November

Ika en emén sam are in, álisi néúmi kewe kúkkún le ammólnatá ar memmeef mi fich ngeni ieriir. Fán ekkóch, sia kan káé ekkewe lesen mi alóllóól, áwewe chék ren osukosuk lón pwúpwúlú are liméchún manawach, nge ese mwáál epwe wor eú are ruu parakraf lón ena lesen emén semirit a tongeni memmeef wóón. Pwal och, álisi néúmi kewe le weweiti popun ewe chónemmwen eli esap kériir iteiten ar eitietá péúr. Óm áwewe ngeniir ena, a tongeni álisiir ar resap lichippúng ika a kéri ekkewe ekkóch nge ese kériir. (1 Tim. 6:18) Kich meinisin sia tongeni ammólnatá ach kewe memmeef mi apéchékkúla chienach kewe Chón Kraist me elingaaló Jiowa. (SalF. 25:11) Eli fán ekkóch, sia ekis memmeef wóón pwisin pwóróusen manawach, nge a lamot sipwe túmúnú ach sisap kon fós chómmóng usun pwisinkich. (SalF. 27:2; 2 Kor. 10:18) Nge sipwe fen achocho le nefótófót wóón Jiowa, an we Kapas, me néún kewe aramas.—Pwär. 4:11. w23.04 24-25 ¶17-18

A lamot ewe napanap tong ren ach sipwe nenneló lón pekin ngún me mammasa. (Mat. 22:​37-39) Ach tongei Kot a álisikich le likiitú le afalafal ese lifilifil met sókkun osukosuk eli sipwe kúna. (2 Tim. 1:​7, 8) Pokiten sia tongei chókkewe rese angang ngeni Jiowa, sia sópweeló le afalafal pwal mwo nge afalafal wóón phone me mak taropwe. Sise fangetá lón ach ápilúkúlúk pwe eú rán aramas repwe tongeni siwil me poputá le féri minne mi pwúng. (Is. 18:​27, 28) Sia pwal tongei chienach kewe Chón Kraist. Sia pwáári ena esin tong ren ach ‘apöchökülafengenikich o alilisfengen lefilach.’ (1 Tes. 5:11) Sia ussun ekkewe soufiu mi álillisfengen lón maun, sia akkapéchékkúlafengenikich. Sise fókkun mochen ámeteki chienach kewe Chón Kraist seni turun tipach are liwini ngeniir met ra féri ngenikich. (1 Tes. 5:​13, 15) Sia pwal pwáári ach tong ren ach súféliti ekkewe mwán mi wisen ekkemmweni ewe mwichefel.—1 Tes. 5:12. w23.06 10 ¶6; 11 ¶10-11

Eú alen ach sipwe tongeni apéchékkúla ach lúkú, ina ren ach ekilonei pwóróusen ewe méén kepich. Ewe méén kepich a alúkúlúkúkich pwe án Kot kewe pwon repwe wesewesen pwénútá. Atun sia ekiekifichi popun an kawor ewe méén kepich, me úkúkún met Jiowa a pennúkúóló, iwe a péchékkúleló ach lúkú pwe epwe fókkun fis met i a pwonei usun eú manaw ese wor muchchún lón eú ótót mi múrinné seni ei. Pwata sia tongeni erá ena? Met Jiowa a pennúkúóló ren an epwe awora ewe méén kepich? A tiinaato me láng Néún we mwánichi mi áchengicheng, chiechian we mi fókkun pacheéch ngeni, pwe epwe uputiw wóón fénúfan usun emén aramas mi unuséch. Atun Jesus a nóm wóón fénúfan a likiitú fán sókkopaten sókkun weires. A mááli eú sókkun máló mi ámmetek. A ifa me watteen ewe liiwin Jiowa a ménatiw! Ach we Kot mi tong esap fókkun mut ngeni Néún we an epwe kúna riáfféú me máló ren chék ach sipwe eáni eú manaw múrinné nge mi mwochomwoch. (Joh. 3:16; 1 Pet. 1:​18, 19) Pokiten Jiowa a fangóló Néún we mi aúchea an epwe álisikich, iwe I epwe pwal nochchei ach sipwe tongeni kúna manaw tori feilfeiló lón ewe ótót séfé. w23.04 27 ¶8-9

Mi wor án Jiowa mochen le amanawatá ekkewe mi máló? Ewer, a fókkun mochen. A emmweni ekkóch ekkewe chón makkeei Paipel ar repwe makkeetiw an we pwon usun ewe manawsefál epwe fis lón mwachkkan. (Ais. 26:19; Pwär. 20:​11-13) Me atun Jiowa a eáni eú pwon, fansoun meinisin a chék apwénúetá. (Jos. 23:14) Ren enletin, a mwétéresiti an epwe amanawasefáli ekkewe mi máló. Ekieki met Hiop a apasa. A lúkúlúk pwe inaamwo ika epwe máló, nge Jiowa a fókkun mochen amanawasefáli. (Hiop 14:​14, 15) Ina met Jiowa a pwal mochen féri ngeni meinisin chókkewe mi fel ngeni nge ra máló. A mwétéresiti an epwe amanawasefáliir pwe repwe tongeni eáni eú inis mi péchékkúl me repwe pwapwa. Nge met meefien Jiowa usun meinisin chókkewe mi fen máló nge ese suuk ngeniir ar repwe káé ewe enlet usun i? Ach na Kot mi tong a pwal mochen amanawasefáliir. (Föf. 24:15) A mochen an epwe suuk ngeniir ewe tufichin wiliti chiechian me kúna manaw tori feilfeiló wóón ei fénúfan.—Joh. 3:16. w23.04 9 ¶5-6

