Úlúngát me Lein Ekkewe Riáfféú

Ekkewe chón Isip ra eriáni ekkewe chón Israel le angang weires ussun slave. Jiowa a tiinaaló Moses me Aaron pwe repwe ereni Farao alon ei: ‘Kopwe mut ngeni nei aramas ar repwe feiló pwe repwe tongeni fel ngeniei lón ewe fénúpéén.’ Farao a lamalamtekia le apasa: ‘Úse pwal ekieki met Jiowa e erá, me úsapw mut ngeni ekkewe chón Israel ar repwe feiló.’ Mwirin Farao a wesen awatteeló ar angang weires. Jiowa epwele áiti Farao eú lesen. Ka silei epwe ifa ussun? A aworato ekkewe Engol Riáfféú lón Isip. Jiowa a ereni Moses: ‘Farao ese aúseling ngeniei. Lesossor epwe nóm ren ewe chénúpupu Nil. Kopwe feiló me ereni pwe pokiten ese mutawu nei aramas ar repwe feiló, unusen ewe konik lón Nil epwe wiliiti chcha.’ Moses a álleasochisi me feiló ren Farao. Farao a katol atun Aaron a opuni ewe chénúpupu Nil ngeni wokun we, iwe ewe chénúpupu a wiliiti chcha. Ena chénúpupu a pwóngaw, ekkewe iik ra máló, me rese chúen tongeni ún konik seni ewe chénúpupu Nil. Ikáámwo ina, nge Farao ese mut ngeni ekkewe chón Israel ar repwe feiló.

Mwirin fisu rán, Jiowa a tiinaalósefál Moses ngeni Farao pwe epwe ereni alon ei: ‘Iká kese mutawu nei aramas, Isip epwe uroló ren káirú. Aaron a eitietá wokun we, iwe ewe fénú a uroló ren káirú.’ Ekkewe aramas ra kúnékún káirú lón imwer, wóón ar peet, me lón sepier kewe. Ekis meinisin a chék wor káirú! Farao a ereni Moses an epwe tingorei Jiowa an epwe aúkatiw ei riáfféú. Farao a pwonei pwe epwe mut ngeni ekkewe chón Israel ar repwe feiló. Iwe, Jiowa a aúkatiw ewe riáfféú, me ekkewe chón Isip ra ionifengeni me ochukuchukatá ekkewe káirú. Ewe fénú a poputá le pwóngaw. Nge Farao ese pwal mutawu ekkewe aramas ar repwe feiló.

Mwirin Jiowa a ereni Moses: ‘Aaron epwe opuni ewe pwúl ren wokun we, iwe ewe tas epwe wiliiti nikken.’ Mwittir chék, a wor nikken ekis meinisin. Ekkóch néún Farao kewe aramas ra ereni: ‘Ei riáfféú a feito seni Kot.’ Ikáámwo ina, nge Farao ese pwal mutawu án ekkewe chón Israel repwe feiló.