Eú Mineféén Sókkun Mwéngé

EN MI silei met ei ekkeei aramas ra ikkioni me wóón ei pwúl? Iei eú sókkun mwéngé. Mi fókkun pwech me mworomwor.

A kerán órun eú maram mwirin án ekkewe chón Israel ló seni Isip. Ra nóm lón ewe fénúpéén. Ese kan mámmáár mwéngé ie, iwe ekkewe aramas ra kan ngúnúngún me apasa: ‘Amwo Jiowa a fen nikicheló lón Isip. Pún mi chék wokkor anach me ie, ese wor osupwang.’

Iwe, Jiowa a apasa: ‘Upwe amworatiw mwéngé me fán láng.’ Iwe ina ewe mettóch Jiowa a féri. Sorotáán ewe soran, lupwen ekkewe chón Israel ra kúna ei mettóch mi pwech an a fen mworetiw, ra eisfengen: ‘Met ei?’

Moses a apasa: ‘Iei ewe mwéngé Jiowa a awora ngenikemi pwe oupwe mwéngé.’ Ekkewe aramas ra eita ngeni MANA. Nennan a usun nokop mi nofit ngeni chénún pulech.

Moses a ereni ekkewe aramas: ‘Oupwe ioni úkúkún chék enen emén me emén.’ Iwe iteiten lesossor a ina met ra féri. Iwe, lupwen a tétá ewe akkar ewe lusun mana wóón ewe pwúl a kan teniló.

Moses a pwal apasa: ‘Esap wor epwe isoni ewe mana tori pwal eú rán.’ Nge ekkóch ekkewe aramas rese aúseling. Ka silei met a fis? Sorotáán ewe soran, ewe mana ra isoni a ur ren ul, iwe a poputá le pwomach!

Iwe, Jiowa a ereni ekkewe aramas pwe ionier mana lón ewe awonuen rán iteiten wiik, epwe lapóló wóón fán ruu. Iwe Jiowa a pwal apasa pwe repwe isoni och fán iten ewe rán mwirin pún esap amworatiw ewe mana lón ewe efisuen rán. Lupwen ra isoni ewe mana tori ewe efisuen rán, ese ul me ese pwal pwomach! Pwal iei eú manaman!

Jiowa a amwéngééni ekkewe chón Israel ewe mana lón unusen ekkewe ier ra nónnóm lón ewe fénúpéén.