Ifa ussun ka tongeni apéchékkúla óm ápilúkúlúk fán iten mwachkkan? Áwewe chék, iká ka eáni ewe ápilúkúlúkún kúna manaw wóón ei fénúfan, álleani ekkewe pwóróus lón Paipel ussun ewe Paratis me ekiloneer. (Ais. 25:8; 32:​16-18) Ekieki epwe ifa nónnómun manawom lón ewe ótót séfé. Anchangei pwe ka nóm lón ena leeni. Iká sipwe awora fansoun iteitan le ekkekieki ewe ápilúkúlúk fán iten mwachkkan, ach kewe osukosuk repwe “müchükai” me “pwal pal.” (2 Kor. 4:17) Ena ápilúkúlúk Jiowa a fang ngonuk, a tongeni álisuk le likiitú fán ekkewe osukosuk mi toruk. A fen fang ngonuk met mi lamot ngonuk pwe kopwe angei péchékkúl seni. Ina popun, atun ka osupwangen álillis óm kopwe tongeni apwénúetá eú wis, likiitú fán eú sóssót are weires, are sópweeló óm pwapwa, kopwe seppiti Jiowa lón iótek me kútta emmwen seni i ren óm féri óm pwisin káéén Paipel. Etiwa ekkewe kapasen pesepes seni pwiium kewe Chón Kraist. Awora fansoun iteitan le akkanchangei óm ápilúkúlúk fán iten mwachkkan. Iwe, kopwe ‘pöchökülela ren sokun tufich meinisin mi pop seni [án Kot] manaman me ling, pwe kopwe tongeni likitü o mosonotam.’—Kol. 1:11. w23.10 17 ¶19-20

A chómmóng popun ach sipwe kilisou ngeni Jiowa lón iótek. Sia tongeni kilisou ngeni ren ese lifilifil met mi múrinné mi nóm rech, pún liffang mi múrinné meinisin ra feito seni i. (Jas. 1:17) Áwewe chék, sia tongeni kilisou ngeni ren ei fénúfan mi lingéch, me ekkewe mettóch mi amwarar a fériiretá. Sia pwal tongeni kilisou ngeni ren an fang manawach, ach famili, chiechiach kewe, me ach ápilúkúlúk. Sia pwal mochen kilisou ngeni ren an mut ngenikich ach sipwe eáni ewe riri mi aúchea, ina ach chiechi ngeni. Eli epwe lamot ach sipwe fókkun achocho le ekieki ekkewe popun sipwe pwáári ach kilisou ngeni Jiowa. Chómmóng aramas lón ei fansoun rese sile kilisou. Fán chómmóng, aramas ra kon nefótófót wóón met mocheniir lap seni met ra tongeni féri pwe repwe pwáári ar kilisou ren met mi nóm rer. Iká sia poputá le áppirúúr, ach kewe iótek epwele chék uren tingor. Ren ach sipwe ttiisenikich ena, a lamot sipwe sópweeló le alapaaló me pwáppwári ach kilisou ren meinisin met Jiowa a féri fán itach.—Luk. 6:45. w23.05 4 ¶8-9

Semach we mi tong Jiowa, ese mochen ach sipwe kúna riáfféú. (Ais. 63:9) Nge ese eppeti senikich osukosuk meinisin, mi ussun chénúpupu are ekkei. (Ais. 43:2) Iwe nge, a pwonei ngenikich pwe epwe álisikich le ‘fetal lor.’ Me ese lifilifil sóssót epwe torikich, epwe chék túmúnú pwe ach riri ngeni epwe péchékkúl. Jiowa a pwal ngenikich an we ngún mi fel mi manaman an epwe álisikich le likiitú. (Luk. 11:13; Fil. 4:​13, TF) Iwe, sia tongeni lúkúlúk pwe epwe chék ngenikich met mi lamot ren ach sipwe likiitú me akkamwéchú ach túppwél ngeni. Jiowa a mochen ach sipwe lúkúlúk wóón. (Ipru 11:6) Fán ekkóch, eli sipwe meefi pwe ach kewe osukosuk ra kon áweires ach sipwe likiitú faar. Eli sipwe pwal mwo nge poputá le tipemwárámwár iká Jiowa epwe álisikich. Nge ewe Paipel a alúkúlúkú ngenikich pwe ren án Kot we manaman sia tongeni “mwet won eu tit.” (Kölf. 18:29) Iwe mi lamot sipwe iótek ngeni Kot me unusen lúkú pwe i epwe pélúweni ach kewe iótek nge sisap fen tipemwárámwár.—Jas. 1:​6, 7. w23.11 22 ¶8-9

