PWÓRÓUS 32
Ekkewe 10 Riáfféú
NENGENI ekkeei lios. Eú me eú liosun ekkewe riáfféú Jiowa a tiinatiw wóón Isip. Lón ei áeúin lios ka tongeni kúna Aaron an a opuni ngeni ewe chénúpupu Nil wokun we. Lupwen a opuni, ewe konik lón ewe chénúpupu a wiliti chcha. Ekkewe iik ra máló, iwe ewe chénúpupu a poputá le pwómaacholó.
Mwirin, Jiowa a amwékútú ekkewe káirú ar repwe towu me lón ewe chénúpupu Nil. Ra nóm ekis meinisin, lón ekkewe leenien uum, lón ekkewe paan, wóón ar kewe peet, fókkun ekis meinisin. Lupwen ekkewe káirú ra máló, ekkewe chón Isip ra ochukuchukúretá tori an a wesewesen tekiatá, iwe ewe fénú a pwóngawóló ren ekkewe káirú mi má.
Mwirin, Aaron a opuni ngeni ewe pwul wokun we, iwe ewe súsú a wiliti tengngú. Ikena iir ekkewe kúkkún mansúsú mi kúkkúk. Ekkewe tengngú, ina ewe aúlúngátin riáfféú mi tori ewe fénú Isip.
Ekkewe riáfféú mwirin ra eriáfféwú ekkewe chék chón Isip, nge esap pwal ekkewe chón Israel. Ewe arúáánún, ina ewe riáfféú ren ekkewe watteen lóóng, iwe ra áásilóng lón meinisin imwen ekkewe chón Isip. Ewe enimuen riáfféú a kkúú ekkewe man. Chómmóng néún ekkewe chón Isip kewe kou, siip me siike ra máló.
Mwirin, Moses me Aaron ra angei och ewe súsúún falang, iwe ra amworatá lón ewe ásepwál. Ei mettóch a efisi mmach wóón ekkewe aramas me man. Ina ewe awonuen riáfféú.
Mwirin ena, Moses a eitietá péún ngeni láng, iwe, Jiowa a tiinatiw chopulap me sno faú. Ena sno faú a kon efeiengaw seni ekkewe sno faú meinisin mi fis lón Isip.
Ewe awalúen riáfféú, ina ewe riáfféú seni ekkewe lifichifichimas mi fókkun chómmóng. Esap mwo fán eú an wor ena úkúkún chóchóón lifichifichimas. Ra eitaaló meinisin ekkewe mettóch ewe sno faú ese atai.
Ewe etiuwen riáfféú, ina ewe riáfféú ren rochopwak. Úlúngát rán ewe rochopwak a pwélúoló ewe fénú, nge a wor saram ikewe ekkewe chón Israel ra kan nónnóm ie.
Iwe sáingoon, Kot a ereni néún kewe aramas pwe repwe aparasa chchaan emén kúkkún siike are emén kúkkún siip wóón úren asamen imwer kewe. Iwe, néún Kot we chónláng a ákkáásfeil asen Isip. Lupwen ewe chónláng a kúna ewe chcha, ese nieló emén me lón ewe imw. Nge, néún Kot we chónláng a nieló ekkewe mwennau lein aramas me man lón ekkewe imw meinisin ese wor ewe chcha wóón úren asamer. Ina ewe áengolun riáfféú.
Mwirin an a wesiló ei amuchúlóón riáfféú, Farao a ereni ekkewe chón Israel pwe repwe feiló. Néún Kot kewe aramas ra fen mmólnetá ar repwe ló, iwe, lón chék ena pwinin ra poputááni ar sáiló seni Isip.
Ekistos sópwun 7 tori 12.