Pwal Wonu Riáfféú

Moses me Aaron ra feiló ereni Farao alon Kot ei: ‘Iká kese mut ngeni nei aramas ar repwe feiló, úpwe tiinaato gadfly lón ewe fénú.’ Ena gadfly emén man mi chachchang me kúkkúk. Ekkewe pwiin gadfly ra tolong lón meinisin imwen ekkewe chón Isip. Unusen ewe fénú a kuuló ren gadfly. Nge lón ewe fénú Kosen, ikewe ekkewe chón Israel ra nóm ie, ese wor gadfly. Ena arúáánúún riáfféú, a chék efeiengawa ekkewe chón Isip. Farao a ereni Moses an epwe tingormaw ngeni Jiowa an epwe asúoló ekkewe gadfly. Iwe néún kewe aramas ra tongeni feiló. Nge atun Jiowa a asúoló ekkewe gadfly, Farao a siwili an ekiek. Óm ekiek Farao a káé lesen seni met a fis?

Jiowa a erá: ‘Iká Farao ese mut ngeni nei aramas ar repwe feiló, ekkewe man lón Isip repwe semmwen me máló.’ Sorotáán, ekkewe man ra máló. Nge néún ekkewe chón Israel man rese máló. Ikáámwo ina, nge Farao a chúen lúkúmach me ese fangetá.

Mwirin Jiowa a ereni Moses an epwe liwinló ren Farao me tukeei ewe falangen ekkei me maneetá. Iwe ewe falang a ásifetál lón ásepwál me a feitiw wóón meinisin ekkewe chón Isip. Ena falang a efisi rup wóón meinisin chón Isip me néúr kewe man me a fókkun metek. Ikáámwo ina, nge Farao ese mut ngeni ekkewe chón Israel ar repwe feiló.

Jiowa a tiinaalósefál Moses ren Farao pwe epwe ereni alon ei: ‘Kese fangetá óm kopwe mut ngeni nei kewe aramas ar repwe feiló? Lesor úpwe épúngatiw útten faw wóón ewe fénú.’ Sorotáán ena rán, Jiowa a tiinatiw útten faw, chopulap, me ekkei. Ina eú ásepwál mi eniweniw chón Isip repwe kerán kúna. Meinisin ekkewe irá me uwaan ar kewe atake ra ta, nge ekkewe lón Kosen rese ta. Farao a erá: ‘Tingormaw ngeni Jiowa an epwe aúkaretiw! Iwe oua tongeni feiló.’ Nge atun chék a kaúló ewe útten faw me ewe rán, Farao a pwal siwili an ekiek.

Mwirin Moses a erá: ‘Iei ekkewe nifichifichimas repwe áni ekkewe lusun irá ewe ásepwál ese atareló.’ Fite million nifichifichimas ra áni meinisin ekkewe lusun wóón ekkewe irá me lón ekkewe atake. Farao a ereni Moses an epwe tingormaw ngeni Jiowa an epwe tiinaaló ekkewe nifichifichimas. Nge pwal mwo nge mwirin án Jiowa asúoló ekkewe nifichifichimas, Farao a chúen lúkúmach.

Jiowa a ereni Moses: ‘Kopwe eitietá poum fán láng.’ Mwittir chék, a rocholó fán láng. Ren úkúúkún úlúngát rán ekkewe chón Isip rese tongeni kúna och mettóch are emén. Ekkewe chék chón Israel a saram lón leenier we.

Farao a ereni Moses: ‘En me noum kewe aramas oua tongeni feiló. Nge oupwe chék likiti néúmi kewe man ikeei.’ Moses a erá: ‘Áúpwe pwal uwei néúm kewe man pwe áúpwe tongeni eáni asor ngeni ám we Kot.’ Farao a fókkun song. A púchér ngeni me erá: ‘Sú seniei! Iká úpwe kúnók sefál, úpwe nikoló.’