A ifa me múrinnéén áweween ena esin tong mi enlet! Ekkeei itiitin kapas ra tongeni apéchékkúla letipen ekkewe mi pwúpwúlú: Ámi tongfengen lefilemi a tongeni péchékkúleló. A lamot án ekkewe pwúpwúlú repwe achocho pwe repwe chék tongfengen lefiler lón ánein manawer. Áwewe chék, eú ekkei a tongeni sópwósópwoló kúún iká emén a kan sóssópwetá amúchún. Iká ese wor emén a sópwetá amúchún, iwe ekis me ekis epwele kunuló. Pwal ina ussun ren ewe tong lefilen pwúpwúlú, epwe péchékkúleló iká repwe akkapéchékkúla ar riri. Fán ekkóch, eú pea pwúpwúlú ra tongeni meefi pwe ar tong a patapateló, ákkáeúin iká ra aúreki osupwanger lón pekin moni, ra semmwen, are a weires túmúnún néúr kewe. Iwe, ren án ekkewe pwúpwúlú repwe sópweeló le apéchékkúla ar tong lón ar pwúpwúlú, a lamot iir me rúúemén repwe achocho le ririéch ngeni Jiowa. w23.05 20-21 ¶1-3

Met a lamot sipwe féri pwe epwe wor ach pwora? Eli semach kewe me inach repwe pesekich ach sipwe pwora, nge rese tongeni efisi ach sipwe pwora inaamwo iká pwisin iir ra pwora. Ach káé le wiliiti emén mi pwora, a ussun ach káé eú sókkun tufich. Eú alen ach sipwe káé eú tufich, ina ren ach katoléch féfférún ewe emén a asukulakich, iwe mwirin sipwe áppirú met a féri. Pwal ina ussun ach sipwe káé le wiliiti emén mi pwora, sia pwal katoléch ifa ussun ekkewe ekkóch ra pwáári ena napanap, iwe mwirin sipwe áppirúúr. A lamot sipwe silefichi án Kot we Kapas ussun chék Taniel. A lamot sipwe ámááraatá ach ririéch ngeni Jiowa ren ach fóffós ngeni, lúkúlúk wóón, me lúkú pwe epwe chék ákkálisikich. Iwe, atun sia kúna sóssótun ach lúkú, sia tongeni pwora. Fán chómmóng, aramas ra kan súféliti chókkewe mi pwáári ar pwora. Eli chókkana ra pwal mwo nge tongeni álisi ekkóch aramas le silei Jiowa. Ewer, a wor popun mi múrinné ach sipwe ámááraatá ewe napanap pwora. w23.08 2 ¶2; 4 ¶8-9

Ewe kapasen Krik fán iten “etittinafichi” a áweweei napanapen án aramas sótuni are cheki ekkewe mettóch mi aúchea, áwewe chék ren kolt me silifer, pwe repwe silei iká iir wesewesan. Ina minne, a lamot sipwe etittina are sótuni ekkewe mettóch sia rong are álleani pwe sipwe silei iká iir mi enlet. Ena epwe fen kon lapóló lamotan ngenikich atun sia akkarap ngeni warotoon ewe riáfféú mi lapalap. Sipwe áeá ach tufichin ekiek le aléllééi met sia rong me álleani ngeni met ewe Paipel me án Jiowa we mwicheich ra apasa, lap seni ach sipwe chék lúkúoló meinisin met aramas ra apasa. Iká sia féri ena, sisap tupuló ren ekkewe pwóróus mi chofona mi pop seni ekkewe timon. (SalF. 14:15; 1 Tim. 4:1) Sia silei pwe néún Jiowa aramas repwe kúna manaw atun ewe riáfféú mi lapalap. Nge, emén me emén kich sise silei met epwe fis lesor. (Jas. 4:14) Iwe nge, ese lifilifil iká sipwe manawewu seni ewe riáfféú mi lapalap are máló me mwen an epwe fis, sipwe kúna manaw esemuch iká sipwe akkamwéchú ach túppwél. Amwo kich meinisin sipwe nefótófót wóón ach we ápilúkúlúk mi amwarar me sópweeló le mmólnetá ngeni ránin Jiowa we! w23.06 13 ¶15-16

Sise silei ifa ussun ekkóch ekkewe oesini lón Paipel repwe pwénúetá. (Tan. 12:​8, 9) Iká sise unusen weweiti ussun pwénútáán eú oesini, iwe esap weween nge esap wesewesen fis. Sia tongeni lúkúlúk pwe Jiowa epwe pwáári ngenikich minne mi lamot ach sipwe silei lón fansoun mi fich, ussun chék met a féri me lóóm. Epwe fis ewe esilesilen “kinamwe o nükünüköch.” (1 Tes. 5:3) Mwirin, mwúún aramas repwe maunei lamalam chofona me ataieló. (Pwär. 17:​16, 17) Mwirin, repwe maunei néún Kot kewe aramas. (Is. 38:​18, 19) Ekkena mettóch repwe akkomw fis, iwe mwirin epwe fis ewe maunen Armaketon. (Pwär. 16:​14, 16) Sia tongeni lúkúlúk pwe ekiseló chék ekkena mettóch repwele fis. Nge ren mwo iei, sipwe sópweeló le pwáári ach kilisou ngeni Semach we mi tong lón láng ren ach áfánni ekkewe oesini lón Paipel me ren ach álisi ekkewe ekkóch ar repwe pwal féri ena. w23.08 13 ¶19-20

