirin ewe áengolun riáfféú, Farao a tiinaaló ekkewe chón Israel.

En mi silei eú me eú ekkewe 10 riáfféú? Suuk ngeni ena eché, iwe, sipwe káé usur.