Eani Lukuluk Lon Jiowa Ewe Kot Mi Wesewesen Manau
Ka fen neta le pwin lupwen esor kuchu me ka kuna ekkewe fite puku fuu? Ia ra feito me ie?
LON KINAMWEEN ewe pwin, ekkewe fuu ra ussun ita fos ngeni King Tafit ewe kingen Israel loom, me ra efisata an a makkeei ekkeei kapas: “Ekkewe lang ra aporausa usun lingen Kot; o masouen lang a apasata porausen angangen poun.” (Kol Fel 19:1) Ewer, ewe Chon Forata nge esap forian kewe a fich ngeni an epwe “angei ling o iteuoch o manaman.”—Pwarata 4:11; Rom 1:25.
“Ewe mi auta mettoch meinisin, iei i Kot,” alon ewe Paipel. (Ipru 3:4) Ren enletin, ewe Kot mi enlet, ‘itan Jiowa, . . . mi Fokkun Tekia won fonufan meinisin.’ (Kol Fel 83:18, New World Translation) Me Kot esap eu lios mi nonnom lon tupuwach chok. Iei met Jises a apasa ussun seman we lon lang, Jiowa: “Ewe mi tinieito mi chok enlet.”—Jon 7:28.
Jiowa—Ewe Mi Apwonueta An Kewe Kokkot
Iten Kot mi sokkolo lapalapan, Jiowa, a makketiu arapakan fan 7,000 lon ewe Tesin Ipru. Pwisin itan a affata pwe Jiowa emon Kot mi wesewesen manau. Iten Kot a wewe ngeni “A Efisi An Epwe Fisita.” Ren weween itan, Jiowa a affata pwe i ewe Sou Apwonueta an kewe pwon. Lupwen Moses a mochen silei itan, Jiowa a alapalo ach weweiti weween itan iei ussun: “Upwe wiliiti met upwe wiliiti.” (Ekistos 3:14, NW) An Rotherham we Paipel a titchik lupwen a apasa: “Upwe Wiliiti ese lifilifil met ua mochen.” Jiowa a filata met epwe wiliiti ren an epwe apwonueta an kewe pwon mi pwung. Ina popun a wor an kewe itelap mi lamot, chowean Chon Forata, Sam, Epinikepiisom, Chon Masen Siip, Jiowa Sapaot, Chon Auselinga Iotek, Soukapwung, Sense Mi Lapalap, Chon Amanau.—Soukapwung 11:27; Kol Fel 23:1; 65:2; 73:28; 89:26; Aisea 8:13; 30:20; 40:28; 41:14.
Ewe Kot mi enlet chok mi tongeni iteni Jiowa, pun aramas rese tongeni silei ika ar kewe kokkot repwe sopwoch. (Jemes 4:13, 14) Jiowa chok mi tongeni apasa: “Iwe, usun ran me snow ra pungutiu me lang, nge resap liwinta, pwe repwe mwo achonu pwul o arasi fanu o apwuku ira, epwe pwal wor fotan chon fofot me enen chon mongo, iei usun ai kapas esap liwinto rei fan pon, pwe epwe afisata mine ua tipeni o apwonueta mine ua akunou ngeni.”—Aisea 55:10, 11.
Pokiten Jiowa a unusen apwonueta an kewe kokkot, minne aramas ra luku pwe ese enletin tufich nge mi enlet ren Kot. Fite, fite ier mwirin maloon Eperiam, Aisek, me Jekop, Jises a fos ussur ren ekkeei kapas: “Esap i [Jiowa] Koten ekkewe mi malo, pwe Koten ekkewe mi manau chok. Pun aramas meinisin ra chok manau ren i.” (Luk 20:37, 38) Ekkena ulumon semelap mi tuppwol ra fen malo, nge an Kot kokkot le amanauasefalliireta a kon lukuchar pwe ngeni i ra ussun ita manau. An Jiowa amanauasefalli ekkeei ulumon mi tuppwol esap weires ussun chok an ese weires lupwen a forata ewe aemonun mwan seni ewe suusuun ppwul.—Keneses 2:7.
Ewe aposel Paul a awora pwal eu pisekin annet pwe Kot a ekkefisata pwonuetaan an kewe kokkot. Lon ewe Paipel, Eperiam a eiten ngeni “semelapen chommong einang.” (Rom 4:16, 17) Atun Apram esaamwo nounou, Jiowa a siwili itan ngeni Eperiam, weween “Semelapen Eu Pwiin Aramas (Mi Chocho).” Jiowa a efisi pwonutaan weween ena it ren an amanaua an Eperiam me Sara tufichin nounou, ekkewe ruuemon mi fokkun chinnap.—Ipru 11:11, 12.
Pokiten an a angei manaman me nemenem, Jises Kraist a tongeni fos ussun mettoch mi wesewesan pokiten an sile mi lapalap seni an aramas sile. Inaamwo ika chiechian we Laseres a malo nge, Jises a ereni noun kewe chon kaeo: “Chienach we Laseres a fen mourulo, nge upwele feilo pwe upwe fongunata.” (Jon 11:11) Met popun Jises a apasa pwe emon mi fen malo a chok mourulo?