Atun ewe aposel Paul a fósun lúkú, ápilúkúlúk, me tong, a apasa pwe tong are “chen a lapalap seniir.” (1 Kor. 13:13) Pwata Paul a apasa ena? Lón fansoun mwach, ese chúen lamot ach sipwe lúkú án Kot kewe pwon ussun ewe fénúfan séfé pokiten ekkena mettóch sia ápilúkúlúkú ra fen pwénútá. Nge fansoun meinisin a lamot ach sipwe tongei Jiowa me aramas. Ren enletin ach tongeer epwe chék lallapoló tori feilfeiló. Tong a pwal ánnetatá pwe kich Chón Kraist mi enlet. Jises a ereni néún kewe aposel: “Are oupwe echenifengenikemi, aramas meinisin repwe silei, pwe ämi nei chon kaiö.” (Joh. 13:35) Pwal och, ach tongfengen a etipeeúfengenikich. Paul a erá pwe tong “a enletin etipeeúfengeni aramas.” (Kol. 3:​14, NW) Ewe aposel Jon a mak ngeni chienan kewe chón lúkú: “Eman mi echeni Kot epwe pwal fokun echeni pwiin.” (1 Joh. 4:21) Atun sia pwáári ach tongfengen lefilach, sia pwáári ach tongei Kot. w23.11 8 ¶1, 3

Ewe Paipel a apépééi manawach Chón Kraist ngeni eú kitir. Ekkewe chón ssá mi áwesaaló ewe kitir, repwe angei ewe manaw esemuch. (2 Tim. 4:​7, 8) A lamot sipwe fókkun achocho le sópweeló le sássá, ákkáeúin pokiten sia fókkun arap ngeni múchchún ena kitir. Aposel Paul a erenikich met epwe álisikich pwe sipwe win lón ach fiti ena kitir. A erenikich ach sipwe “pwiliti senikich meinisin met mi chounikichetiw . . . me sipwe likiitú le ssá lón ewe kitir mi nóm mwach.” Itá weween alon Paul pwe ese wor met mi lamot emén Chón Kraist epwe uwei? Aapw, esap ina weween. Weween alon na pwe sipwe likitatiw meinisin met mi achchoukich ese wor lamotan. Ena mettóch a tongeni ammangakich me efisi ach sipwe mélúlú. Ren ach sipwe likiitú, a lamot sipwe mwittir esilla me otur senikich meinisin ese wor lamotan mi tongeni ammangakich. Iwe nge, sise mochen otur senikich osach kewe mi lamot sipwe uwei. Iká sia féri ena, iwe esap chúen fich ngenikich ach sipwe fiti ewe kitir.—2 Tim. 2:5. w23.08 26 ¶1-2

Tipemirit a álisikich le súféliti ekiekin ekkewe ekkóch. Áwewe chék, ekkóch chienach kewe Chón Kraist fefin ra kan sani le áeá makeup, nge ekkóch ra filaatá ar resap áeá. Ekkóch Chón Kraist ra filaatá ar repwe únúmi ekis sakaw, nge ekkóch ra filaatá ar resap fókkun ún. Meinisin Chón Kraist ra mochen péchékkúl lón pekin inis, nge a sókkofesen met sókkun sáfei ra filaatá ar repwe angei. Iká sia ekieki pwe sia pwúng fansoun meinisin me sótun pesei chienach kewe lón ewe mwichefel ar repwe féri met sia féri, sia tongeni áchepeteki ekkewe ekkóch me efisi kinikinfesen. (1 Kor. 8:9; 10:23, 24) Áwewe chék Jiowa ese erenikich met sipwe úféúf me met sisap úféúf, nge a awora ngenikich kapasen emmwen sipwe álleasochisi. A lamot ach sipwe úféúf ekkewe úf mi fich ngeni emén néún Kot chón angang, ekkewe ese ássáw, me ekkewe mi pwáári mirit. (1 Tim. 2:​9, 10) Ina minne, sise mochen úféúf ekkewe esin úf epwe efisi án aramas repwe kon chék nefótófót wóóch. Án Paipel kapasen emmwen epwe pwal álisi ekkewe mwán mi ásimaw ar repwe túmúnú ar resap pwisin fférútá ar allúk ussun napanapen úfach me staenin mékúrach. w23.07 23-24 ¶13-14

Jiowa a áiti ngenikich ifa ussun sipwe kúna pwapwa lón mwachkkan. Chókkewe mi etiwa ewe etiwetiw seni ewe fefin mi wewe ngeni “tiparoch,” ra sótun kútta pwapwaar lón ewe féfférún lisowumwáál. Féfférúr kana epwe emmweniir ngeni “epin ewe lenien sotup.” (SalF. 9:​13, 17, 18) Chókkewe mi etiwa ewe etiwetiw seni ewe fefin mi wewe ngeni “tipachem” mi enlet, epwe fókkun sókkóló met epwe fis ngeniir lón mwachkkan! (SalF. 9:1) Sia káé ach sipwe tongei met Jiowa a tongei me oput met a oput. (Kölf. 97:10) Sia pwal pwapwa le etiwa ekkewe ekkóch ar repwe pwal kúna álillis seni ewe “tipachem” mi enlet. Ussun itá sia “kökkö me won ewe leni tekia seni meinisin me lon ewe telinimw: ‘Ämi mi wewemang, oupwe feito ikei.’” Ekkewe feiéch mi kawor ngenikich me chókkewe mi etiwa ewe etiwetiw, esap chék fán iten lón ei fansoun. Repwe nómoffóch me repwe álisikich ach sipwe “manau” tori feilfeiló atun sia ‘fefeitä lon ach sile.’—SalF. 9:​3, 4, 6. w23.06 24-25 ¶17-18

