Ewe Manaman Únúkkún ewe Setipar

Atun chék Farao a rong pwe ekkewe chón Israel ra ló seni Isip, a niamam ren an tiiniireló. A allúk ngeni néún kewe soufiu: ‘Oupwe ammólnatá meinisin wáái kewe woken pwe ousipwe tapweer! Itá sisap mut ngeniir ar repwe feiló.’ I me néún kewe soufiu ra poputá le tapwei ekkewe chón Israel.

Jiowa a emmweni néún kewe aramas ren an áeá eú kuchu lerán me eú ekkei lepwin. A emmweniireló ren ewe Setipar, me a ereniir ar repwe aúetá imwer tento.

Mwirin ekkewe chón Israel ra kúna pwe Farao me néún kewe soufiu ra tapweriir. Ra mwéch lefilen ewe sáát me ekkewe soufiun Isip. Ra kechiw ngeni Moses me erá: ‘Sipwele máló! Itá kopwe chék fen likitikemiiló lón Isip.’ Nge Moses a erá: ‘Ousap niwokkus. Oupwe witiwit me katol ifa ussun Jiowa epwe angasakicheló.’ Moses a fókkun lúkúlúk wóón Jiowa, iká met?

Jiowa a ereni ekkewe chón Israel ar repwe eppichaatiw imwer kewe tento pwe repwe mwékút. Lón ena pwinin, Jiowa a amwékútú ewe kuchu me a onómu lefilen ekkewe chón Isip me ekkewe chón Israel. A rocholó ikewe ekkewe chón Isip ra nóm ie. Nge ikewe ekkewe chón Israel ra nóm ie a saram.

Jiowa a ereni Moses an epwe eitiewu péún wóón ewe sáát. Mwirin Jiowa a aworato eú ásepwál mi péchékkúl me a ákkásepwál unusen ewe pwinin. Ewe sáát a imufesen, me a wor efóch al lukanapan. Ekkewe fite million chón Israel ra feilong lukanapen ewe sáát mi imufesen pwe repwe feiló ngeni ewe epek.

Néún Farao kewe soufiu ra tapwei ekkewe chón Israel lukanapen ewe sáát wóón ewe al mi pwás. Mwirin Jiowa a orukoruka ekkewe soufiu. A turuwu taian ekkewe woken. Ekkewe soufiu ra púchér me erá: ‘Sa towu me ikeei! Jiowa a fiu fán iter.’

Jiowa a ereni Moses: ‘Kopwe eitiewu poum wóón ewe sáát.’ Mwittir chék, ewe sáát a liwinfengen me a pwélúoló ekkewe soufiun Isip. Farao me néún kewe soufiu meinisin ra máló. Ese wor emén a manaw.

Lupwen ra towu me lón ewe sáát, ewe mwichemmóngun aramas ra kélún mwareiti Kot: “Üpwe köl ngeni ewe Samol mi Lapalap, pun an win a fokun amwarar. A aturalong lon ewe sät ewe oris me ewe mi wisen wawa.” Atun ar kél, ekkewe fefin ra pwérúk fán ar kewe pisekin kaktai. Meinisin ra fókkun pwapwa pwe iei ra wesewesen ngaseló.