Lupwen Jises a tori Petani, sopwun Laseres we, a feilo ngeni ewe peias me a apasa pwe repwe asokopenalo ewe fau mi pinei ewe peias. Mwirin an iotek ren leuwommong, a apasa: “Laseres, kopwele tou.” Iwe, lupwen mesen chon katon meinisin ra chok nefotofot ngeni ewe peias “ewe mi malo a tou, nge pechen kewe me poun mi chok finifinilo, o won-mesan a tukutuk ngeni och mangaku.” Iwe, Jises a apasa: “Oupwe chok epichalo, pwe epwe fetal.” (Jon 11:43, 44) Jises a amanauasefalli Laseres, ewe mwan a fen malo ruaanu ran! Kraist ese kapas mwakel lupwen a apasa pwe chienan we mi mourulo. Me ren ekiekin Jiowa me Jises, inaamwo ika Laseres a fen malo nge, a ussun ita pwe a mourulo chok. Ewer, fofforun Jises me Seman we lon lang ir foffor mi wesewesen fisita.
Jiowa A Tongeni Siwili Minne Sia Apilukuluku Chok Ngeni Mettoch Mi Wesewesen Manau
Ifa sokkofesennin ekkewe uluulun mi otuputup me ewe Kot mi enlet! Mei mwaal an chokkewe mi aucheaani uluulun atoto ngeni ar kewe uluulun manaman mi wachemuk. Ese lifilifil watteen ar epini ekkewe uluulun, ar kewe foffor ese tongeni atoto ewe tufichin fori manaman ngeni ekkewe uluulun. Iwe nge, Jiowa Kot mi tongeni fos ussun noun kewe chon angang mi fen malo ussun chok pwe ir mi manau pun a tongeni amanauasefalliir. Ewe “Samol mi Lapalap ewe Kot mi let,” me ese otupu noun kewe aramas.—Jeremaia 10:10.
A ifa me watteen ewe auruur seni ach silei pwe lon ewe fansoun mi filita me ren Jiowa, ekkewe mi malo a chechchemeni repwe manausefal! (Fofor 24:15) Ewer, manausefal a wewe ngeni forsefallin lapalapen manauen emon. Chechchemenien lapalapen manauen aramas esap weires ngeni ewe Chon Forata pun ese aukuk an tipatchem me manaman. (Hiop 12:13; Aisea 40:26) Pokiten Jiowa a ur ren tong, epwe aea an tufich mi unusoch le chechchemeni mettoch meinisin ren an epwe amanauasefalli ekkewe aramas mi fen malo. Repwe manausefal lon eu paratis won fonufan ren ekkewe lapalap a fen piin nom reer mwen ar malo.—1 Jon 4:8.
Atun ach akkarap ngeni ewe sopwoloon an Setan we fonufan, a fokkun murinno met epwe fis lon mwach kkan ngeni chokkewe mi eani lukuluk lon ewe Kot mi enlet. (An Salomon Fos 2:21, 22; Taniel 2:44; 1 Jon 5:19) Ewe soumak kol mi fel a alukulukukich: “A ekis chok fansoun, o ir ekkewe mi ingau resap chuen nom: . . . Nge ir ekkewe mi mosonoson repwele fonueni ewe fonu, o repwe pwapwaesini chommongun ar pisek.” (Kol Fel 37:10, 11) Atai alluk me mwanesol esap chuen fiffis. Pwung epwe pworacholo, me esap chuen wor osukosuk ren moni. (Kol Fel 37:6; 72:12, 13; Aisea 65:21-23) Osukosuk lefilen aramas mi sokkolo wouur, unuchar, ar einang, me aramaser epwe morolo. (Fofor 10:34, 35) Maun me pisekin maun repwe morolo. (Kol Fel 46:9) “Esap wor eman chon ewe fanu epwe apasa pwe a samau.” (Aisea 33:24) Aramas meinisin repwe unusen pochokkul. (Pwarata 21:3, 4) Arapakan chok pwe paratis won fonufan epwe eu mettoch mi wesewesen fisita. Jiowa a fen akkota!
Ewer, ekiselo chok me ekkewe apilukuluk meinisin mi alongolong won ewe Paipel repwe pwonuta. Met popun sipwe mut ngeni met ei fonufan a fel ngeni an epwe otupukich lupwen sia tongeni eani unusen ach lukuluk lon Jiowa? Letipan pwe sokkun “aramas meinisin repwe kuna amanauen ngunur o sineifichi minne mi enlet.” (1 Timoti 2:3, 4) Sise mochen fangolo wouochuch me ach fansoun ngeni liosun och mettoch seni ei otot won fonufan mi manau lon tupuwach chok, are ngeni ekkewe koten ei fonufan. Amwo sipwe alapalo ach sile ussun ewe Kot mi wesewesen manau me eani lukuluk lon ena Kot ren unusen letipach.—An Salomon Fos 3:1-6; Jon 17:3.
[Picture on page 6]
Me ren ekiekin Jiowa me Jises, Laseres a mourulo chok
[Pictures on page 7]
Arapakan chok paratis won fonufan epwe wesewesen fisita