Met meefiom atun emén chienom chón angang are chienom chón sukul a eisinuk ussun óm lúkú? Ka pireir? Lape ngenikich sia ina ussun. Nge minne ra eáni kapas eis, eli epwe álisikich le weweiti met ra wesewesen ekieki are lúkú, iwe me ikena ie epwe ámecheresi ach sipwe ereniir ussun ewe kapas allim. Iwe nge fán ekkóch, emén a tongeni eáni eú kapas eis pokiten ese tipeeú ngeni met sia eáni lúkú are a chék mochen ánini ngenikich. Ra kan ina ussun pokiten ra rong pwóróus ese pwúng ussun met sia lúkú. (Föf. 28:22) Pwal och, sia nóm lón “ekewe ränin lesopolan,” lón ei atun chómmóng aramas ra tipeférea me pwal mwo nge “lingeringerikai.” (2 Tim. 3:​1, 3) Eli kopwe ekieki, ‘Ifa ussun úa tongeni pwáári kirekiréch me mosonoson atun emén a mochen ánini ngeniei wóón met úa lúkú?’ Tipepwetete a tongeni álisuk. Emén mi tipepwetete ese kan mwittir song, nge a tongeni nemeni pwisin i atun emén a turunufasa are atun ese kon silei ifa ussun epwe pélúweni eú kapas eis. w23.09 14 ¶1-2

Fán ekkóch, sia angei kapasen éúréúr seni ach we mwicheich pwe epwe túmúnúkich. Áwewe chék, ra éúréúrakich ussun efeiengawen tongen moni me ekkewe mettóch mi tongeni emmwenikich le atai án Kot kewe allúk. Atun sia álleasochisi án Jiowa kana emmwen sipwe kúna pwal ekkóch feiéch. (Ais. 48:​17, 18; 1 Tim. 6:​9, 10) Sia fókkun lúkú pwe Jiowa epwe sópweeló le néúnéú aramas le awora ngenikich kapasen emmwen atun ewe riáfféú mi lapalap me atun ewe Nemenem Úkúúkún Engéréú Ier. Itá sipwe sópweeló le álleasochisi ena emmwen? Epwe mecheres ach sipwe álleasochis iká sia éérenaaló iei le álleasochisi án Jiowa kewe kapasen emmwen. Ina minne, ousipwe sópweeló le álleasochisi án Jiowa emmwen, kapachelong ekkewe emmwen mi feito seni ekkewe mwán mi kefilitá le túmúnúkich. (Ais. 32:​1, 2; Ipru 13:17) Sia tongeni unusen lúkúlúk wóón néúch we Chónemmwen Jiowa, pokiten a álisikich ach sipwe towaw seni ekkewe mettóch mi tongeni atai ach chiechi ngeni me a emmwenikich ngeni manaw esemuch lón ewe ótót séfé. w24.02 25 ¶17-18

Ewe aposel Paul a pwapwa le angang ngeni Jiowa, nge esap fansoun meinisin a mecheres ngeni le féri ena. Paul a kan soun sái towaw, nge lón an we fansoun ese kan mecheres ewe mettóch sái. Fán ekkóch, atun an sái a “nom lon feiengauen puun chanpupu” me “feiengau seni chon achomau” are chón solá. A pwal wor ekkóch atun ekkewe chón oputa ra pwal mwo nge awata. (2 Kor. 11:​23-27) Me esap fansoun meinisin chienen Paul kewe chón lúkú ra aúcheani met ekkewe a féri fán iter. (2 Kor. 10:10; Fil. 4:15) Met a álisi Paul an epwe sópweeló an angang ngeni Jiowa? Paul a káé chómmóng mettóch ussun napanapen Jiowa kewe seni lón ekkewe Taropwe mi Pin me seni met a pwisin fis ngeni lón manawan. Iwe, a fókkun lúkúlúk pwe Jiowa Kot a tongei. (Rom 8:​38, 39; Ef. 2:​4, 5) A pwal fókkun tongei Jiowa. Paul a pwáári an tongei Jiowa ren an “angang me sópweeló le angang ngeni ekkewe chón pin.”—Ipru 6:​10, NW. w23.07 9 ¶5-6

