Ar Feiló Lukanapen Ewe Setipar

NENGENI ena mettóch mi fis! Ina i Moses fán wokun we a eitaaló wóón ewe Setipar. Ekkena mi nónnóm ren ena epek mi kúna túmún, iir ekkewe chón Israel. Nge Farao me unusen an we mwichen sounfiu repwele mwalum lón ewe sáát. Sipwe ppii ifa usun an a fis ei mettóch.

Usun sia fen káé, Farao a ereni ekkewe chón Israel pwe repwe feiló seni Isip mwirin án Kot tiinatiw ewe áengolun riáfféú wóón ekkewe chón Isip. Órun 600,000 re Israel pwal chómmóng fefin me semirit ra ló. Eú mwichen aramas mi chóchó, iir kewe mi wiliti chón lúkú Jiowa, ra pwal fitaaló ekkewe chón Israel. Iir meinisin ra uwei néúr kewe siip, siike me kou.

Nge mwen ar we ra ló, ekkewe chón Israel ra tingorei ekkewe chón Isip úf me ekkewe pisek mi ffér seni kolt me silifer. Ekkewe chón Isip ra fókkun niwokkus pokiten ewe sáingoon riáfféú mi toriir. Ina pwata ra ngeni ekkewe chón Israel meinisin ekkewe mettóch ra tingorer.

Mwirin ekkóch rán, ekkewe chón Israel ra tori ewe Setipar. Ra asésé ikena ie. Lón ena atun, Farao me néún kewe aramas ra meefi pwe a solap ar ra mut ngeni ekkewe chón Israel ar repwe feiló. Ra erá: ‘Sia fen mut ngeni néúch kewe chón angang ar repwe feiló senikich!’

Iwe, Farao a siwili an ekieksefál. A mwittir ammólnatá waan we wokenin maun me an we mwichen soufiu. Iwe, a poputá le chei ekkewe chón Israel fán 600 waan kewe woken mi kkóló, me meinisin waar kewe woken lón Isip.

Lupwen ekkewe chón Israel ra kúna Farao me an we mwichen soufiu ar ra cheer, ra fókkun niwokkus. Ese wor ar alen ngaseló. Ewe Setipar a nóm en epek, iwe ekkewe chón Isip ra ssássáto me ewe epek. Nge Jiowa a anómu eú kuchu lefilen néún kewe aramas me ekkewe chón Isip. Ina minne ekkewe chón Isip rese tongeni kúna ekkewe chón Israel ren ar repwe maun ngeniir.

Iwe, Jiowa a ereni Moses an epwe eitieló wokun wóón ewe Setipar. Lupwen an a ina usun, Jiowa a efisatá och ásepwál mi péchékkúl seni étiw an epwe enien. A kinikinfesen ewe sáát, iwe ewe sáát a kaúló lepekin me rúúepek.

Mwirin, ekkewe chón Israel ra poputá le fetál lukanapen ewe sáát wóón fénú mi pwas. Mwirin fitu awa, ekkewe fite million aramas ra fetálelóng lefilen ewe sáát tori ewe epek, iir fengen me meinisin néúr kewe man. Iwe mwirin, ekkewe chón Isip ra tongeni kúnasefáli ekkewe chón Israel. Néúr kewe chón angang repwele sú seniir! Ina popun, ra mwittir ssálong mwiriir lón ewe sáát.

Lupwen ra ssálong, Kot a atomwa taian waar kewe woken. Ekkewe chón Isip ra fókkun niwokkus, iwe, ra poputá le púchérútá: ‘Jiowa a fiu ngenikich fán iten ekkewe chón Israel. Sia sú seni ikeei!’ Nge a sser lupwan.

Iei ewe atun Jiowa a ereni Moses pwe epwe eitieló wokun we wóón ewe Setipar, usun en mi fen kúna lón ei lios. Iwe lupwen Moses a eitieló, ewe sáát a poputá le liwinfengen me pwélúoló ekkewe chón Isip me waar kewe woken. Unusen ewe mwichen soufiu ra fen tapweló mwirin ekkewe chón Israel lón ewe sáát. Iwe, ese wor emén me lein ekkewe chón Isip a manaw!

A ifa me pwapwaan meinisin néún Kot kewe aramas pokiten ra manaw! Ekkewe mwán ra eáni eché kélún kilisou ngeni Jiowa, ra kélú: ‘Jiowa a fen winneni eú win mi ling. A fen oturalong lón ewe sáát ekkewe oris me ekkewe mi wawa.’ Fefinen Moses we Miriam, a angei néún we pisekin ettik, me meinisin ekkewe fefin ra tapweló mwirin fán néúr kewe pisekin ettik. Iwe, lupwen ra pwérúk fán pwapwa, ra eáni ewe chék kél ekkewe mwán ra pwal eáni: ‘Jiowa a fen winneni eú win mi ling. A fen oturalong lón ewe sáát ekkewe oris me ekkewe mi wawa.’