Emén Farao Mi Ngaw A Nemeni Isip

EKKEEI mwán ra eriáni ekkeei aramas pwe repwe angang. Nengeni mwo ei mwán mi awata ngeni emén ekkeei chón angang ei sál! Ekkeei chón angang, iir seni án Jakop we eterenges, iwe, ra iteni chón Israel. Nge ekkeei mwán mi eriániir ar repwe angang, iir chón Isip. Ekkewe chón Israel ra fen wiliti néún chón Isip chón angang. A ifa usun an a fis ei mettóch?

Ren chómmóng ier, án Jakop we famili a manaw kinamwe lón Isip. Josef, ewe mi wiseni ewe wis nampa ruu fán Farao lón Isip, a kan túmúnúúr. Iwe nge, Josef a máló me ewe Farao a pwal máló. Iwe, met a fis? Emén mineféén Farao, ese sani ekkewe chón Israel, a wiliti kingen Isip.

Iwe, ei Farao mi ngaw a néúni ekkewe chón Israel chón angang. A pwal ewisa ngeni ekkewe mwán mi kirikiringaw me arochongaw ar repwe wisen mammaser. Ra eriáni ekkewe chón Israel ar repwe angang weires le aúetá telinimw fán iten Farao. Nge, ekkewe chón Israel ra chúen chék chóchchómmóngóló. Mwirin och fansoun, ekkewe chón Isip ra niwokkus pwe ekkewe chón Israel repwe kon chómmóngóló pwal péchékkúl.

Ka silei met Farao a féri? A ereni ekkewe fin anéúnéú mi kan anéúnéwú ekkewe fin Israel: ‘Oupwe nieló meinisin át mi uputiw.’ Nge ekkewe fefin, iir fefin múrinné, iwe rese nieló ekkewe ménúkol.

Ina minne, Farao a allúk ngeni meinisin néún kewe aramas: ‘Ou angei ekkewe ménúkol, ekkewe átin Israel, iwe nireló. Nge mut ngeni chék ekkewe kúkkún nengngin ar repwe manaw.’ Esap ina och allúk mi fókkun ngaw? Sipwe ppii ika ifa usun emén lein ekkewe kúkkún át a manaw.