Chómmóng aramas ra mirititi pwe a lamot ngenikich an epwe wor eú mwú epwe nemenikich, me a lamot ach sipwe mwaren álleasochisi ekkóch allúk ra isettiw. Nge pwal chókkana eli repwe tipemwárámwár le álleasochisi eú allúk me rer ese kon lien pwúng are a kon áweires. Ewe Paipel a affata pwe mwúún aramas ra efisi riáfféú, iir mi nóm fán nemenien Setan, me ekiseló chék repwe móló. (Kölf. 110:​5, 6; SalAf. 8:9; Luk. 4:​5, 6) A pwal apasa pwe “eman a ü ngeni ekewe nöüwis, a ü ngeni met Kot a akota.” Ren iei mwo Jiowa a mut ngeni ekkewe mwú ar repwe nemeni aramas pwe epwe wor mwaren kókkót lón ei fénúfan. Nge i a mochen ach sipwe álleasochisiir. Ina minne, mi lamot sipwe ‘ngeni ekei aramas mine sipwe wisen ngeniir’ kapachelong ach méénatiw ach takises, ésúfélúr me álleasochisiir. (Rom 13:​1-7) Eli me rech ach álleasochisi eú allúk seni ewe mwú a áweires, ese pwúng are mémmóng. Nge sia álleasochisi Jiowa, me a erenikich ach sipwe álleasochisi ekkena néúwis chilóón chék iká ra erenikich ach sipwe atai án Jiowa kewe allúk.—Föf. 5:29. w23.10 8 ¶9-10

Ekkewe chón Filistia ra nemenemengaw ngeni ekkewe chón Israel lón ewe fansoun Samison a uputiw. (Souk. 13:1) Ra fókkun riáfféú pokiten án ekkena chón Filistia kirikiringaw ngeniir. Jiowa a filaatá Samison an epwe “popuetä le angasa chon Israel seni chon Filistia.” (Souk. 13:5) Ren án Samison epwe apwénúetá ena wis, a lamot an epwe lúkúlúk wóón Jiowa. Lón eú atun, ewe mwichen soufiun Filistia ra etto me ekiekin elliapa Samison me lón ewe leeni lón Juta itan Lehi. Ekkewe chón Juta ra niwokkus ina popun ra atolonga Samison lepéún chón koputer kewe. Pwisin chón fénúen Samison we ra fééti ngeni ruuofóch sáál minefé me uwealó ngeni ekkewe chón Filistia. (Souk. 15:​9-13) Iwe nge, ‘ngünün ewe Samol mi Lapalap a feitiu won Samson o apöchöküla,’ iwe a mwuuti ekkewe ruuofóch sáál mi féfé ngeni péún. Mwirin “a küna chün ngächin eman aas ekärän mäla,” a angei me áeá le nieló 1,000 chón Filistia!—Souk. 15:​14-16. w23.09 2-3 ¶3-4

Jiowa a pwáári me lón ewe Paipel “minne a tipeni an epwe apwénúetá seni chék me lóóm lóóm.” Iwe, ese lifilifil met epwe fis, Jiowa a sópwéch fansoun meinisin pokiten “a féri pwe mettóch meinisin epwe apwénúetá minne a tipeni.” (SalF. 16:​4, NW) Me mwirilóón met Jiowa a féri, epwe nóm tori feilfeiló chék. Met Jiowa a tipeni, me ikkefa ekkewe siwil a féri pwe epwe apwénúetá minne a tipeni? Kot a ereni ekkewe popun aramas met a tipeni fán iter. Repwe ‘nöünöü o achomonger pwe fanüfan epwe masou rer o nom fän nemenier. Repwe nemeni . . . mönün won unusen fanüfan.’ (Ken. 1:28) Lupwen Atam me If ra ú ngeni Kot, tipis a tori aramas, iwe nge ena ese tongeni aúkatiw án Jiowa apwénúetá minne a tipeni. I a ekkesiwili alen an apwénúetá minne a tipeni. Mwittir chék, a akkóta eú Mwú lón láng an epwe apwénúetá minne a tipeni seni lóóm fán iten aramas me fénúfan.—Mat. 25:34. w23.10 19-20 ¶6-7

Jiowa a tongeni álisikich ach sipwe sópweeló ach achocho. Esap fansoun meinisin epwe mecheres ach sipwe féri ena, ákkáeúin iká a wor eú apwangapwangach sia kan úkkú ngeni ren fansoun langattam. Fán ekkóch, ussun a kon weires ach kewe apwangapwang lap seni ekkewe mi tori aposel Piter. Nge Jiowa a tongeni fang ngenikich péchékkúl pwe sisap fangetá. (Kölf. 94:​18, 19) Áwewe chék, me mwen án emén Chón Kraist mwán silei ewe enlet, ren fite fite ier a eáni ewe esin manaw mi pwisin sani mwán. I a unusen ekkesiwili manawan me a etipeeúfengeni manawan ngeni met Paipel a apasa. Iwe nge, fán ekkóch a chúen úkkú ngeni ena esin mochen mi ngaw. Met a álisi an esap fangetá? Iei met a apasa: “Jiowa a apéchékkúlaei.” A pwal erá: “Ren án Jiowa ngún mi fel . . . , úa silei pwe a tufich ái úpwe [sópweeló] le eáni ewe sókkun manaw Jiowa a mochen ái úpwe manaweni . . . Jiowa a tufichin néúnéú ngang, me inaamwo iká a wor apwangapwangei nge a sópweeló le apéchékkúlaei.” w23.09 23 ¶12

Ámi kana alúwél Chón Kraist, ese automatic ámi oupwe wiliiti Chón Kraist mi ásimaw nge a lamot oupwe achocho. A lamot oupwe filaatá ekkewe leenien áppirú mi múrinné oupwe áppirú, ámááraatá mirit are tufichin ekiek, oupwe alúkúlúk, oupwe káé ekkewe tufich epwe álisikemi iteitan, me mmólnetá ngeni ekkewe wis lón mwach. Fán ekkóch eli kopwe meefi pwe ese ki ngonuk ekkewe angang ka ekiekin óm kopwe achocho ngeni. Nge ka tongeni sópwéch. Chemeni pwe Jiowa a mochen álisuk. (Ais. 41:​10, 13) Pwal och, chienom kewe lón ewe mwichefel repwe pwal álisuk. Atun ka wiliiti emén Chón Kraist mwán mi ásimawóló, kopwe meefi aúchean manawom me kopwe pwapwa. Áúa tongekemi ámi kana alúwél Chón Kraist! Amwo Jiowa epwe efeiéchúkemi lón ámi achocho le wiliiti Chón Kraist mwán iir mi ásimaw. w23.12 29 ¶19-20

Anchangei pwe ka fiti eú pari me chienom kewe lón óm we mwichefel. Ka pwapwa ren óm nónnóm rer, me ámi meinisin oua fichfengen sasing. Kese chék fichi eché sasingimi, nge fen pwal rúúaché, assoun iká ewe áechéén ese éch. Iwe iei a wor úlúché noum sasing. Nge eché me leir, ka kúna pwe emén chienom ese emelimel. Ka télú pokiten a pwal wor rúúaché noum sasing nge meinisin ra emelimel lón, kapachelong chienom we. Lape ngeni sia chechchemeni ekkewe fansoun mi apwapwa ren ach chiechifengen me pwiich kewe, nge eli lón eú atun emén pwiich a féri are apasa och mettóch mi ámmetek. Sia mochen chechchemeni ena fansoun? Sipwe achocho le namanaaló ena fansoun, ussun chék ach télú eché me lein ekkewe sasing. (Ef. 4:32) Sisap chúen ekieki án chienach na mwáálliló pokiten a chómmóng ekkewe fansoun mi apwapwa sia chechchemeni lón ach chiechifengen. Ikkena ekkewe fansoun sia mochen chechchemeniir me aúcheaniir. w23.11 12 ¶16-17

Ekkewe kapasen Krik Paul a néúnéú a pwáári lamoten án emén fefin epwe úféúf úf mi úkúkéch me minne a úféúf epwe pwáári pwe a ekieki meefien ekkewe ekkóch. Sia fókkun pwapwa ren ekkewe fefin Chón Kraist mi ásimaw mi álleasochisi ena kapasen emmwen! Mirit ina pwal eú napanap a lamot meinisin Chón Kraist fefin repwe ámááraatá pwe repwe ásimawóló. Met weween mirit? Ina ewe tufich le esilla lefilen minne mi éch me minne mi ngaw, iwe filaatá le féri minne mi éch. Ekieki ussun pwóróusen Apikael. Pwúlúwan we a féri eú kefil mi ngaw, epwe atoto feiengaw wóón meinisin chón leimwan. Apikael a mwittir mwékút. Pokiten a mirit, iwe a seláni manawen aramas. (1 Sam. 25:​14-23, 32-35) Mirit a pwal álisikich le silei ineet sipwe fósetá me ineet sipwe fanafaneló. Me a pwal álisikich ach sipwe áfánniéchú aramas nge sisap efisi ar repwe meefi osukosuk.—1 Tes. 4:11. w23.12 20 ¶8-9

Ewe aposel Paul a makkeei ekkena kapas ngeni chón ewe mwichefelin Rom. Chón ena mwichefel ra káé ussun Jiowa me Jises, anganga ar lúkú, me wiliiti Chón Kraist. Ina minne ra ‘küna pwüng me ren Kot ren ar lükülük,’ me ra kepit ren ewe ngún mi fel. (Rom 5:1) Ewer, ra mwétéresiiti ewe ápilúkúlúk mi amwarar me fókkun lúkú pwe repwe eáni. Mwirin Paul a mak ngeni ekkewe Chón Kraist mi kepit lón Efisus ussun ewe ápilúkúlúk Kot a ngeniir. Repwe angei “ekewe feiöch mi amwarar i a pwon ngeni ekewe chon pin.” (Ef. 1:18) Me Paul a pwal ereni ekkewe chón Kolose ia repwe angei me ia ena feiéch. A erá pwe met ra ‘apilükülükü a iseis lon läng fän iter.’ (Kol. 1:​4, 5) Ina minne iei án ekkewe Chón Kraist mi kepit ápilúkúlúk, ina ar repwe manawsefál ngeni manaw esemuch lón láng ikewe ia repwe fiti Kraist le nemenem ie.—1 Tes. 4:​13-17; Pwär. 20:6. w23.12 9 ¶4-5

Ewe popun kapas fán iten “túmúnú,” ina eú kapas fán iten soufiu mi túmúnú eú telinimw me eppeti seni feiengaw. Chón nóm lón eú telinimw mi wor chón túmúnú, ra méúr kinamwe pwe ra silei pwe a wor soufiu mi mmasa ekkewe asamalap. Pwal ina chék ussun atun án Kot we kinamwe a túmúnú letipach me ekiekich, sia kan meefi núkúnúkéch pwe sia silei pwe sia túmún. (Kölf. 4:8) Inaamwo iká nónnómuch ese mwittir siwil, nge sia tongeni meefi kinamwe ussun chék ren met a fis ngeni Hana. (1 Sam. 1:​16-18) Me atun sia meefi kinamwe, lape ngeni a kan mecheres ach sipwe eáni ekiek mi ffataffatéch me eáni kefil mi múrinné. Met sipwe tongeni féri? Atun ka nóm lón osukosuk, kéri ewe chón túmún lón kapas áwewe. Ifa ussun? Iótek tori óm meefi án Kot kinamwe. (Luk 11:9; 1 Tes. 5:17) Iká a fis ngonuk eú osukosuk mi weiweitá, sópweeló le ikkiótek, iwe kopwe meefi án ewe kinamwe seni Jiowa túmúnú letipom me ekiekum.—Rom 12:12. w24.01 21 ¶5-6

Ren án Jises epwe epini iten Seman we, a likiitú fán iteiten riáfféú, esiit, me kapas chofona mi iti ngeni. A silei pwe a fen álleasochisi Seman we lón mettóch meinisin me ese wor met epwe sáw ren. (Ipru 12:2) A pwal silei pwe Setan a fókkun mesááni lón ekkena fansoun mi áweires. (Luk 22:​2-4; 23:​33, 34) Setan a fókkun mochen atai pwúngún enletin án Jises túppwél, nge i a fókkun sópwongaw! Jises a fókkun pwáári pwe Setan i emén mi wesewesen kapas chofona, me Jises a pwal affata pwe a wor néún Jiowa chón angang mi túppwél, iir mi angang ngeni fán pwúngún enletin ar túppwél pwal mwo nge fán watteen sóssót! Ka mochen apwapwaai noum we King mi nennemenem? Iwe, sópweeló le mwareiti iten Jiowa we, me álisi aramas le silei meinisin napanapan kewe mi amwarar. Atun ka féri ena, ka tapweló lón ipwen Jises. (1 Pit. 2:21) Ka áppirú Jises ren óm apwapwaai Jiowa me pwáári pwe Setan, i emén chón kapas chofona mi sáwemmang! w24.02 11 ¶11-13

Lón ekkewe nimu ier a ló, lap seni eú million aramas ra papatais me wiliiti Chón Pwáraatá Jiowa. Lupwen ka fangoló manawom ngeni Jiowa, ka filaatá óm kopwe wiliiti emén néún Jises Kraist chón káé me óm féri letipen Kot, ina och mettóch mi fókkun aúchea lón manawom. Met a pwal lamot kopwe féri? Jises a apasa: “Iká emén a mochen tapwoto mwiri, epwe pennúkú pwisin i.” (Mat. 16:24) Ewe kapasen Krik mi afféú ngeni “epwe pennúkú pwisin i” a pwal tongeni wewe ngeni, “ese chúen manaw fán itan pwisin.” Pokiten en emén néún Jiowa chón angang mi fen fangoló manawom ngeni, a lamot óm kopwe péén sonuk meinisin mettóch ese apwapwaai letipan. (2 Kor. 5:​14, 15) A kapachelong óm kopwe péén sonuk “ekkewe angangen futuk,” áwewe chék ren lisowumwáál. (Kal. 5:​19-21; 1 Kor. 6:18) Óm fiti ekkena allúk epwe áweiresi manawom? Esap áweiresi manawom iká pwe ka tongei Jiowa me lúkúlúk pwe an kewe allúk ra échituk.—Kölf. 119:97; Ais. 48:​17, 18. w24.03 2 ¶1; 3 ¶4

Jiowa a fang an ngún mi fel ngeni chókkewe chék a pwapwa rer. (Mat. 12:18) Sia tongeni eisini pwisinkich, ‘Úa kan pwáppwári ekkóch uwaan án Kot we ngún mi fel?’ Úa kan mosonottam ngeni ekkewe ekkóch iei lap seni ewe atun úa kerán silei ussun Jiowa? Ren enletin, lapólóón óm káé le pwáári uwaan án Kot we ngún mi fel, pwal ina lapólóón óm kúna pwe Jiowa a pwapwa reom! Chókkewe chék Jiowa a pwapwa rer, ra kúna feiéchún ewe méén kepich. (1 Tim. 2:​5, 6) Nge ifa ussun iká sia chúen meefi pwe Jiowa ese pwapwa rech, inaamwo iká sia lúkú ewe méén kepich me papatais? Chemeni pwe esap fansoun meinisin sia tongeni lúkú minne sia meefi, nge sia tongeni unusen lúkú Jiowa. Me ren, chókkewe mi lúkú ewe méén kepich iir aramas mi pwúng me a pwonei pwe epwe efeiéchúúr.—Kölf. 5:12; Rom 3:26. w24.03 30 ¶15; 31 ¶17